Read pokoot MATAYO 2 Bible Online

MATAYO 2 - pokoot bible

MATAYO 2

¹Otini kikïyï Yeso ompö kanasyanta Petleem nyo mi koro Yudea, kï ki pöytoghin Erode osiswechoni. Kïpkana pich kongasis kutöngu Yerusalem cho kinkït ngala kokel,

²kïtepsyö lö, “Mi onö mnyarkilnï kakïyï atökïlïkwï pöytoghinto pipö Yaudi? Kakïsöchicha kokelyantenyi kïpusuna kongasis, nka nyete kakïpkanacha kekïtïngchï nyinte.”

³Otini kilïm pöytoghintö Erode ngalechoni, kusus kegh nyinte nyoman nko pich löwïr cho kimönyöy Yerusalem.

⁴Kïkur Erode tïsï cho echön kïmi nko konetï kirurut akïtep chane lö, “Onö wölo kïyichini Kristo* nya?”

⁵Kuyokyï chane lö, “Kanasyanta Petleem nyo mi Yudea, ompöwölo kikir werkoyon lö,

⁶ ‘Akï nyi, Petleem nyo imi koro Yuda, mechinyinye mïnïng tya ompö kintöghoghi Yuda, ompöwölo ngwïnoninyi kintöghoghintö nyo ntöghoghchini piköchan Israel.’ ”

⁷Kïlenyona, kïkur Erode pïchay ngöghomöch kipkono kongasis akumït ato le sirö atökunkïtunö chane lasiny otini kisïwa chane kokelyantanoni.

⁸Atolapay kïyonta chane kïpa Petleem akïlenchï, “Ape okïtunö montö lasiny, otini konyorï apkan omwowante atowan tïkwïl asagh nyinte.”

⁹Kïkany kïlïm pïchay ngalechay kïpechï kegh, akwotini kimi pan kïsïwa kokelyantanaye kisöchï chane Kongasis kimi kuntöghoghchini chane ntökughyongö ato kimi monïngay.

¹⁰Kïkany kïsïwa chane kokelyantanay, kïngörekyö nyoman.

¹¹Kïpa kïlïtöy köyay, kïsïwa monïngay kïmi nko kame Marya. Kïkïtïng akïsagh nyinte, atolapay kutyak mïlotwekwa akutö nyinte ropöw, choni kï, koltin, upani nko manemane.

¹²Kurur Tororöt chane ompö kirwotïtogh lö, “Momïlisyö ngat wölo mi Erode.” Kïlenyona kïmïlisyö chane korengwa kuwer are anka.

¹³Kïkany kïpa pïchay, kungwinchï Yosep malaykayanta Echotyon ompö kirwotïtogh akïlenchï, “Ngeta mïta montö nko kame kutang Misri atïpï wöloni ntökïtenö omwowunyi ngetunenö wöloni. Ompöwölo mi Erode kïmöröy montö atökïpar.”

¹⁴Kïnget Yosep oghö akumït monïngay nko kame kutang Misri,

¹⁵ kumpur wöloni tökïtenö kïrapas Erode. Kighisyö ngalechoni lenyoni tökïlïkwï man ngölyonto Echotyon nyo kimwa kuwerï kuti werkoyon lö, “Kyokurön Werïnyu kungwïna Misri.”

¹⁶Otini kisöwï Erode lö kilïs nyinte pïchay ngöghomöch nkït ngala kokel, kulila nyoman. Kïyonta pich kïpa kïpar monïng löwïr cho le wor cho kimi Petleem nko söremwokachi tïkwïl, cho kitïng könyis odeny kwapta, kutang atanye kiryama nyinte nko pïchay ngöghomöch nkït ngala kokel.

¹⁷Kipïntö nyu ngölyon nyo kimwa werkoyon Yeremia lö,

¹⁸ “Kikïlïma rira Rama, kiriköt nko sönönöt nyo ngwan. Lokyini Rael monechi: akimachamnye kesaghsagh, ompöwölo kimeghö chane löwïr.”

¹⁹Nyini kïma Erode, kuchumchï malaykayanta Echotyon Yosep ompö kirwotïtogh ompö Misri

²⁰akïlenchï, “Ngeta mïta montö nko kame aiwö koro Israel, ompöwölo kimeghö pich kiyöröy kïtïghöy montö.”

²¹Kïlenyona, kïnget Yosep akumït monïngay nko kame kïmïlisyö koro Israel.

²²Wölo otini kilïma Yosep lö pöytoy Arkelao Yudea nyo kiker kwanta Erode, kuwöghisyö akimökïwönye wölini, kïkany otini kikerur ompö kirwotïtogh kïwö kutang okumpö Kalilaya

²³ kïtek katanyi kanasyan nyo kikïkuro Nasaret, kïmang wöloni atökïlïkwï man ngölyon nyo kimwa werkoy lö, “Kïkuro nyinte Nasaretin.”