Read pokoot SAKARIA 3 Bible Online

SAKARIA 3 - pokoot bible

SAKARIA 3

¹ Atolapay kuporwanïn ECHOTYON ompö sïwïyagh, Yoswö, Tïsin nyo Wow kughyongo tawu malaykayanta ECHOTYON. Kighyongo Onyötö Yoswö okumpö tagh akimi kïpsach kwipï kigheghchinogh paraku Yoswö.

² Kïlenchï malaykayanta ECHOTYON Onyöt, “Nya kïchïpïn Tororöt we Onyöt! Nya kupkongïn ECHOTYON nyo kikïlchï kegh Yerusalem! Mökörönye kegh chichï nko kwenta nyo kökïsörunö ma nyo nöghöyï?”

³Kighyongo Yoswö tawu malaykayan akuloköy sïro cho le sïmnyon.

⁴Kïlenchï malaykayan mötworichi cho kimi tïkwïl, “Angwïsena nyinte sïrochona le sïmnyon.” Akuyokï kïlenchï Yoswö, “Rose kopuktan ngokiku kïpa. Olokunyi ye sïra nyo pö olyot nyo wow.”

⁵Atolapay kuyokï kïlenchï mötworichi, “Olokyinö nyinte sïra nyo le kopiyö.” Kwigh mötworichay lenyoni akulokyï tïkwïl sïrochay kurosu malaykayanta ECHOTYON.

⁶Atolapay kïlenchï malaykayan Yoswö,

⁷“Lentöy ECHOTYON Kimuktoghin, ato irïpanyi ortïnechan aigh pöghisyenyan lenyini komwowunyi oghinyi lïkuna tïsin nyo ghyongchini Konyan ori nko santa tïkwïl. Ochömunyi nyonö ghyongenö tawunyan le malaykenichï mi yi.

⁸ Tera nyu we Yoswö, Tïsin nyo Wow nko akwa tïsi walaka cho opöghisïyi tïkwïl! Ochikwa kiporunöto köromnyö nyo pö osis cho tökïpkonöy. Opkokwa mötworintenyan nyo kïkuro Morïn!

⁹Otöninan ante ECHOTYON Kimuktoghin tawu Yoswö kogh akonga nyo tïng woptin mut nko odeny. Okiran ompö kïgh nyo ngatip koghoni, apuktan, ompö asis akonga kwïle, ngoki koronete.

¹⁰ Kuröy chi anka tïkwïl asisoni pöröryenyi kïngörokyï kalya nko payasat ompö rurwo keti sapipun nko mitini ompö parenyi.” Mwoghöy ECHOTYON Kimuktoghin.