Read pokoot AKAY 2 Bible Online

AKAY 2 - pokoot bible

AKAY 2

¹Kïngalan ngat ECHOTYON könyinoni ompö kuti werkoyon Akay asispa 21 arawa mut nko odeny.

²Kilenchï mwochinö Serupapel pöytoghinto Yuda nko Yoswö Tïsin nyo Wow* nko pich löwïr lö,

³ “Ekïmi chi ompö akwa nyo tökunonöy lö kipïchigh lö ne Kö pö Tororöt atanya le taghï? Osïwïyekwa otï le ye lö nen? Mölatanye kwïle ye?

⁴Wölo kïrkegh kïlenyoni, osïkö nyakanat we Serupapel nko nyi Yoswö nko akwa pipö koronï löwïr atamuka ateka ngat Kö pö Tororöt. Omitan ante ECHOTYON Kimuktoghin nko akwa

⁵kïrïp kegh nko wölo kyoyomiswokwa atanya kyamïtunekwa koro Misri. Kïlenyona, mi mïkulöwunyan nko akwa, nyo mowöghisyö nyonikïny.

⁶ “Otimtiman ngat tömölow yïm nko ngwïny. Otimtiman nanam nko kor nyo tïyame?

⁷Oryewan koros löwïr, akepï sïkönötengwa kïnyïghï konyan.

⁸Silpa nko Koltin löwïr cho mi ngwïny kïtangogh kï chichan.

⁹Pïchighitu nyu tya Konyan nyi rel kïtïl nyo pö tagh akwotoni ato osoyönenan piköchan kïsïch tïkwïn.” Mwoghöy ECHOTYON Kimuktoghin.

¹⁰Kingwïnchi ngölyonto ECHOTYON ngat werkoyon Akay asispa 24, arawa mut nko angwan, könyi odeny nyo pö paytaghpa Daryas lö,

¹¹“Lentöy ECHOTYON Kimuktoghin, atepe tïsï ngölyontonï,

¹²‘Ato ipö chi sïrenyi peny nyo kiketïlil kïpöyit amöros akïpïsï sïre kïswany makatyan anta omisyö nyo kakigha anta dipay* anta mwagh anta omisyö kïsyach, ighöy penyay omisyewutchoni kïtïlilöchitu?’ ” Kïlö tïsï, “Ewo.”

¹³ Kïtep Akay chane ngat lö, “Ato lïkwï chi sïmnyon ompöwölo kanam mïntïrïch akïnam omisyewutchoni, lïku omisyewutkö sïmnyon tïkwïlï?” Kïlö tïsï, “Owöy.”

¹⁴Kïlenchï nyu Akay chane, “Lentöy ECHOTYON, ‘Lenye nyoni tïkwïl pipö koronete nko kïgh anka tïkwïl nyo ighöy chane. Amörostin löwïr cho ipkanïn chane kï sïmnyon.’ ”

¹⁵Atolapay kïlö Echotyon, “Ayata konyïn atasïwena ngal cho ighisyot ompö akwa kïngata ye kughegh tagh. Kïtomö otorökwa teksyonï pö Kö pö Tororöt,

¹⁶kinen wölo kyotöptonekwa nya? Ompö pagh cho kyokönekwa lö kïnyoru kilen 200, onyorukwa 100. Ompö tïramtina sapipun cho kyokönekwa lö ato kïpïr kenyoru liten 100, onyorukwa tömönut angwan kwïle.

¹⁷Kyoyokwan pekat nko rop pö takarïs kunyar kïgh anka tïkwïl nyo kyolentekwa kïkötkötöy, wölo kïrkeghnye choni löwïr, melö kyokötekwa ngokikwo. Mwoghöy ECHOTYON.

¹⁸“Asisete kï asispa 24 arawa mut nko angwan, asis nyo kakiwany kitoröto teksyo Kö pö Tororöt. Akanya nyu tasïwena kïgh nyo igho kïngata ye.

¹⁹Kïrkegh melö tökïmi pagh töpot, akï tomönye kuyin keti sapipun nko makany nko makomanka nko arol, wölo osoyönokwa kïngeta ye.”

²⁰Kingölonchï ECHOTYON ngat Akay asisoni pö 24 arawa mut nko angwan.

²¹Kimwochï lö lenchinö Serupapel, pöytoghinto Yuda, “Lentöy ECHOTYON, ‘Kikïrik ato otimtiman yïm nko ngwïny.

²²Onyoran pöyunötin, awanyan owesyengwa nyo pö poryot. Oryewan nkarinekwa cho pö poryot cho chutöy angoletinö nko ipikwa tïkwïl. Meghot angoletine, kïpara kegh ipikwa chokonikwa kïmeghö.

²³Okoninyi asisoni töpenö ngacharu paytagh, we Serupapel mötworintenyu. Ipöytonenyi ompö owesyo kaynenyan ompöwölo kakïlinyi.’ ” Mwoghöy ECHOTYON Kimuktoghin.