Read pokoot MATAYO 13 Bible Online

MATAYO 13 - pokoot bible

MATAYO 13

¹Kïngeta Yeso köyoni akïwö kutang sörömu nanam, kumpur wölini akunetisyö.

² Ki wow nyoman söpïch nyo kituyechï wölini ntökwigh nyinte kïwö kïpus meli, kumpur söpïchay sörömu nanam.

³Kïpöghisyeghö Yeso körkeyïntin kuneta pïchoni tïkwïn cho chang. Otini kinetisïyï kïlenchï, “Kimito chi nyo kiwö kïleta kösïgh.

⁴Otini kilechini parenyi kösïgh, kïchïnchini walaka arawet, kipka töritwö kwam.

⁵Kïchïnchï wölo le walaka koynot wölo kimïnïng nyïngwïtyanta, kïghya kösïghechay lawel ompöwölo kimïnïng nyïngwïtyante.

⁶Kïkany kulïwchï asis kïpel paghechay mïnkech ompöwölo kitomöcha kïröytö ighinkökwa ngwïny lasiny, kïsilonchö.

⁷Kïchïnchï kösïgh walaka kwenu kato, kïpit katochay akwam paghechoni.

⁸Wölo kïchïnchini kösïghe walaka nyïngwïtyan nyo akwagh kuyin nyoman. Kuyin walaka kïnyïl 100, kuyin walaka kïnyïl 60, kuyin walaka kïnyïl 30.”

⁹Kuwany Yeso lö, “Ato itïng chi yitïn cho ilïmo, ilïm!”

¹⁰Kïpa kinetankachi akïtep lö, “Kölö ne tengölonchinenyi pich ompö körkeyïntin nya?”

¹¹Kuyokyï Yeso lö, “Kikekonokwa kinkïtöt nyo pö wïngut pö Pöyunöto Yïm, wölo tomönye keporchï pich walaka.

¹² Ompöwölo ato tïng chi kïgh ketösyini walaka atökïnyorï cho chang tya, wölo ato mötïnye chi kïgh kechengo ompö nyini kötïng.

¹³Nka nyï ongölonan nko chane ompö körkeyïntin, ompöwölo rosöy chane, wölo mösïwïyicha kïgh akïteröy, wölo mölïmöcha anta pköchï kïgh.

¹⁴ Kïpïntö nyu ompö chane ngala cho kingor werkoyon Isaya lö lentöy Tororöt: ‘Olïmekwa ngal kïle wölo melö pköchinokwa kïgh, arosekwa kirosat kïle, wölo mösïwïyekwanye kïgh.

¹⁵ Ompöwölo kiwöngisyö mötöwöyi pïchï, kïminyö chane lö tïkïrkïr akïköryö konyikwa, tömöyotisyö konyïn akurosïta akïyotisyö yitïn akuyokyanïn kegh tosopön chane.’

¹⁶ “Wölo soyönote konyikwa cho rosïtoy akusoyönote yitikwa cho lïmöy kïgh.

¹⁷Omwowokwa nyoman lö kimököy werkoy cho chang nko pipö man lö tökïsïwa tïkuchï osïwïyekwa, wölo melö kïsïwa chane akïlö tökïlïm ngalechï olïmekwa, wölo melö kilïm chane.

¹⁸“Atere nyu körkeyïn pö letoghin.

¹⁹Ato lïm chi anka tïkwïl ngala Pöyunöt ameghanye, kïkarkegh nyinte nko kösïghecha kichïnchini arawet. Itu nyu Mwokïyontonay gha kïsara nyinte ngölyontonini kikïlechï mïkulöwunyi.

²⁰Kïkarkegh kösïghe chinö kikïlechï wölo le koynot nko chi nyo teröy ngölyon ompö ngörekyö otini kalïm nyo tagh.

²¹Wölo mölïtönye ngölyonte orinyi lasiny, ghyongtoy osis cho ngörï, wölo ato itï kisusut anta kichopata kong ompö ngölyontonï, kïpïstö lawel.

²²Kïkany kösïghe chinö kichïnchï kwenu kato, kïkarkegh nko chi nyo lïmöy ngölyonto Tororöt, wölo otini ketï sïngut pö ngwïny nko chamata sïkönöt kwam nyu ngölyontonay, amelö kitö kuyin akwa.

²³Kïkarkegh kösïghyonte nyo kikïlechï nyïngwïtyan nyo akwagh nko chi nyo lïmöy ngölyonto Tororöt akïpköchï, kuyinï akwa, yinöy kösïghyonte akong kïnyïl 100, kuyin anka 60 kuyin anka tömönut sömök.”

²⁴Kïmwochï Yeso chane körkeyïntö anka nyo kilö, “Karkegh Pöyunöto Yïm nko chi nyo kilechï parenyi kösïgh cho karamach,

²⁵wölo ato mi oghö kwen, kungwïn punyontenyi akïlechï sekut kwenu kösïghechay akïwechï kegh.

²⁶Nyini kighya kösïghechay akuyinï pagh, kïpityö sekut tïkwïl.

²⁷Kïtep pïchay kikatkat chito pare lö, ‘Echotyon, melö so kikatkatanyi kösïgh cho karamach parengu, kïpkana onö sekutchï?’

²⁸Kuyokyï nyinte lö, ‘Punyon nyoni kegh lenyoni.’ Kïtep mötworichay lö, ‘Imökenyi ye kepecha kengaghatena?’

²⁹Kuyokyï lö, ‘Ewo, ompöwölo omukekwa ongöghe paghe tïkwïl otini ongöghtokwa sekut.

