Read pokoot SAKARIA 7 Bible Online

SAKARIA 7 - pokoot bible

SAKARIA 7

¹Kingwïnchanïn ngölyonto ECHOTYON asispa angwan, arawa mut nko akonga, arawa Kislep, köny odeny nyo pö paytaghpa pöytoghin Daryas.

²Kikikuyoktö atoni pipö kanasyanta Petel Syareser nko Rekemeleki nko pikökwa kïpa kïsagh ECHOTYON kisoyonöt ompö Kö pö Tororöt*

³akï tep tïsï nko werkoy ompö Kö pö Tororöt Kimuktoghin lö, “Mïchinecha ketasa tagh kesönönö akekïrur le wölo kikighecha ompö könyis cho chang otini ketomtö arawa mut nya?”

⁴Kungwïnchanïn ngölyonto ECHOTYON lö,

⁵“Lentöy ECHOTYON Kimuktoghin, mwochinö pich löwïr cho mi kor nko tïsï lö, ‘Kyosönönekwa, akïrur ompö arawa mut nko arawa mut nko odeny ompö könyiswechaye kewer le 70 wölo melö kyaghakwa lenyoni ompöwölo kyokonyïtanïkwa.

⁶Ayo, melö so kyomisïyekwa agheghsyö akwompö mutïnekwa kegh?

⁷Nka chete ngal cho kïwow mökosyo kanasyanta Yerusalem akïchang pich cho kimöngöy. Kichang tïkwïl osiswechoni pich cho kimang kanastin cho kilekïtino Yerusalem, kumporö nko ta nko okumpö koro Nekep* nko tömköyi Syepela.’ ”

⁸Kingwïnchï ngat ngölyonto ECHOTYON Sakaria lö,

⁹“Lentöy ECHOTYON Kimuktoghin, omutyinö pich ngala man. Oghchinö kegh akwane nyo karam, asyonchï kegh.

¹⁰Mopïr mïsïktin nko pönon nko to nko mey ompö kwenunkwa. Orip kegh motötyï kegh akwane ghöyïn ompö mïkuliskökwo.

¹¹“Wölo melö kiterwanïn piköchan. Kilïkwï tighï akïkar yitikwa tömalïm ngalechan.

¹²Kigh chane mïkuliskökwa kwowïwitu le koghïn ntömalïm kirurut pö ECHOTYON Kimuktoghin cho kyomwochan kuwerï werkoy cho pö tagh. Kïlenyona onörekyan chane nyoman,

¹³amwaghan ante ECHOTYON Kimuktoghin lö, kïle wölo melö kiterwanïn otini kyokurön chane, kïmelö oterchinan ato kuranïn.

¹⁴Atolapay akutïtan chane kïtoyechï koros le pïpïch nyo kutöy samï. Kipa nyu le pïnot koros cho kimenkïtnye. Nka nyoni kiwaghaka korengwa nyï karam le nyï kïlïkwï surkwen ompöwölo kitö kïmang ngo?”