Read pokoot SAKARIA 11 Bible Online

SAKARIA 11 - pokoot bible

SAKARIA 11

¹Yata kukotiku we Lepanon, atökïpel ma tarakitköku lömïs!

²Akwa saypras, olokyenö asönön! Ompöwölo kikerul keti tarakit! Kikenyar ketichay pö tösunöt nyo wow! Akwa keti apeta cho omi koro Pasyan, oriryenö! Ompöwölo kiketör ket kuwonyö ompö wuw nyo kidïrö.

³Atere sönönöto pöytoghi piköchan, riryot ompöwölo mi nyarïl kikunyara kïgh anka tïkwïl nyo kökwolo kegh! Atere tïlöto ngötunyi Kikenyar wudïno lalwa Yordan, korikwa cho möngöy!

⁴Kïlenchanïn ECHOTYON Tororötïnyan, “Omökan lïkunanyi mösöwonto kechir cho kïpetöy keyengöy.

⁵Mutöy mïnchïrïsyonta kechenyi kat amelö nyoru sitöt. Akwotini kalta panya kechanay kïlö, ‘Nya kïsala ECHOTYON! Wechï kosïkönön!’ Mesyonönye ompö nyini le mösöwonto kechir!

⁶Omwoghan ante ECHOTYON lö, melö tosyonchinan ngat pich cho mi ngwïny. Otöninan chi anka tïkwïl mori chitö anka, atönön pich mori pöytoghintengwa. Nyoröy nyu chane ngwïny amelö ongwïnan osöruno chane morikwa.”

⁷Kïlenyona achaman alïkwï mösöwonto kechir cho pö yengsyö ompöwölo kikiranïn kyomïnchan kaynötut. Kyokuran akonga “Pöropchö,” okuran nyinö anka, “Ghömïchö,” ayakwïyan kechiryechay.

⁸Kïkany kuwer arawa akong, otïghön mösöw walaka cho ghach cho le sömök. Kimamukanye ngat omïkukön nko kechirye akïnget ompö kïtaghanïn,

⁹kïlenyona olenchan, “Melö tochan ngat mösöwontenkwa. Nyo kömeghöy kïma, nyo kenyoroy kunyara! Kwam kegh cho köngötï!”

¹⁰Atolapay oriyön lïkïyay kyokuran “Pöropchö,” kuporï lö kikïngat muma* nyo kyam ECHOTYON nko pikachi,

¹¹akïngat asisoni lenyoni. Kirosanïn mïnchïris pö kechir, akïpköchï lö kingölonchini chane ECHOTYON ompö tïkuchini kyoghan.

¹² Atolapay omwochan chane lö, “Okonanïn ropïyenichu ato ochömekwa, wölo ato mochömekwanye akany kïtïpï.” Kïcham akupimwanïn ropïyenichan kerpes tömönut sömök cho pö silpa.

¹³Atolapay kïlenchanïn ECHOTYON, “Tönö ropïyenichoni köröpo Kö pö Tororöt.”* Kigham ropïyenichoni pöghisyö nyo kyaghan. Kïlenyona achengan ropïyenichay le kerpes pö silpa tömönut sömök, atö köröpo Kö pö Tororöt.

¹⁴Kïkany kumuchö, oriyön lïkïyay anka kyokuran “Ghomïchö,” akïngat lenyoni ghomïchö kwenu Yuda nko Israel.

¹⁵Atolapay kïlenchanïn ECHOTYON, “Omökan ngat ighanyi kegh le mösöwon nyo le karsang.

¹⁶Ompöwölo oyokunan mösöwon nyo möyongönye kechir cho ketongu nko cho kepotyö nko cho ngwolsot. Meyokwïyönye ompö chini karamach putö, wölo ngetöy kwomöy kechirye cho okwoghöch ametukönye ompö putïlöyi!

¹⁷Heywey mösöwon nyo le karsang! Kapakada kechir kïpa opïn! Nya kïtör chok ewunyi akïrït kontanyi nyo pö ewu tagh, Nya kïsipa ewunyi akïkor kontanyi nyo pö okumpö tagh!”