Read pokoot KIYITUT 31 Bible Online

KIYITUT 31 - pokoot bible

KIYITUT 31

¹Kïlenchï ECHOTYON Musa,

²“Taka pipö Israel ompö pipö Midyan ompö kïgh nyo kighchï chane pipö Israel, atolapay irapasanyi.”

³Kïlenchï Musa pich, “Anapa kegh, atoporyeghenö pipö Midyan ato otokyinö ECHOTYON.

⁴Ichengonyi pich cho le 1,000 or anka tïkwïl nyo pö Israel cho petöy poryot.”

⁵Kïpkana pich cho le 1,000 or anka tïkwïl nyo pö pipö Israel. Kïpa nyu pich cho pö poryot 12,000.

⁶Kïyonta nyu Musa chane kïpa poryot nko Pineas wero tïsin Eleasar nyo kipöy kari saghat nko kontin cho kikutöy.

⁷Kïporyeghö chane pipö Midyan le ato kimwochï ECHOTYON Musa, kïpar pich cho le mïrön löwïr,

⁸kïpar chane pöytoghi Midyan mut: Epi nko Rekem nko Sur nko Ur nko Repa. Kipar tïkwïl Palaam wero Peor.

⁹Kïnam pipö Israel koru pipö Midyan nko monïnge akïpörï tïch nko kechir nko tïkukwa löwïr.

¹⁰Akïpel kanastinekwa löwïr nko wölo kimöngöy chane.

¹¹Kïcheng pöröw cho pö pich nko cho pö kyak,

¹²akwipchï Musa nko tïsin Eleasar nko pipö Israel löwïr cho kimi möngot nyo mi tömko Moap Yordan atolekïtö Yeriko.

¹³Kïngeta möngot Musa nko tïsin Eleasar nko pipö Israel löwïr kïpa kïtarok pipö lïk ompö kiror.

¹⁴Kïnyölechï Musa yetïntino lïk cho kighyongchini pich 1,000 nko cho kighyongchini pich 100 cho kimïlisyeghö poryot.

¹⁵Kïtep Musa chane lö, “Ompö ne topïstenökwa kor löwïr kïsöpchö?

¹⁶Akwanyï onkïtökwa lö chane chay kirïp ngala Palaam akwigh pich ompö Peor kïtagh ECHOTYON, kïnam sömewö pich.

¹⁷Para ye nyu karöchïnin anka tïkwïl nko korka nyo kikïrï nko mïrön.

¹⁸Wölo opïstö tipïn nko kor cho le chepkïltïtin.

¹⁹Osir osis mut nko odeny, pich cho köpörisyö anta anana mïntïrïch ato mi asispa sömök nko asispa mut nko odeny kutïlil kegh namankökwo.

²⁰Otïlilekwa sïra anka tïkwïl nko kïgh anka tïkwïl nyo kikigha menyon anta puto ngaror anta ket.”

²¹Kïlenchï Eleasar tïsin pïchay kïpa poryot, “Achï kirurut cho kitö ECHOTYON Musa.

²²Kïgh anka tïkwïl nyo melö nöghöy cho lata, koltin nko ropïyen nko taghoy nko karïn nko mapatyan nko karïn nyo anger.

²³Nko kïgh anka tïkwïl nyo melö nöghöy, opelekwa atökïtïlilitu, kïnyïl chona nöghot, otïlilokwa pöghechay pö kitïlilöt.

²⁴Owunekwa sïrokökwa ompö asispa mut nko odeny atotïlilitunökwa, atolapay apkanakwa nyu otöngwï möngot.”

²⁵Kïlenchï ECHOTYON Musa,

²⁶“Oyitö pöröw löwïr cho pö pich nko kyak, nyi nyo iyitöy nko Eleasar nko kintöghoghi pipö Israel.

²⁷Achagh kïlïkwï odeny, ochöghchï pich cho kipa poryot nko pipö Israel löwïr.

²⁸Ompö cho pö pipö lïk cho le 500 cho kipa poryot, ichengenyi surutyon akonga, aicheng lenyoni ompö tïch nko sïkïröy nko kechir nko ngaror, kïpöyit ECHOTYON.

²⁹Itöninenyi choni lapay tïsin Eleasar le ropöwon ompö ECHOTYON.

³⁰Atolopay ichenga pipö Israel tïkwïl, akonga ompö tömönut mut cho pö pöröw cho le pich nko ompö tïch nko sïkïröy nko kechir aitö pipö Lawi cho ripöy Ema nyo mi ECHOTYON.”*

³¹Kwigh Musa nko tïsin Eleasar lenyini kimwochï ECHOTYON Musa.

³²Pöröw cho kinyorï pipö lïk kï: kechir nko ngaror cho le 675,000

³³nko tïch cho le 72,000

³⁴nko sïkïröy cho le 61,000

³⁵nko chepkïltïtin cho le 32,000.

³⁶Kwenu kareranta nyo pö pich cho kipa poryot kï kechir nko ngaror cho le 337,500

³⁷aki pö ECHOTYON cho le 675 ompö choni,

³⁸nko tïch cho le 36,000, aki pö ECHOTYON cho le 72 ompö choni.

³⁹Sïkïröyi kï 30,500, aki pö ECHOTYON cho le 61 ompö choni.

⁴⁰Chepkïltïtin kï 16,000 aki pö ECHOTYON cho le 32 ompö choni.

⁴¹Kutö nyu Musa Eleasar chinö kile ropöwo ECHOTYON le ato kimwochï ECHOTYON Musa.

⁴²Ompö kareran chay pö pipö Israel löwïr chay kichöghchï Musa pich cho kipa poryot,

⁴³ki kechir nko ngaror cho le 337,500,

⁴⁴nko tïch cho le 36,000

⁴⁵nko sïkïröy cho le 30,500

⁴⁶nko chepkïltïtin cho le 16,000.

⁴⁷Kïcheng Musa akonga ompö pich tömönut mut nko kyak akutö pipö Lawi cho kiripöy Ema nyo mi ECHOTYON lenyini kimwochï ECHOTYON Musa.

⁴⁸Kïpa yetïntinechay kintöghoghchini pipö lïk wölo mi Musa,

⁴⁹akïlenchï, “Kakeyitöcha pich cho kakintöghoghchinecha, möminye ompö akong nyo potote.

⁵⁰Kakipucha ye nyu ropöwo ECHOTYON, kïgh anka tïkwïl nyo könyorï chi, kari koltin nko kari morïn nko kari kelyön nko kaymoris nko kari yitïn nko sanay atökeghacha linyogh ompö tawu ECHOTYON.”

⁵¹Kïcheng Musa nko tïsin Eleasar koltinechay nko karïn lapay cho kikitang.

⁵²Kirich kilen 200 tïkwïn löwïr cho kikonï yetïntinechay.

⁵³Kicheng pöröwekwa chi pö lïk anka tïkwïl.

⁵⁴Kwip nyu Musa nko Eleasar koltinechay Ema ECHOTYON atökïlïkwï kinonut nyo pö pipö Israel ompö tawu ECHOTYON.