Read pokoot MALAKI 3 Bible Online

MALAKI 3 - pokoot bible

MALAKI 3

¹ Lentöy nyu ECHOTYON Kimuktoghin, “Arosa, oyonunan kiyoktoghintenyan kungwïn kïsötwanïn arenyu. Kïnyini kïrumunö ECHOTYON nyini koyörekwa Konyi. Ngwïnöy kiyoktoghintononi okönekwa ompö emö nyo wow akïmwatïta ngala mumenyan.”

² Wölo, ekïngo nyu köny nyo köngöy asisoni ngwïnöy nyinte? Ekïngo nyo lentöy oghyongöy, akany otini chumu nyinte? “Karkegh nyinte nko ma nyo ngwan nyo pelöy nyïngwïtyan ntökïyï karïn akï karkegh nko sapuni nyo kiwunö sïro.

³Ngwïnöy nyinte kurwokyini pich le chi nyo wunöy akutïlil silpa. Tïlilöy pipö ara Lawi cho le tïsï atökumï kwipchï ECHOTYON ropöw cho tenote.

⁴Ngörokyini nyu atoni ECHOTYON ropöwo amörostin cho ipchini nyinte pipö Yuda nko Yerusalem le wölo kilata tagh.

⁵“Ongwïnchinokwa atorwokyan ponï nko cheporestin nko cho tötoy söwintön nyo pö putintön nko cho moso pich cho kekir ropïyenikwa nko cho yonöy mïsïktin nko pönon nko to nko pich löwïr cho melö konyïtanïn.

⁶“Ochan ECHOTYON amelö owöghökonan. Nka nyoni nyu, we akwa pipö ara Yakopo, tomönye owonyenökwa lömïs.

⁷Kïngeta osiswo papotïnekwa melö kitö arïpakwa kirurutköchan. Kïlenyona oyokunö kegh wölo omitan atö oyokwan kegh wölo omikwa. Wölo otepekwa lö, ‘Kiyokucha kegh wölo iminyi lö ne?’

⁸Wölo otepokwa ye nyu lö, ‘Ayo, karam kïchor chi Tororötï? Ewo, mökaramnye. Kïlö ne nyu tachoranïkwa?’ Wölo otepekwa lö, ‘Kakïchorichanyi ompö or ne?’ Kachoranïkwa ompö ropöwo kareranpa taman nko ropöwe walaka cho opkanïkwa.

⁹Kikechïpokwa ye nyu nko kore kïmïkul ompöwölo kachoranïkwa.

¹⁰ Opunö töpotenyan ropöwo kareranpa taman löwïr tökïmi Konyan omisyö atyamanïn nyu. Mwoghöy ECHOTYON Kimuktoghin. “Ato aghakwa lenyoni, oyotwokwa tïrisyeni yïm, akonokwa kisoyönut cho möngörï.

¹¹Opkongan ptölök mam pagh nko omisyewut walaka cho mi parenikwa. Yinöy keti sapipun akwa nyo mötïny.

¹²Kurokwa nyu atoni pipö ngwïny kïmïkul lö, ‘Pich cho soyönote,’ ompöwölo lïku korenkwa kor nyo pïrchini pich kïmang.” Mwoghöy Echotyon Kimuktoghin.

¹³Lentöy ECHOTYON, “Kamwaghakwa ngal cho ghach nyoman parakunyan. Wölo otepekwa lö, ‘Akï ngal ne cho kakïmwaghacha parakungu nya?’

¹⁴Otï kamwaghakwa lö, ‘Kwïle nyoman kepöghisyechï ECHOTYON. Nyiwu ne kegh kïgh kïrïp kegh nko kirurut pö ECHOTYON Kimuktoghin ata kelokyotö kuporï lö kikelelacha ompö tawunyi?

¹⁵Lentöy chi pich cho kisoyönöy kï pich cho le menet. Pich cho le mwokïyis cho kisoyönöy akï kïrkegh kïtyam chane Tororöt, puryö kïgh nyo kidoy chane.’ ”

¹⁶Atolapay kïngölonchinö pich cho kiwöghöy ECHOTYON. Kïter nyinte akïlïm ngalanengwa atolapay, ompö tawunyi, kekirchï kitapu kinanat kaynötut pö pïchoni kiwoghöy ECHOTYON akïkonyïtöy kaynenyi.

¹⁷Mwoghöy nyu ECHOTYON Kimuktoghin lö, “Lïku chane piköchan. Lïku pich cho kokïlchan kegh ompö asisoni kamwaghan lö owetöy oghöy kïgh. Osyonchinan chane le wölo syonchini papo werïnyi nyo pöghisyechini nyinte.

¹⁸Pkönchinokwa nyu ngat asisoni lö mi sisïn kwenu pipö man nko mwokïyis nko kwenu chi nyo pöghisyechini Tororöt nko melö pöghisyechini.”