Read pokoot KIYITUT 33 Bible Online

KIYITUT 33 - pokoot bible

KIYITUT 33

¹Koroswechï cho kimungoteghö pipö Israel, otini kiwuwunö chane Misri ompö ortïnekwa kuntöghoghchini Musa nko Aron.

²Kikir Musa wop anka tïkwïl wölo kingetunö nko wölo kimungö chane kïle ato kimwochï ECHOTYON akwachï wölini kimungö chane kïrïp kegh nko wölo kitorö.

³Kiwuwunö chane Misri asispa taman nko mut nyo pö arawa tagh, asis nyo kirïptoy Pasaka,* kïngetunö chane Rameses kïsïwïyi pipö Misri lapay,

⁴otini kimi pipö Misri kïroröy poretayikwa chay kitïgh ECHOTYON. Kiporï nyu ECHOTYON lö kitïngeto nyinte owesyö kïtïl tororötino pipö Misri.

⁵Kïwuwö pipö Israel Rameses akïmang Sukot.

⁶Kïngeta Sukot akïmang Etam nyo mi sörömu surkwen.

⁷Kïngeta atoni akïmïlisyö kutang Pi Ayirot kongasispa Paal Sepon akïmang atolekïtö Mikdol.

⁸Kïngeta Pi Airot akuwer kwenu Nanam nyo Pïrir kïpa osis sömök ompö surkwen pö Etam, kwit Mara akïmöngisyö atoni.

⁹Kïngeta Mara akïpa kïmang Elim, kimitö atoni kori pögh cho le taman nko odeny nko keti sostin cho le 70.

¹⁰Kïngeta Elim akïmang sörömu Nanamay Pïrir.

¹¹Kïngeta Nanamay pïrir akïmang surkwen pö Sin,

¹²Kïngeta surkwen pö Sin akïmang Dopka.

¹³Kïngeta Dopka akïmang Alus.

¹⁴Kïngeta Alus akïmang Repidim, wölo kimöminye pögh cho kï gheghöy pïchoni.

¹⁵Kïngeta Repidim ntökwit kutïng pö Or, kïmangata chane koroswechï: Surkwen pö Sinay nko Kiprot Atapa nko Aserot nko Ritma nko Rimon Peres nko Lipna nko Risa nko Kelata nko kutïng pö Syeper nko Arada nko Makelot nko Taat nko Tera nko Mitka nko Asmona nko Moserot nko Penechakan nko Orakidkad nko Yotpata nko Aprona nko Esyonkeper nko surkwen pö Sin, nyoni kï Kades nko kutïng pö Or nyo mi sörömu koro Edom.

³⁸Kïpusta Aron kutïng pö Or le ato kimwochï ECHOTYON, akïröpösyï wölini, ompö könyi tömönut angwan asispa tagh nyo pö arawa mut kïngeta kïpkana pipö Israel koro Misri.

³⁹Kitïng Aron könyis 123 otini kimeghchini kutïng pö Or.

⁴⁰Kïlïm chi pö Kanan nyo kile pöytoghinto Arad nyo kimi okumpö Nekep* ompö Kanan lö, mi pipö Israel kïpkonöy.

⁴¹Kïngeta kutïng pö Or ntökwit tömköyi Moap, kimangata chane koroswechï: Solmona nko Punon nko Opot nko Aparim nyo mi koro Moap nko Dipon Kad nko Almon Diplataim nko kutïng pö Aparim nyo lekïto kutïng pö Nepo nko tömköyi Moap kamasu lalwa Yordan ompö Yeriko, kwenu Pet Yesyimot nko Apel Syitim.

⁵⁰Kïlenchï ECHOTYON Musa ompö tömköyi Moap atolekïtö Yordan antakwaghpa Yeriko,

⁵¹ngölonchinö pipö Israel, lenchinö chane, “Otini koghyekwa Yordan atang koro Kanan,

⁵²ayon pich cho möngöy tagh korononi, anyar koghikwa cho kigho körkeyïntin nko körkeyïntinekwa cho pö karïn arultö ato osoghokwa.

⁵³Atolapay achengakwa nyu kore amang ompöwölo kokonokwa amïla.

⁵⁴Ichöghchï kore pich ompö kura kïrïp kegh nko kiyitötengwa, itö kore nyo wow pich cho chang, itö nyo mïnïng pich cho ngörï. Pöyitu pich kareran anka tïkwïl kïrïp kegh nko kwen nko ortïneko kukötïnekwa.

⁵⁵Wölo atomayonakwanye pich löwïr cho möngöy korononi, kïkonekwa cho ngötu kömpölelyö le wïtan cho mi konyikwa anta kato cho mi porwöyikwa, konokwa kömpölelyö ompö korononi omöngekwa.

⁵⁶Oghwokwa nyu kïgh nyo kyatatan oghchï chane.”