Read pokoot NAUM 3 Bible Online

NAUM 3 - pokoot bible

NAUM 3

¹Mengötunenyinye, we kanasyantanï pïröch morïn akï cheputyon! Kanasyan nyo kinyïghï mökosyö mi kïpsach kesara!

²Atere köny! Köchögh sito kelïm! Keghumonï nkarino poryot cho chutöy angoletinö. Atere kikomtoghtino angoletin, nko kiryöngtogh pö nkaritin cho mi pan!

³Kangwïnta kegh poryeghï cho pegho angoletin ompö poryot. Keryölsyö chokonï, kukwörkwerisyö ngötwö, kuköposisyö mïntïruchtino pich cho kikïpar, muntïruch cho makïrar cho kikwötöy pich!

⁴Munginyi Tororöt we Ninawi, ompöwölo kötöpenyi le chepores, keminanyi kegh ipïchighitï aitïng sakït cho molilöy pich. Atolapay imolilönyi pipö koros aigh kïlïkwï sekeyiku.

⁵Lentöy ECHOTYON Kimuktoghin, “Oreyinyi we Ninawi! Ongonyan cherötöyengu kughegh möt, atolapay opïsyan pipö koros kïtopön chïrutyengu, nöminyi arasï ompö tawu pöyunötin.

⁶Owireninyi sïkon tesïwena lö kyasasinyi nyoman. Oghinyi lïkuna kïgh nyo kïtöngönchini ompö otyogh!

⁷Ryöghöy pich otini kasïwinyi akupölpol kïlentöy, ‘Wechï kiwïr kanasyanta Ninawi! Ekï ngo ye nyo syonchini akï ngo nyo soghsoghöy nyinte nya wey?’ ”

⁸Ayo Ninawi, ilentenyi so ichinyi pïchigh tya kïtïl kanasyanta Tepes ompö paytaghpa Misri? Mi Tepes lalwa Nile kamas akiwit pögh lö tïlkwïch, nayatu pögh nyo ripöy mölïtï pung.

⁹Kikïpaytegha koro Etopya nko Misri kanasyanta Tepes. Ki wow owesyenyi nyo möminye söröm! Akingarak nyinte pipö Lipya.

¹⁰Wölo kïrkegh kilenyoni, kipka pung kïrang pikachi le pïnot Kikïrang kïpa wölo low, aketïghotïgh monekwa kïkörpösisyö mötöwö ompö ortïna kanasyan. Kikïnam akerata sïrïmtin pipö Tepes cho echön, atolapay kïchöghchï kegh.

¹¹Kikany nyi Ninawi, itömösenyi iwanga, aiyar perteghena punköku.

¹²Lekït rulöto nïyet pö kanastinekwa cho otighonekwa kegh, karkegh nko akwa arol cho kirïrö, nyo ato kitimtim ketït, kïchïnchï lödak kuti chi nyo omöy!

¹³Körkör pipö lïkengu le kor ompö poryot. Makïmicha mïrön cho ghetöy pich ato pokï pung. Pelöy ma kari kukoti kanastinekwa lömïs.

¹⁴Akwa pipö Ninawi, oghekwa ne? Arama pögh, atöpï kïpsach ompöwölo kikerikakwa! Okilö nïyet pö kanasyantengwo! Atyakatyaka norayonto mönö nyo kigho mataparen, anagh mat nyo kïpelo matapareni!

¹⁵Wölo kïrkegh agha lenyoni, pelokwa ma owonyenö, akepörokwa ompö poryot. Wonyokwa ngot le talam cho omöy pagh ompö par. Kyoyiyökwa, achangitï le talam, oyiyekwa le kaperon!

¹⁶Kitösisyö mïnchïrïs kwenunkwa, kichangit kïtïl kokel cho mi yïm! Wölo ye nyu, kapa lö weng. Lenye talam cho kangany köpepoy, akupiltoy kïpechi kegh.

¹⁷Karkegh piköku cho echön nko talam, cho lïtöy akïghïpcheghö koghïn ato kaghïtit. Wölo otini kelïwï asis, kupiltoy kïpechï kegh, amöminye chi nyo nkïtu lö kapa onö!

¹⁸Nyi we pöytoghinto Asirya, kikïmeghö yetïntineku, kikïnam rïwöntö nyo pö kokay piköku cho echön! Kitoyechï piköku kutïngkot, puryö chi nyo ghömïtu chane kïpka kaw ngat.

¹⁹Möminye sakït cho muköy kusop moyoköku, metukïnyinye moyochoni kokay! Otini kalïm pich lö kikenyarinyi, röpoköy morïkwa ompö ngörekyö, ompöwölo, ngo nyo mönyorïnye nyarïl, kïrïp kegh nko ighisyewutköku cho ghach nya?