Read pokoot SEPANIA 1 Bible Online

SEPANIA 1 - pokoot bible

SEPANIA 1

¹Kingwïnchï ngölyonto ECHOTYON Sepania wero Kusyi ompö osiswo paytaghpa Yosia wero Amon, pöytoghinto Yuda. (Sepania kï pö ara pöytoghin Esekia papoto Amaria. Kiyï Amaria, Kedalia papoto Kusyi). Kilö Echotyon,

²“Opuktenan kïgh anka tïkwïl lömïs ompö ngwïny,

³onyoran pich nko tyonkïn nko törit, awangan kaghagh ompö nanam. Orïntenan mwokïyis, awangan pich lömïs ompö ngwïny. Mwoghöy ECHOTYON.

⁴“Omungan pipö Yerusalem nko Yuda, owongan chi nka tïkwïl nyo soghöy Paal,* angongoghtan kaynötut pö tïsi Paal ompö koronï.

⁵Onyoran chi anka tïkwïl nyo pusöy pörkö akïsagh asis nko arawa nko kokel. Onyoran tïkwïl pich cho soghanïn akuwolwolsyö ompö kaynenyan, atolapay kuwolwolsyö ngat ompö kayna Molek.

⁶Onyoran pich cho yodo kegh löt amelö tökïrïpanïn. Onyoran löwïr cho melö pkonöy akïsomanïn ontöghoghchï chane.”

⁷Kirikï asispa ECHOTYON nyo pö kirwok, kïlenyona, isis chi lasay ompö tawu Echotyon TORORÖT. Kikïsat ECHOTYON amöros akïkur toechi cho kikïl.

⁸Lentöy ECHOTYON asisoni pö amörostanyi, “Omungan yetïntin nko werpö pöytoghin, nyoru sitenyan pich löwïr cho rïpöy asïltino pipö punton.

⁹Otöninan sitöt pich cho soghöy le pipö punton, omungan tïkwïl pich cho nyïghitöy kö pö echotyontengwa tïpö chorsyö nko rïmö.”

¹⁰Lentöy ECHOTYON, “Olïmekwa rira asisoni anyona rira ngwïno Kuka Kaghagh ompö kanasyanta Yerusalem, olïmekwa rira kungwïna kanasyan wölo tökïrel, nko kighumöt nyo ngwïno okumpö kutïngkot!

¹¹Akwa pipö Maktesyi, oriryenö! Ompöwölo kiketïgh mïnchïrïs lömïs! Kikuwonyö pïchay yitöy ropïyen!

¹²Otömenan töpewon asisoni kanasyanta Yerusalem, otöninan sitöt pich cho lïmchini kegh lö kimïchech tïkwïn, pich cho lenchini kegh, ‘Memukönye ECHOTYON kwigh kïgh nyo karam anta nyo gha.’

¹³Kïsöro pïchoni tïkukwa lömïs akewur korikwa. Akïrkegh kïlö kïteköy korïn, mömöngöcha korichoni. Kïrkegh kïlö kïkötkötöy sapipun, mögheghöcha dipay* pö ketichoni.”

¹⁴Kikïrikï asisoni mamïnïng pö ECHOTYON, kikïlekïtit nyoman, anyona kikwitï kukat! Ngwonöch ngala nyoman asisoni, ompöwölo riryot akïmeghö mutïnö ompö chini le nyökon!

¹⁵Lïku asisoni asispa nörekyö, asispa nyarïl nko ngwonïn asispa kiwurat nko kiwonyogh asispa kuruntï nko tuwïn.

¹⁶Kïlïmöy asisoni chöghoto kontin nko rira poryot. Kïporyegho kanastin cho kikiwita nïyet cho koghöch.

¹⁷Lentöy ECHOTYON, “Opchinan pich nyarïl nyo wow ntökïsamsamata or le chepkarotin ompöwölo keghwanïn ngokï. Kipuktoy kisönkökwa le terït, akengïrirtö porwöyikwa le sakat.”

¹⁸Memukönye kïsörï chi silpa nko koltin asisoni pö ECHOTYON, ompöwölo nyoröy ECHOTYON ngwïny kïmïkul ompö nörekyenyi nyo ngwan akuwany lömïs pich cho möngöy ori.