Read pokoot MATAYO 14 Bible Online

MATAYO 14 - pokoot bible

MATAYO 14

¹Kilïm osiswechoni Erode ngala Yeso nyo kile pöytoghinto Kalilaya.

²Kïmwochï nyinte mötworichi lö, “Yoana Kipatisanin nyini nyo mötïny, nyo ketutï nyinte. Nka nyï ighisyewut pö töngönchin.”

³ Ki Erode nyo kïmwatïta kenam Yoana aketorchï chela, kigh lenyoni ompö ngala Erodiya korketo werïngwa Pilipo.

⁴ Ompöwölo kimwochï Yoana Kipatisanintö Erode lö, “Melö mïchininyi ipe nyinte.”

⁵Kïmach Erode kïpar Yoana, wölo kiwagh pipö Yaudi cho kighan werkoyon Yoana lö.

⁶Kikany ato kimi pich ichonto yiyo Erode, kïpirön chepö Erodiya ompö tawu pich kïmïkul. Kïngarak Erode,

⁷ntökuyomis cheptanyi ompö muma lö, “Okoninyi kïgh anka tïkwïl nyo kemwaghanyi!”

⁸Kurur kame cheptanyi lö lenchinö Erode, “Konante möt pö Yoana Kipatisanin ompö otupö nyete le ye!”

⁹Kwotyö pöytoghinto, wölo ompö kiwalwalatenyi nyo kimwa ompö tawu toyechi, kïmwatïta keghchï chepini machatenyi.

¹⁰Kuyoktö nyu kepa kedïng Yoana möt ompö chela,

¹¹akepunö mötït otupö aketö chepay, kwipchï kame.

¹²Kïpka kinetanpa Yoana kïsït portanyi akïpa kïtïp, atolapay kïpa kïmwochï Yeso.

¹³Otini kilïm Yeso ngalechoni, kïweghö otini ompö meli kutang surkwen akïtöpö onkït. Wölo otini kinkïtï söpïch, kïngetunö kanastinekwa akïpegha kelyön kïrïp nyinte.

¹⁴Kïngetunö Yeso meli, otini kisïwa nyinte söpïch nyo mamïnïng, kusyonchï akusop pikökwa cho kikösisyote.

¹⁵Kïkany kwimön, kïpkonchï kinetankachi akïlenchï, “Mach kïröytö asis kör akwanyï siriron wölete, yontena pïchï kïpechï kegh wölo mi kestonï atökwolchï kegh omisyewut.”

¹⁶Kuyokyï Yeso chane lö, “Möminye machata kïpa pich, otönö kïgh kwam!”

¹⁷Kuyokyï lö, “Mi ne anka yi, kïpoto makatin mut nko kaghagh odeny.”

¹⁸Kïlenchï Yeso chane, “Ale yi omitan.”

¹⁹Kimwochï pich kumpur ngwïny, atolapay kïcheng makatinechay le mut nko kaghaghe kwodeny akuros yïm akusoyön Tororöt. Kïmïnchïran makatinechay akutö kinetankachi kutö pich.

²⁰Kwam chane löwïr ntökïpïghyö. Atolapay kïghamït kinetankachi ngötunön cho kinyïghï köröpon taman nko odeny.

²¹Ki pich cho ngata 5,000 choni kyomisyö akimeyitnye chi kor nko monïng.

²²Atolapay kïmwochï Yeso kinetankachi kïpegha meli kwoghyö nanam antakwagh kuntöghogha nyinte, otini tökuyomisöy nyinte pich.

²³Nyini kïyonta pich kïpechï kegh, kïwö onkït kïpus kamas kïsagh. Kimi Yeso atoni onkït akikwimön,

²⁴kikikwit melinay nanam kwen atoni akimi kulukluköy kegh nko chepkïrïri pö pögh nyo kikutuna tawunyi.

²⁵Kïweghö Yeso pögh parak kiwasan kutang wölo mi kinetankachi.

²⁶Nyini kïsïwa chane nyinte kïwegho pögh parak, kuwöghisyö akïlö, “Chi nyï nyo kapusuna ngwen!” Kuteghyö ompö nyökoryö.

²⁷Wölo panini lawel, kïngölonchï Yeso chane kïlenchï, “Onyökonitunö ani nyete, mowöghisyö!”

²⁸Atolapay kïlö Petro, “Echotyon, ato nyi nyoni nyoman, ikany angwïnan pögh parak wöloni imitenyi!”

²⁹Kïlenchï Yeso, “Nyonö!” Kïröyteghö Petro meli akïweghö pögh parak kïwö wölini mi Yeso.

³⁰Wölo nyini kisïwa mirtino pögh kuwöghisyö kïmach kïlït pögh. Kutegh tya lö, “Echotyon sörwante!”

³¹Kughïtö Yeso ewunyi lenyini lawel akïnam nyinte, atolapay kïlenchï, “Wechï mïnïng kighanatengu! Kölö ne tetomtomönönyi?”

³²Kïpus chane kwodeny melinay, kïwïs yomonay.

³³Kïkïtïngchï kïsagh kinetan ompö meli akïlö, “Ichinyi nyoman Wero Tororöt!”

³⁴Kwoghyö nanam akïpa ntökwit koro Kenasaret.

³⁵Nyini kunkïtï pich ompö korononi, kuyoktö kut kemïtyï nyinte pich löwïr cho kichiryot ompö koronini kïmïkul.

³⁶Kïsagh pich nyinte lö tökany kïswany pich cho kichiryote sörömuto sïrenyi, akï chane löwïr cho kïswany sïrenyi kï kisöpchö.