Read pokoot KIYITUT 35 Bible Online

KIYITUT 35 - pokoot bible

KIYITUT 35

¹Kïlenchï ECHOTYON Musa ompö tömköyi Moap ompö Yordan atolekïtö Yeriko,

²“Mwochinö pipö Israel kutö pipö Lawi kanastin cho möngöy ompö mïlatengwa nko wölo oketïyi kyakikwa ompö söremwok pö kanastin.

³Pöyitu kanastinechï pipö Lawi cho möngöy, kïpöyit kore wölo oketïyi kyakï nyo pö tukakwa nko kyakikwa walaka.

⁴Toro wölo oketïyi kyakï nayatu kanasyan, miten 450 kutang sany kuwit kanasyan

⁵Lïku nyu miten 900 ompö wop tïkwïl nyo pö kanasyan lïku nyu wöloni wölo oketiyï kyakikwa.

⁶Otonikwa pipö Lawi kanastin mut nko akonga cho kïryöghchini, nyo muköy chi ntökurïpchï nyo kapar chi amelö kwötyin. Otösyinekwa ngat chane kanastin walaka cho le 42.

⁷Otönikwa tïkwïl wölo oketïyi kyakikwa kïlïkwï lapay 48.

⁸Kanastin cho otönikwa ortïna Israel pipö Lawi, kïrïpöy kegh nko yetïnto ortïnekwa. Nyoru kanastin cho chang or nyo chang pikachi, kïnyorï ore nyo mïnïng cho ngörï.”

⁹Kïlenchï ECHOTYON Musa,

¹⁰“Mwochinö pipö Israel lö otini koghyekwa Yordan apa koro Kanan,

¹¹okïlekwa kanastin cho kïryoghchini nyo muköy chi ntökurïpchï nyo kapar chi amelö ompö kwötyin.

¹²Lïku kanastinechoni ompö akwa wölo ghïpo ompö chi nyo mökoy kitakat nyo pö kisön, mökïtïghönye chi nyo kapar chi ntökïtenö kerwokyï ompö tawu pich.

¹³Akï kanastin cho otötonekwa kï kanastin mut nko akonga cho kïryoghchini,

¹⁴otötonekwa kanastin sömök ompö Yordan antakwagh nko cho le sömök ompö koro Kanan.

¹⁵Lïku chï kanastin cho ryöghchini pipö Israel nko to anta pïnot cho möngöy nko chane, atökurïpchï chi nyo kalel kipar.

¹⁶“Wolö atolïwö chi chitö anka karïn kïma, kï pörin nyinte, ketïghöy nyu chi nyo le pörin.

¹⁷Kïnyïl atowira kagh nyo mi eghunyi akïma, kï pörin nyinte, ketïghöy nyu chi nyo le pörin.

¹⁸Anta lïwö ket nyo mi eghunyi akïma, kï pörin nyinte, kïtïghöy nyu chi nyo le pörin.

¹⁹Muköy kitökinto kisön kïpar pörintononi atonyorï.

²⁰Atopar chi chitö anka ompöwölo kereyöy, anta yumtö anta wira kïgh kima,

²¹anta wira eghunyi ompöwölo punyontenyi akïma, kepöröy chichoni, akumuköy kitökinto kisön kïpar chichoni atonyorï.

²²“Ato par chi chitö anka nyo melö kö punyontenyi, amelö kökwötï, nyo köyumtö anta wira kïgh,

²³anta ato par chi chitö anka kïwira kogh kïma amelö kökwötï amelö kö punyontenyi,

²⁴rwoköy nyu pich kungöroköy pörin amelö pipö ompö chichinö kama cho yöröy kutököy chitangwa.

²⁵Söru nyu pich pörintonay ompö mori kitökin akuyokyï kanasyantanay kïryoghchini, nyo kerïpchini nyinte, töpo nyu wöloni ntökïtenö kïrapas chi nyo köle Tïsin nyo Wow* osiswechoni.

²⁶Wölo ato töp pörintonay ntökïwö kïtïl sörömu kanasyantanay, kirïpchï nyinte,

²⁷akïnyorchï nyinte kitökinto kisön sörömu kanasyan akïpar, kïmelö kiyitöy lö kapar chi.

²⁸Ompöwölo mïchini kïtöpö chi kanasyantanini kïryoghchini ntökïma Tïsin nyo Wow, atoma Tïsin nyo Wow kumï chichay kïpar chi akïmïla kanasyantenyi.

²⁹“Lïku kirurutchï chikwa nko monekwa ompö wölini omöngekwa kokay.

³⁰Ato par chi chitö anka, kepöröy nyinte ompö tawu söwï, wölo melö kïpöröy ompö tawu söwin akonga.

³¹Machenga chi kïgh nyo kapar chi lö, tökutyaka nyinte, wölo kïpöröy nyinte nyo mötïny.

³²Amachenga kïgh chi nyo kerïpchï kanasyantanay kïryöghchini lö, tökïmïla kanasyantenyi kïtomö kïma Tïsin nyo Wow.

³³Mosïmnyon kor wölini omöngekwa, ompöwölo sïmnyonöy kisön kor akï möminye kïgh nyo tïlilöy kore ompö kisön cho kökïmïlchï, kïpoto kisön pö chichini kamïlta kisön.

³⁴Mosïmnyon kor nyo omöngekwa amöngan tïkwïl, ompöwölo ochan ECHOTYON amöngan kwenu pipö Israel.”