Read pokoot KIYITUT 30 Bible Online

KIYITUT 30 - pokoot bible

KIYITUT 30

¹Kïlenchï Musa kintöghoghi ortïna pipö Israel, kölö ECHOTYON,

² “Ato walwal chi lö otoni kïgh ECHOTYON anta am muma* kïtagh kïgh ompö möngenyi, kïmïchini kusïlta kiyomisötenyi, akwigh le otini kamwa nyinte.

³Anta ato wolwolsyö korka ompö ECHOTYON nyo tökïmi katangwa anta rat kegh ompö ngölyon,

⁴akïlïm kwanta wölo kewalwalta kegh nko ngölyon nyo karata kegh, amamwanye kïgh nyinte kï mi nyu lenyini kiwalwalatenyi nko ngölyontenyi nyo kirata kegh.

⁵Wölo ato tagha kwanta otini kalïm kiwalwalatenyi, kïmelö tökïmi lenyini kiwalwalatenyi nko ngölyontenyi nyo kirata kegh, kïlöstoghchini nyu ECHOTYON nyinte ompöwölo katagha kwanta.

⁶Wölo ato kip, akïtökïmi kiwalwalatenyi anta ngölyon nyo kimwa nyinte kirata kegh, kïrkegh melö kinan lasiny,

⁷akilïm pontenyi, amömwochï kïgh otini kalïm, kïmi nyu lenyini kiwalwalatenyi nko ngölyontenyi nyo kirata kegh.

⁸Wölo ato tagha pontenyi nyinte otini kalïm kiwalwalatenyi, kwighöy ngalechï kïlïkwï kwïle. Löstoghchini nyu ECHOTYON nyinte.

⁹Mïchini korka nyo le mïsïk anta nyo kiketyak kusïlta kiwalwalatenyi anta ngölyon nyo kirata kegh.

¹⁰Akwoto walwal kegh korka nyo kikep, anta rata kegh ngölyon ompö muma,

¹¹otini kalïm pontenyi akïsï amataghanye, kïmi lenyini kiwalwalatenyi nko ngölyon nyo kirata kegh.

¹²Wölo ato tagha pontenyi nyinte, kutyoköy akwigh kïlïkwï kiwalwalatenyi nko ngölyon nyo kirata kegh, kïlöstoghchini nyu ECHOTYON nyinte.

¹³Muköy ponto kokononi kïcham anta tagh kiwalwalat anta ngölyon nyo kirata kegh kokononi.

¹⁴Wölo mamwanye kïgh kitenö osis otini kilïm kiwalwalatenyi anta ngölyon nyo kirata kegh, kï kikïcham ompöwölo melö kitagh otini kilïm.

¹⁵Wölo ato tagh otini kikïlïm kwomöy nyinte ngokiko korkenyi.”

¹⁶Chï kï kirurut cho kitö ECHOTYON Musa, ompö kwenu chi nko korkenyi nko kwenu papo nko cheptanyi nyo tökïmi katangwa.