Read pokoot APAKUK 2 Bible Online

APAKUK 2 - pokoot bible

APAKUK 2

¹Oghyongonan wölo oripseghonan, atöpan pancha nyo kogh atotopöntan, asïwan kïgh nyo mwowanïn nyinte, atoyokyan nyinte kini keghanïn ongwïrngwïron.

²Kuyokwanïn ECHOTYON lö, “Kira ngongutyononi aigh kïrumunö keronytin cho kikiröy atökusomönchï kegh chi akïmi kurïpöy.

³Ompöwölo tökïköngöy ngongutyononi osiswechi cho kikïtat. Wölo kelu asisoni lawel akungwïnöy kïyoni oporunyi kïlïku man. Kïkany ato lentöy chi keropï, wölo kanganyi itu nyo mötïny, meropunye.

⁴ Akwanyï ngölyontononi, melö ngötu mwokïyis, wölo söpchot pich cho ghönöy Tororöt ompö kighanatengwa.

⁵“Lïsöy pich sïkönöt memungöcha pich cho nisonchot opoghöch le ngwen akïlata chane meghat nyo melö pïghyongöy. Nka nyoni ghömïtyini kegh puntoni ngwïny kïlïkwï pikökwa kegh.”

⁶Toröy pïchoni kisara pipö Papilon koroswekwa kïsösöy chane akuporï wölo chïmpistoy chane akïmwa lö, “Nkachengakwa kïgh nyo melö könyingwo nya wey! Kïlenyona chopokwa Tororöt kong. Oletekwa tagh olïku sïkön nko oyï otini ochikwa pich cho kïghoku tïkwïn kïtïl chini kipösonenokwa chane?”

⁷Ngetöy lawel pïchoni kasarekwa ropïyenikwa akwighakwa opotonchenö. Atolapay kïsarenakwa tïkukwo.

⁸Kasarekwa puntoni koros cho chang tïkukwa, wölo sörenokwa ye nyu tïkukwo pïchoni tökïsöpchot. Igho kïyoni ompöwölo kyamïltekwa kisön cho chang, apöghisyeghekwa pkatnan ompö pipö punton nko kanastinekwa.

⁹Ochech pich cho sïkönonöy piko korikwa ompö tïkwïn cho kamasa chane pich kïtek korïn cho tïghume atökïkartegha tapan piko korikwa.

¹⁰Kanyïkwïdekwa puntoni walaka, atö kegh arasï, otini kawanyakwa pipö punton, anyar kegh akwane.

¹¹Ompöwölo riryot asïyech koghïn nko ket cho kakïteka korïn akïsöwintönchï chane ighisyewutkökwa cho ghach.

¹²Ochech pich cho teko kestonikwa pörchö akutorö kanasyan nyo wow ghöyityö.

¹³Kigh puntonï cho kyanorakwa ighisyö nyo kimönyorunöcha chane kïgh akwoghochö kwïle, wölo kïpelöy korichoni kitek chane kïtuwit lömïs, ECHOTYON Kimuktoghin nyo ighöy kïyoni,

¹⁴ akï kwïle wölo lumöy pögh cho möngörï nanam kïlenyoni tïkwïl wölo sïchtoy pipö ngwïny kinkïtöto ororyo ECHOTYON.

¹⁵Ochech chi nyo ighöy pöröryenyi kïghegha kölöweto nörekyenyi atökumï kuros nyinte kïmi kïchïrut!

¹⁶Inyorunenyi arasï nyinö kötenyorunenyi konyït. Ghegha nyu nyinte atekwangkwangena le ptamasyan! Onkowunyi ECHOTYON kölöwononi nömo nyinte ewunyi nyo pö tagh atökerat ororyengu.

¹⁷Ketörönyi wudïno Lepanon, törinyi ye nyu pich kiparanyi tyonkïn, otyegheninyi ye nyu chane, akwompö kisön pö pich nko rïmö nyo kikighchï koronete nko kanastine nko pich cho möngöy oringwa.

¹⁸Nyiwu ne körkeyïn nyo kipötöy anta nyo kitongöy otini kakiwany kegh? Menetönye kïgh ighintenyi kïpoto putintön. Nyiwu ne ompö nyinte tökïlentöy oghönöy? Kïgh nyo le tororöt pö putintön nyo memuköy ompö ntökïngalan!

¹⁹Ochech chi nyo lenchini ket anta kogh nyo memuköy ntökïngalan, “Ngeta!” Muköy so körkeyïn ntökïmwowunyi ngölyon? Kïrkegh keluma pich silpa nko koltin kïmelö muköy ntökïmwa kïgh.

²⁰Wölo mi ECHOTYON Konyi nyo tïlil, nya kïsï ngwïnya kïmïkul lasay ompö tawunyi.