Read pokoot SAKARIA 13 Bible Online

SAKARIA 13 - pokoot bible

SAKARIA 13

¹Lentöy ECHOTYON Kimuktoghin, “Kïyotyini asisoni kompö pögh pipö ara pöytoghin Daudi nko pipö Yerusalem nyo mwötöy ngokï nko sïmnyontengwa.

²Ongongoghtenan asisoni kaynötut pö körkeyïntin cho soghöy pich kewutyeghö. Opuktenan pich cho ighöy kegh lö kïchï werkoy nko cho soghöy körkeyïntin kïpegha kor.

³Kïkany kunomchï chi kegh lö ochï werkoyon, kïmïchini kïmwochï kwanta nko kame, chini kiyï nyinte lö, ‘Mïchini ketïghinyi ompöwölo kemwaghanyi putintön ompö kayna ECHOTYON.’ Atolapay kïpara chok chichay yiyichi atotösöy tagh kïngoröy ngal.

⁴Nömöy arasï osiswechoni werkoyon ompö sïwïyaghtinechi otini mwochini pich. Melokönye sampu werkoyon atökïlïs pich lö ochï werkoyon.

⁵Wölo mwoghöy anka tïkwïl lö, ‘Melö ochan werkoyon, ochan ngorinto par akyongorsyan kïngata otini kyochan mïnïng.’

⁶Kïkany ketep lö, ‘Ayo, pö ne moyochï mi pataghungu?’ Kïlö, ‘Kyonyorchan kato kongotichan.’ ”

⁷ Lentöy ECHOTYON Kimuktoghin, “Ngeta we chok, para mösöwontenyan! Tïghö nyinte nyini pöghisyechinanïn. Para mösöwonte kïtoyö kechirye.

⁸Oghïtenan ewunyan apar piköchan cho nyörkölöl ompö pich sömök, meghsot cho le odeny.

⁹Otïlilenan ma pich cho kingötï, le wölo kitïlilöy koltin anta silpa. Kuranïn nyu chane atoni akïsaghanïn, angitönchinan chane. Omwochinan chane lö, ‘Ochikwa chichan,’ kïlenchanïn chane, ‘ECHOTYON kï Tororötïncha.’ ”