Read pokoot MIKA 5 Bible Online

MIKA 5 - pokoot bible

MIKA 5

¹Akwa pipö Yerusalem, aghamïta lïkoskökwo! Kikuwitecha pung mököy kïporyeghö pöytoghinto Israel!

² Ngwïnoninyi we Petleem nyo ipo Eprata nyo ichï mïnïng ompö ortïna pipö Yuda pöytoghintö ompö ani nyo lïku pöytoghin ompö Israel pöytoghin kïpö könyisyok.

³Kïlenyona pïsyini ECHOTYON pikachi pungkökwa ntökïtenö kulusyö kama monïng nyo kïghöy worö, tökïsorï werkökwa löwïr kïpka kïsörï pikökwa Israel.

⁴Ngetöy nyu akïpayta pikachi, ompö owesyo ECHOTYON, ompö konyït pö kaynata ECHOTYON Tororötïnyi. Möngisïyi pikachi ompö kalya, ompöwölo kikwororit nyinte ompö ngwïny kïmïkul,

⁵akwipï kalya. Kïrkegh kïpka pipö Asirya korencha akïlïtu kori pöytoghi kïyontocha kintöghoghicha cho owesöch kïporyeghö chane.

⁶ Pöytoy koro Asirya ompö chok akïpayta koro Nimrod ompö chok nyo mi kisach kisörwecha nyu chane ompö mori pipö Asirya otini kapka chane korencha akïlïtu rotyotïnecha.

⁷Kilïkwï nyu pipö Israel cho pö man kisoyönöt ompö punton le röyon nko rop nyo konu ECHOTYON kingarak kïgh anka tïkwïl cho melö kiköngöy kïkonu pich anta ropï pich.

⁸Mi ngötunön pö Israel kwenu punton lenye ngïtïny ompö wuw pö sakas, lenye wara ngotïny atolïtyï kechir, nyo, otini kasïwa kukomchï lawel akïmutmut lökïr puryö chi nyo söru nyonikïny.

⁹Rïntoy pipö Israel pungkökwa, pöröy chane nyo möngötunye ompö akong.

¹⁰Lentöy nyu ECHOTYON, “Owonyan angoletinekwa lömïs ompö asisoni anyornyoran nkarinekwa tïkwïl.

¹¹Anganyan kanastine ompö korenkwa arultö wölo oghetokwa kegh,

¹²awanyan ponï löwïr ompö akwa aparan ngorï löwïr ompö korenkwa.

¹³Anyarnyaran körkeyïntinekwa löwïr nko pchörine cho otïngetekwa tömokïtïngchinekwa ngat tïkwïn cho kaghakwa morikwo.

¹⁴Arultenan körkeyïntin pö Asyera* cho otïngetekwa, anyoran kanastinekwa löwïr.

¹⁵Owetan otokisïyi ompö nörekyo punton cho melö kikonyït ngalechan.”