Read pokoot KIYITUT 34 Bible Online

KIYITUT 34 - pokoot bible

KIYITUT 34

¹Kïlenchï ECHOTYON Musa,

²“Mwochinö pipö Israel lö, otini kolïtökwa koro Kanan, kor nyo okonekwa, chï söremwok pö rotyotïnekwa.

³Ngeta kumpö ewu tagh surkwen pö Sin kïrïp rotyo Edom, akutorö kongasis ompö okumpö ewu tagh nyo pö nanampa Paryan.

⁴Atolapay kïwaghaka kutang okumpö ewu tagh ompö ato kïpustegho Akrapim akuwer Sin ntökwit okumpö ewu tagh nyo pö Kades Parnea, atolapay kïwaghach kutang Asar Adar ntökwit Asmon.

⁵Atolapay kïwaghakegha Asmon kutang mpöghoghyo Misri akwit sörömunyi nanampa Kwen.

⁶“Rotye nyo pö okumpö ta kï nanampa Kwen nko söremwokachi.

⁷“Rotyenkwa nyo pö okumpö ewu löt orïpokwa nanampa Kwen ntökwit kutïng pö Or,

⁸arïpokwa atoni le kutïng pö Or ntökwit ato kïlïto Amat ngata nyu Sedad.

⁹Itöy nyu söremwoko Sipron akï ngötisyegho Asar Enan lïku nyu atoni rotyenkwa nyo pö okumpö ewu löt.

¹⁰“Orïpokwa Rotye nyo pö kongasis Asar Enan ntökwit Syepam,

¹¹atolapay kïröytö kutang okumpö ewu tagh nyo pö Arpel kongasispa Ayin, atolapay kïröyto kutang komos cho mi kongasispa nanampa Kalilaya,

¹²akïrop okumpö ewu tagh nyo pö lalwa Yordan, kwit sörömunyi nanampa Paryan. Lïku nyi korenkwa nko rotyotïnekwa kuwit.”

¹³Kïlenchï Musa pipö Israel, “Koronete nyo omïlekwa ompö kura, kor nyo kamwa ECHOTYON lö, otöni ortïn mut nko angwan nko kwenu or akonga,

¹⁴ompöwölo kikïnyorï mïlatengwa pipö Rupen nko werpö Kad nko kwenu pipö Manase kïrïp nko korikwa,

¹⁵ompö kongasispa lalwa Yordan atolekïtö Yeriko.”

¹⁶Kïlenchï ECHOTYON Musa,

¹⁷“Chöghwokwa kore Tïsin Eleasar nko Yoswö wero Nun,

¹⁸okïlekwa kintöghoghin akonga ompö or anka tïkwïl atökungarak chane.”

¹⁹Chï kï kaynötut pö pich nko kintöghoghikwa: [Or] — [Kintöghoghin] Yuda — Kalep wero Yepune Simion — Syemuel wero Amiud Penchamen — Elidad wero Kislon Dan — Puki wero Yokli Manase — Aniel wero Epod Epraim — Kemuel wero Syiptan Saplon — Elisapan wero Parnak Isakar — Paltiel wero Asan Asyer — Aiud wero Syelomi Naptali — Pedael wero Amiud.

²⁹Pïchete cho kimwochï ECHOTYON kïchöghchï pipö Israel kor nyo mïloy chane ompö koro Kanan.