³⁰Akanya kïtïpï ntökïtenö kwitïta asispa ilö, olenchinan nyu ilï, kïnya kïghamït sekut akïratarat kïlïkwï rötutöy atökepel, wölo kïghömïtyï paghe töpotenyan.’ ”

³¹Kimwochï Yeso chane körkeyïntö anka nyo kilö, “Karkegh Pöyunöto Yïm nko kösïghyonto ket pö aradali nyo kikötkötyï chi parenyi.

³²Mïnïng kösïghyonte kïtïl kösïgh löwïr, wölo otini kapit, kï wowitu kïtïl ket löwïr akïlïkwï ket nyo wow nyo pkonöy töritwö kïteköy korikwa morichi.”

³³Kïmwochï Yeso chane ngat körkeyïntö anka nyo kilö, “Karkegh Pöyunöto Yïm nko pïsya cho pö depen odeny cho kicheng korka akutuyö nko mumar ntö kïkutï löwïr.”

³⁴Kipöghisyeghö Yeso körkeyïntin kuneta söpïchis ngalechi löwïr akimömwochïnye chane kïgh kwïle, kïpoto ompö körkeyïntin.

³⁵ Kigh lenyoni atökïpïntö ngölyon nyo kimwa werkoyon lö, “Opöghisyeghonan körkeyïntin otini ongölonchinan chane, omwochinan chane tïkwïn cho kikïwïng kïngeta otini le towunöto ngwïny.”

³⁶Atolapay kïpïstö Yeso söpïchnay akïlït kö. Kïpkonchï kinetankachi akïlenchï, “Porwecha köny lö netöy ne körkeyïnay pö sekut kimi par.”

³⁷Kuyokyï Yeso chane lö, “Chichay kileta kösïgh cho karamach kï Wero Chi,

³⁸pare kï ngwïny, kösïghechay karamach kï pich cho le nyingwa Pöyunöto Tororöt, wölo sekut kï pich cho pöyitu Onyöt

³⁹akï punyonte nyini letoy sekutkö kï Onyöt. Ile kï sörömu kiwonyogh pö ngwïny, ilï kï malayken.

⁴⁰Kïle wölaye kïghömïtïtoy sekut akepel, kïlïku nyoni ompö asispa Söröm,

⁴¹yontoy Wero Chi malaykenichi kïpa kïghamït pich kïngetunö pöyunötenyi chane löwïr cho mïtyini pich ngokï nko mwokïyiskö walaka

⁴²akïwirchï ma nyo monïng, riryegho chane wölini akïnyagha kelat.

⁴³Atolapay kulïwï pipö Tororöt le asis ompö Pöyunöto Papongwa. Ato itïng chi yitïn cho ilïmo, ilïm!

⁴⁴“Karkegh Pöyunöto Yïm nko kaplawach nyo kikïwïnchï par. Kitöp chi ntökïnyorï atolapay kïwïng ngat. Ki wow ngörekyenyi nyoman nyo kimï kïwö kwalta tïkuchi löwïr cho kitïng akwal paranini.

⁴⁵“Akïkarkegh ngat Pöyunöto Yïm nko chi olin nyo yörotoy karin cho pïchighöch.

⁴⁶Nyo otini könyorï akonga nyo pïchigh tya, kïwö kwalta tïkuchi löwïr cho kitïng akwal karichini.

⁴⁷“Akïkarkegh ngat Pöyunöto Yïm nko net nyo kïnömo kaghagh nyo kakitö nanam tökïghamït kaghagh kïsyach.

⁴⁸Akwotini kinyïghï, kïpa nömi kaghagh kuchutï kungwïn sörömu nanam akumpur ngwïny kupar kaghaghe, töni kaghaghe cho karamach köröponikwa, kïlasta chinö ghach.

⁴⁹Lïku nyoni otini le sörömu ngwïny. Pkonöy malayken kïtöröy pich cho ghach nko pich cho karamach,

⁵⁰akïwirchï chinö ghach ma nyo wow. Riryegho wölini, akïnyagh kelat.”

⁵¹Kïtep Yeso chane lö, “Kopköchokwa ngalechï löwïr nya?” Kuyokï lö, “Owöy.”

⁵²Kïlenyona kïlenchï chane, “Poru nyoni lö konetinto kirurut anka tïkwïl nyo lïku kinetana ngala Pöyunöto Yïm, kï karkegh nko chi nyo chenguno konyi tïkwïn cho relach nko cho pö köny kïpkana kaplawachtanyi.”

⁵³Kïkany kuwany Yeso kïmwochini pich körkeyïntin, kïngeta atoni

⁵⁴akïmïla korenyi kunetisyeghö sinakokin, kïtangany pich cho kilïm ngalechi, kïtepsyö lö, “Kinyorchï onö chichï ngöghomnyonï nko ighisyewutchï pö töngönchin?

⁵⁵Möweronye so chichay le ighöy tïpö mpawtin nyete? Ayo, melö so kame Marya, akï werkökwa ompö Yakopo nko Yosep nko Simon nko Yudas?

⁵⁶Akï mömicha tipikwa löwïr wölete? Kï kisïkö onö nyu nyinte ngalechï löwïr?”

⁵⁷ Kïlenyona kïchuniö akïtagh ngalechi. Wölo kïlenchï Yeso chane, “Kïkonyïtöy werkoyon ompö wop anka tïkwïl, wölo melö ompö korenyi nko ompö konyi.”

⁵⁸Amelö kitökwigh wöloni ighisyewut pö töngönchintin cho chang ompöwölo kimötïngcha chane kighanat.