Read pokoot SAKARIA 1 Bible Online

SAKARIA 1 - pokoot bible

SAKARIA 1

¹ Kingwïnchi ngölyonto ECHOTYON werkoyon Sakaria wero Perekia wero Ido ompö arawa mut nko sömök, könyi odeny nyo pö paytaghpa pöytoghin Daryas nyo pö Pasya lö,

²“Kyonörekyan papotïnekwa nyoman.

³Kïlenyona mwochinö chane lö lentöy ECHOTYON Kimuktoghin oyokyanïn kegh, atoyokyok kegh.

⁴Makarkegh nko papotïnekwa cho kïrkegh kirirchï werkoy lö, lentöy ECHOTYON Kimuktoghin, opïstenö ortïn nko ighisyewutkökwo cho ghach, melö kilïm amelö kirïp ngalechan.

⁵Mi onö ye papotïnekwa? Anta werkoy, söpsot kokayï?

⁶Ayo, melö so kinyorï papotïnekwa sitenyan ompöwölo melö kirïp kirurutköchan cho kyotönön kuwerï mötworichan werkoy? Kïlenyona kïkötö ngokikwa akïlö, ‘Kighwecha ECHOTYON Kimuktoghin kïrïp kegh nko otöptinecha nko ighisyewutköcha akïlenyoni wölo kidecha.’ ”

⁷Kingölonwanïn ECHOTYON ompö ara sïwïyagh asispa 24, arawa taman nko akonga, arawa Syepat, ompö könyi odeny nyo pö paytaghpa Daryas.

⁸ Kyasïwan oghö chi nyo weghoy angole nyo pïrir! Kighyongoy kwenu kapïrïmen ompö mpöghogh. Kimi angoletinö walaka cho pïröch nko mïkenöch nko cho relach cho kighyongo lötunyi.

⁹Atepan lö, “Ayo apoy, pö ne angoletinechï?” Kïlenchanïn malaykayan, “Mïdena toporun.”

¹⁰Kïlenyona kïlenchanïn chichay kighyongoy kwenu kapïrïmen, “Chï kï angoletin cho kiyokwï ECHOTYON kïmarar ngwïny.”

¹¹Atolapay kïmwochï angoletinechay malaykayantanay kighyongoy kwenu kapïrïmen lö, “Kikemarara ngwïny kïmïkul akenyorucha lö kitöpö kïpayas.”

¹²Kïlö malaykayan ECHOTYON, “We ECHOTYON Kimuktoghin, inörekyinenyi nko oyï pipö Yerusalem nko kanastina Yuda, chï kinörekyinyi könyis 70 amesyonchï?”

¹³Kuyokyï ECHOTYON ompö kut nyo karam akutö kikönöt.

¹⁴Atolapay kïlenchanïn malaykayan, “Mwatïtena ompö kut nyo wow lö lentöy ECHOTYON Kimuktoghin, ochan söstoghin nyoman ompö Yerusalem nko Sayon.*

¹⁵Ochan narekat nyoman ompö punton cho kimang kïkalyan, ompöwölo nko kimïnïng sitöt nyo kyotönön piköchan, wölo kipka puntonï kïtas kïyetï tya.

¹⁶Kïlenyona, osyonchinan ngat kanasyanta Yerusalem aketek Konyan ngat nko kanasyante tïkwïl.

¹⁷Atolapay kïlenchanïn ECHOTYON Kimuktoghin, mwatïtena ngat lö, nyïghiti sïkönöt ngat kanastinechan. Oghan kanasyanta Sayon kïngarak ngat akïlchan kegh Yerusalem ngat.”

¹⁸Osyolön nyu konyïn asïwan kuy angwan.

¹⁹Olenchan malaykayan nyo kingölonöy nko ani, “Pö ne kuyechï?” Kïlenchanïn, “Kuyechï kï koros pö ngwïny cho kipka kutoyö pipö Yuda nko Israel nko Yerusalem ompö korengwa.”

²⁰Atolapay kuporwanïn ECHOTYON kitongï cho le angwan.

²¹Atepan nyinte lö, “Kapka pïchï kwigh ne?” Kïlenchanïn, “Kapka kwotyeghö akunyar koros cho owesöch cho kipka kïpar Yuda akutoyö chane.”