Read pokoot KIYITUT 9 Bible Online

KIYITUT 9 - pokoot bible

KIYITUT 9

¹Kïngölonchï ECHOTYON Musa ompö kutïng pö surkwen pö Sinay, ompö arawa tagh nyo pö könyi odeny kïngeta kïpkana pipö Israel koro Misri, kïlenchï,

²“Nya kïrip pipö Israel Pasaka ompö asis nyo kïlate.

³Ompö mönon nyo pö asispa taman nko angwan nyo pö arawanete, oripekwa lenyini kikïmwa, kïrïp kegh nko kirurutkachi nko ngal cho kikïmwowokwa.”

⁴Kïmwochï Musa pipö Israel kïrip Pasaka.

⁵Kïrip nyu pipö Israel Pasaka mönon nyo pö asispa taman nko angwan nyo pö arawa tagh ompö surkwen pö Sinay kïrïp kegh nko kirurutkachi nko ngal löwïr le ato kimwochï ECHOTYON Musa.

⁶Kimi nyu pich cho le sïmnyon akwompö mïntïrïch, kïlenyona melö kimï chane kïrip Pasaka asisoni, kipa nyu tawu Musa nko Aron asisoni,

⁷akïlenchï, “Kïchicha sïmnyon akwompö mïntïrich, ompö ne töketaghenecha mökitötecha ropöw nko pipö Israel ompö asis nyo kïlate?”

⁸Kïlenchï Musa chane, “Akanya atepan ECHOTYON lö, ekïmwoghöy ne ompö akwa.”

⁹Kïlenchï ECHOTYON Musa,

¹⁰“Mwochinö pipö Israel lö ato sïmnyon chitönkwa anta chi nyo pö pïntankwa akwompö mïntïrïch anta pïn rutogh wölö low, kïtökumuköy kïrip Pasaka

¹¹ompö mönon nyo pö asispa taman nko angwan nyo pö arawa odeny, omöy chane nko makatyan nyo puryö mumar nko onkïy cho ngwonöch.

¹²Amakany kïngötï ntökwit tökwoghö amotïgh koweto kech, ripöy chane Pasaka kïrïp kegh nko kirurutkachi.

¹³Wölo chi nyo melö sïmnyon amelö kö mi rutogh, wölo kïtagh kïrip Pasaka, keyonoy kwenu pipö Israel, ompöwölo melö ketötö ropöwonto ECHOTYON ompö asis nyo kïlate, mi parakunyi ngokichi.

¹⁴Ato mi ton nyo mi nko akwa, akïmököy kïripöy Pasaka, kïmïchini kïrip kïrïp kegh nko kirurutkachi nko kiyomisutkö. Karkegh kirurut nyo pö chito kore nko nyo pö ton nyo möngöy nko akwa.”

¹⁵Asisini kikïtek Ema nyo mi ECHOTYON,* kulum polta, nyo kilata ma oghö ntökïyech.

¹⁶Kilata nyoni nyu chik, kilum polta pöghet, atomi oghö kïlïkwï ma poltonay.

¹⁷Akï nyini kinget poltonay, kïwï pipö Israel, akïtek ngat möngengwa otini körökyï poltonay.

¹⁸Kiwï pipö Israel otini kimwochï ECHOTYON akïmöngisyö otini kömwochï ECHOTYON. Möngisïyi chane ompö osis cho teno chini kitöpö polta paraku Ema.

¹⁹Kïrkegh kitöpö poltonay paraku Ema osis cho chang. Kïmöngisïyi pipö Israel kïrïpöy ngala ECHOTYON akimöwïcha.

²⁰Kitöpö osiswe walaka poltonay paraku Ema osis cho ngörï, kipöghön nyu chane osiswechoni kïrïp kegh nko ngölyonto ECHOTYON, akïwï kïrïp kegh nko ngölyonto ECHOTYON.

²¹Mi ato töpo poltonay kïngeta rarisan ntökwit tökwoghö, wuwöy nyu chane otini kanget poltonay.

²²Ato kitöpö poltonay paraku Ema osis odeny anta arawa akonga anta tïl, kï kimöwïcha, wölo nyini kinget poltonay kïwï chane.

²³Kimöngisyö chane kïrïp kegh nko ngölyonto ECHOTYON akïwï kïrïp kegh nko ngölyonto ECHOTYON nyo kimwochï Musa.