Read pokoot SAKARIA 14 Bible Online

SAKARIA 14 - pokoot bible

SAKARIA 14

¹Arosa, kikïrik asispa nörekyo ECHOTYON! Pkonöy pung kïchengöy tïku kanasyanta Yerusalem akïchöghchï kegh kurosu chane.

²Ghomïtu ECHOTYON pipö koros löwïr kïpka kïporyeghö kanasyanta Yerusalem. Kïchengo tïku akelölos koru akerang lö tïch kïpa pïnotön kudong chinö walaka kanasyan.

³Atolapay kïwö ECHOTYON kïporyeghö pipö koroschoni le wölo ighöy su asispa poryot.

⁴Ghyongo nyinte asisoni kutïng pö Arol nyo mi okumpö kongasis nyo pö kanasyanta Yerusalem. Köreroy asisoni kutïng pö Arol kwen ompö mpöghogh nyo tapes kïngeta kongasis ntökwit ta. Mi karerane akong kuntoka kïmi anka kumporö.

⁵Oryöghekwa oweröy mpöghoghyonï köreröy kutïng pö ECHOTYON. Oryöghekwa le papotïnekwa ato kichïwïtyeghö korïngring osiswo pöytoghin Usia nyo pö Yuda. Atolapay kuchumï ECHOTYON, Tororötïnyan nko pich löwïr cho tïlilöch.

⁶Melö tökïmi osiswechoni osiswo kaghïtan anta powöy.

⁷Lïku korö pöghet amelö osis ne choni.

⁸ Yintegho pögho söpon Yerusalem osiswechoni. Yintoy lö karerana kutang nanampa Paryan, kuyinta chinö kutang nanampa Kwen. Yintoy lenyoni osiwo kömöy nko pengat.

⁹Lïku nyu ECHOTYON, pöytoghinto ngwïny kïmïkul akïlïku nyinte Tororöt onkït akesoghöy nyinte onkït.

¹⁰Lïku kore kïtangogh mpöghogh kïngeta Kepa, nyo mi Yerusalem kuntoka ntökwit Rimon nyo mi kumporö. Wölo töpo kanasyanta Yerusalem ato syolote kïngeta Kuka Penchamen, kuwer ato kimi asistanka nayatu Ananel nyo kiwo chak ntökwit wölo kïryöko dipay* pö pöytoghin.

¹¹ Möngisïyi pich Yerusalem ompö kalya ompöwölo melö tökïchïpote.

¹²Wölo ompö pich cho kipka kïporyeghö Yerusalem, achï nyörilwok cho nyoru. Nïniot kïmi takol akï nïniö ngölyepwö ompö kutïwekwa.

¹³Wiro ECHOTYON chane asisoni mïghö nyo wow ntökïporyeghö kegh akwane.

¹⁴Poryot pipö Yuda atökïrip kanasyanta Yerusalem ompö pung. Kisupuy sïkönöto pipö koros löwïr cho le pöröris pö Yuda. Kisupuy koltin nko silpa nko sïro cho möngörï.

¹⁵Nömöy tïkwïl sömewö nyo gha angoletin nko nyumpun* nko tamasay nko sïkïröy nko kïgh anka tïkwïl nyo sapul ompö kestoni pung pö Yuda.

¹⁶ Atolapay rotuy nyu Yerusalem ompö könyis löwïr pipö koros cho kingotï ompö pïchay kipka kïporyeghö Yerusalem. Pkonöy kïsoghöy ECHOTYON Kimuktoghin nyo le pöytoghin akïkonyït Ichon pö Tunkun.

¹⁷Ato tagh koro kïwö kïsagh ECHOTYON Kimuktoghin nyo le Pöytoghin ompö Yerusalem, kupotöy rop ompö korononi.

¹⁸Ato tagh pipö Misri kïkonyït Ichon pö Tunkun, kwomöy chane sömewonay kitö ECHOTYON koros cho kitagh kïkonyït ichononi.

¹⁹Nka nyoni nyu sitöt nyo nyoru pipö Misri nko koros löwïr cho melö konyïtöy Ichon pö Tunkun.

²⁰Kikirchini osiswechoni pemwoy cho kïrotini angoletin lö, “Kiketïlilchï ECHOTYON.” Tïlilöchitu karïn ompö Kö pö Tororöt* lata otupöy cho mi ato kïpelo amöros.

²¹Kitïlilchini ECHOTYON Kimuktoghin tören löwïr ompö kanasyanta Yerusalem nko koro Yuda atokumï pich kughogha panya amörostino ECHOTYON. Ato itïta osiswechoni, melö tökïmi mïnchïrïsyonta kokay nyo ngotu ompö Kö pö Tororöt Kimuktoghin.