Read pokoot SEPANIA 3 Bible Online

SEPANIA 3 - pokoot bible

SEPANIA 3

¹Heywey Yerusalem! Tighin nyo kisïmnyon ngokï!

²Möterönye amöchömönye kiruröto ECHOTYON! Melö twoytoy kegh ECHOTYON, amörikönye Tororötïnyi.

³Karkegh yetïntinechi nko ngötuny cho mororsot Karkegh muti ngal ompö kokwotïno Yerusalem nko suyï cho sutyote, cho ato nyorï peny mönon, mönyorunye chi ompö nyo le kowö otini kayech.

⁴Putï werkoyichi amöyongönye kïgh amelö pich cho kighönöy. Sïmnyonöy tïsichi tïkwïn cho tïlilöch, akuweng kirurut pö ECHOTYON ompö tösunötengwa kegh.

⁵Wölo pö man ECHOTYON nyo mi kanasyan ori, amelö ighöy kïgh nyo gha. Ighöy man kïtenö osis tïkwïl otini kayekanan, puryö tökwoghö nyo wutyegho kwigh man. Wölo letöy tagh mwokïyis kwighöy ngokï amelö lïmchini kegh arasï.

⁶Lentöy ECHOTYON, “Kopuktan pipö punton ompö ngwïny arultan nïyet pö kanastinekwa kunyorisyö. Puryö chi nyo möngöy anta nyo westegho orinyi.

⁷Atolapay ononchan kegh lö, ‘Konyïtanïn ye nyu ana piköchan akïcham kirurötenyan, nonöy ana tïkwïn cho kyanetan chane.’ Wölo kipïrchï tya ighisyewut cho ghach.”

⁸Kïlenyona, lentöy ECHOTYON, “Akanyanïkwa nyu! Itïtoy ato orwokyinan pipö punton. Kyamutan akonga lö oghömïtunan koros nko pöyunötin atomïlchinan chane nörekyenyan nyo ngwan lakat, nörekyenyan nyo pö sastagh nyo nyoröy ngwïny kïmïkul.”

⁹“Itïtoy ato otïlilan ngölyep pö piköchan kïngalan man, kuranïn akïsaghanïn akïpöghisyewanïn onkït ompö mïkulögh akonga.

¹⁰Pkonchinanïn piköchan cho kitoyechï koro Etopya, pkonöy kïsoghanïn akwipkanïn ropöw.

¹¹Pikachu, melö tolïmchinekwa kegh ngat arasï asisoni, kïrïp kegh nko tighintönenkwa nyo pö tagh. Ompöwölo opuktenan menot kïpegha kwenunkwa amelö tosyolekwa kegh ngat ompö kutïngtanyan nyo tïlil.

¹²Otukyinan Yerusalem pich cho tölose, pich chi rïngöy kegh, pich cho sorwanïn tökïnyorï kalya.

¹³Melö nyu tökwighöy cho ghach pipö Israel cho kingötï, pïstoy putintön nko lïs. Pöghisïyi chane nyo karam, karkegh nko kechir cho oketïyi akïrusot wölo tïghume, akï puryö kïgh nyo muköy kwotyeghö chane.”

¹⁴Nyi we Sayon,* tumö! Tumö ompö ngörekyö kelïm! Nyi we Yerusalem, ngaraka aiturön ompö mïkulöwungu kïmïkul!

¹⁵Kikïmolchï ECHOTYON kamas kirwok nyo könöminyi, akutul pungkökwa löwïr, ompöwölo mi ECHOTYON, pöytoghinto Israel kwenunkwa, möminye nyu kïgh nyo ighokwa owöghisyenö ngat.

¹⁶Kïlenchini asisoni Yerusalem, “Mewöghisïyi, we Sayon! Memïghöy kïchïntin morïn!

¹⁷Mi ECHOTYON, Tororötïngu nko nyi, nyakan nyinte nyo koninyi owesyö rïntena. Ngörökyininyi ompö ngörekyö nyo wow, akï koninyi söpon ompö chomnyenyi nyo mamïnïng, akï ngörökyinyi ompö tum

¹⁸nko turönöt nyo lata nyo pö pipö ichon.” Lentöy ECHOTYON, “Omolchinan kamas nyarïl nyo könyorunyi, nyo melö tökïmi kïgh ngat nyo ighinyi lïmchinö kegh arasï.

¹⁹Omungan asisoni pich cho chopinyi kong, osörunan piköchan cho ngwolsot, oyokunan kaw cho kikitoyö. Owöghökan arasï nyo kötïng chane kïlïkwï konyït, aghan kukus pipö ngwïny löwïr.

²⁰Oghömïtwokwa asisoni apkana kaw, olïkunekwa pich cho ororöch ompö ngwïny kïmïkul, osoyönokwa onyorunö tïkwïn le tagh. Oghan ngalechoni löwïr, asïwïyekwa ompö konyikwo.” Mwoghöy ECHOTYON.