Read pokoot KIYITUT 32 Bible Online

KIYITUT 32 - pokoot bible

KIYITUT 32

¹Kitïng werpö Rupen nko Kad tïch cho chang nyoman, kïsïwa chane koro Yaser nko koro Kiliad lö kikaram ompö kyak.

²Kïpa nyu wölo mi Musa nko tïsin Eleasar nko kintöghoghi pipö Israel akïlenchï,

³“Koronay kingarak ECHOTYON pipö Israel kïcheng, choni kï Atarot nko Dipon nko Yaser nko Nimra nko Espon nko Eleale nko Sipma nko Nepo nko Peon, kï kor nyo karam ompö kyak, ompöwölo kïtïngetecha kyak cho chang nyoman,

⁵kïlenyona ato kakenyorucha chomchin ompö tawungu, ikonecha koronï kïlïkwï nyincha amekany kyoghyenöcha lalwa Yordan.”

⁶Wolö kuyokyï Musa chane lö, “Omökekwa so kïpa werkökwa poryot opöyösekwa ompöwölo?

⁷Ompö ne tomökekwa otïghö ko pipö Israel cho kömököy kïpetöy kor nyo kitö ECHOTYON chane?

⁸Kigh lenyoni papotïnekwa ato kyayoktan chane ompö Kades Parnea kïpa kïghot kore.

⁹Kipa chane ntökwit mpöghoghyo Eskol akïsïwa kore, wölo otini kimïlisyö, kïtïgh ko pich cho kimököy kïpetoy kor nyo kitö ECHOTYON chane.

¹⁰Kïnyala ECHOTYON asisoni akuwalwal lö,

¹¹‘Möminye chi nyo itöy koronini kyoyomisyan Apraam nko Isak nko Yakopo ompö pïchay kïpkana Misri ato kitïng könyis tömönut odeny kutok, ompöwölo chane.’

¹²Kïpoto Kalep wero Yepune chi pö Kenis nko Yoswö wero Nun, ompöwölo kirïp chane ECHOTYON.

¹³Kinörekyï ECHOTYON pïchoni akwigh chane kïpestegha surkwen könyis 40, ntökïtenö kuwonyö pïnay kigh ngokï ompö tawu ECHOTYON.

¹⁴Anyï ye kamachakwa arïpa ngaleko papotïnekwa, pïnï pö pich cho le mwokïyis cho mököy kwipchini nörekyo ECHOTYON pipö Israel ngat!

¹⁵Ato ataghakwa arïpa nyinte, kïpïsyini pïchï kïmïkul surkwen, akïlïkwï akwa cho kigheghchinok.”

¹⁶Kïrich chane Musa akïlenchï, “Nya ketekacha yete akalu kechir nyo pö kyakicha nko kanastin cho tekote cho pö monecha.

¹⁷Atolapay kepecha nyu poryot nko werköcha pipö Israel akentöghoghchicha porye ntökesïwecha lö kinyorï chane wölo möngöy, kïmi nyu monecha wölo tekate akïripote ompö pïchï mi koronï.

¹⁸Mökïmïlisyochanye kaw ntökïtenö kïnyorï chi pö Israel anka tïkwïl mïlatenyi nyo mïlöy.

¹⁹Ompöwölo melö kïmïlecha nko chane ompö Yordan antakwagh, ompöwölo kakenyorucha mïlatenyo ompö Yordan ontökwowu wölï kaparta kongasis.”

²⁰Kïlenchï Musa chane, “Ato aghakwa lenyoni anap kegh nyu ompö tawu ECHOTYON apa poryot.

²¹Nya kwoghyö pikökwa löwïr cho pö lïk lalwa Yordan ompö tawu ECHOTYON ntökïtenö kïrïnta chane,

²²otini kakïrïnta kore, ompö tawu ECHOTYON omïlisyekwa nyu ompöwölo motïngökwanye ghöyityö ompö tawu ECHOTYON nko pipö Israel, yitöy nyu ECHOTYON lö, nyinkwa koronï mi Yordan okumpö kongasispa.

²³Wölo ato maghakwanye lenyoni, kïkaghakwa ngokï ompö tawu ECHOTYON, onkïtï nyu lö, ngongtenekwa ngokikwo nyo motïny.

²⁴Otekyinö monekwa kanastin, atek akaluto kechir agh lenyini koyomisökwa.”

²⁵Kïlenchï werpö Kad nko cho pö Rupen, Musa, “Ighöy mötworiku lenyini kamwa echotyontencha.

²⁶Dongöy korucha nko monecha nko tukacha nko kechirye, kanastina Kiliad,

²⁷wölo kïpetecha mötworiku ompö tawu ECHOTYON, kyoghyot Yordan akeporyö le nyinö kemwaghanyi.”

²⁸Kïlenchï Musa Eleasar nko Yoswö nko kintöghoghi ortïna pipö Israel,

²⁹“Ato oghyö werpö Kad nko pipö Rupen Yordan atökïporyö ompö tawu ECHOTYON kungarakekwa anyorukwa kore, otö nyu chane koro Kiliad kïlïkwï mïlatengwa.

³⁰Wölo atomoghyöcha chane Yordan kïpa poryot nko akwa, kïnyoru chane mïlatengwa ompö koro Kanan le akwa.”

³¹Kuyokyï pipö Kad nko pipö Rupen lö, “Kighecha lenyini kamwa ECHOTYON.

³²Kyoghyocha lalwa Yordan ompö tawu ECHOTYON kechï napat kegh nko karicho pö poryot ketöngöy koro Kanan atökïlïkwï mïlatencha wölï le kongasis pö Yordan.”

³³Kutö Musa werpö Kad nko pipö Rupen nko kwenu pipö Manase, monïngo Yosep koro Sion pöytoghinto pipö Amori nko koro Ok pöytoghinto Pasyan kïmito nko kanastine nko kore kïmïkul.

³⁴Kïtek werpö Kad kanastina Dipon nko Atarot nko Aroer

³⁵nko Atrot Syopan nko Yaser nko Yokpea

³⁶nko Pet Nimra nko Pet Aran kanastin cho wokote nko akoltina kechir.

³⁷Kïtek werpö Rupen kanastina Espon nko Eleale nko Kiryataim

³⁸nko Nepo nko Paal Meon (nyo kikïwaghach kayne) nko Sipma akïmïnchï kaynötut kanastin cho kitek chane.

³⁹Kïcheng pipö Makir wero Manase koro Kiliad akïyon pipö Amori cho kimöngöy.

⁴⁰Kutö Musa pipö Makir koro Kiliad wero Manase, kïmang chane wöloni.

⁴¹Kïwö Yair, nyo pö ara Manase, kïporyö akïnam kanastin walaka akïkurö, Kanastina Yair.

⁴²Kïporyö Nopa akïnam Kenat nko keston cho kighömot tïkwïl akïmïnchï kaynat kekurö Nopa, kïkurteghö kegh.