Read pokoot NAUM 1 Bible Online

NAUM 1 - pokoot bible

NAUM 1

¹Anyï ngölyonto ECHOTYON nyo ngölono kanasyanta Ninawi le wölo kimwochï Naum nyo ngwïno Elkos ompö ara sïwïyagh.

²Töni ECHOTYON Tororöt sitöt nyo mötïny pich cho söghöy tororötin walaka. Mungöy pich ompö kitököt ompöwölo pïchoni cho kigh nyinte kïnarek.

³ Melö kwïskwïs kïnarek ECHOTYON, wölo wow owesyö nyo tïng. Melö pïstoy mwokïyon kïchïwït mönyorï sitöt. Ngeto chepkiriri atoni kewerata ECHOTYON, poltoy kï terïtyon nyo ngetuno atona katïk kelyechi.

⁴Ngölonchini ECHOTYON nanam kïteny akïtenyöy lenyini! Akwompö ngölyontenyi tenyot lalwatïna löwïr, akïyam suswon ompö koro Pasyan, kïyomö ketï cho mi kutïng pö Karmel, akïsilonchö tapïk cho mi Lepanon.

⁵Timtimisyot kutïngkotï otini ketï ECHOTYON, nyitöy komoswö ompö tawunyi. Rïngringöy ngwïnya otini kechumï nyinte akïpotonchö pich löwïr.

⁶Otini kanarek ECHOTYON, ekï ngo nyo lenchini kegh ongötu? Ngo nyini lentöy oköngöy sïngiryenyi nyo ngwan nya? Mïlu kegh nörekyenyi le lyopöt pö ma, pespesöy ghatoy kïlïkwï terït le kwïle.

⁷Karam ECHOTYON, ghetin nyinte ompö osiswo nyarïl, Komönöy pich cho soröy nyinte.

⁸Wongöy ECHOTYON pungkachi le puseryon nyo mamïnïng, tyortoy chane kïpa kïmeghö lömïs.

⁹Ompö ne totötekwa tïkwïn cho ghach ompö ECHOTYON? Tïghokwa nyinte owonyenö lömïs, mungöy punyontenyi kïwetïtö akonga!

¹⁰Kïpelöy chane le wuw pö kato, nöghyot le mopö cho kiyomö.

¹¹Ayo, melö so kingwïna kwenungu, we Ninawi, chi nyo kitötöy ghöyïn ompö ECHOTYON, akurur pich kwigh cho merokonye?

¹²Mwochini ECHOTYON pikachi, pipö Israel lö, “Kïrkegh kö owesöch akï chang lö ne pipö Asirya, kïpöröy kupotyö lö weng. Pikachu, kïrkegh atanya le tagh kyochömchan chane kuchopokwa kong, wölo ye molimanye ngat.

¹³Owongan ye nyu owesyo Asirya nyo melö tökïpöytonekwa ngat, ongötiyan sïrïmtin cho kiratenekwa.”

¹⁴Mwoghöy ECHOTYON paraku pipö Asirya lö, “Mösïköcha monïng cho kinono kaynengwa. Onyoran körkeyïntin cho mi korïn cho sogho chane tororötinekwa. Owösinan chane pïrïm ompöwölo ghach nyo makïmïchininye kïsöpchö!”

¹⁵Akwa pipö Yuda, arose! Ketï chi nyo köwolï kutïngkot, chi nyo ipu lökoy cho karamach. Ngwïnöy kïmwowu lö kikerïnta koro Asirya. Kïlenyona ye akwa pipö Yuda, ongörekyenö ompö ichontinekwo. Otönö Tororöt tïkwïn cho kyawalwalakwa lö kitöni. Ompöwölo melö tökupokyini ngat korenkwa pich cho ghach. Kikenyar pïchoni kuwonyö lömïs.