Read pokoot MATAYO 20 Bible Online

MATAYO 20 - pokoot bible

MATAYO 20

¹“Karkegh Pöyunöto Yïm nko chi nyo tïng para sapipun nyo kinget nyini le kiwasan kukir pich akïyonta chane kïpa parenyi pö sapipun.

²Kïchomnyechï kutö chane ropïyon akonga nyo pö silpa ompö asis akonga atolapay kïyonta chane kïpa parenyi.

³Kïnget ngat ato ngata satïn sömök, kinyorï pich walaka cho kimpuröy kwïle ompö donyö.

⁴Kïlenchï, ‘Ape tïkwïl angora parenyan pö sapipun okonokwa kïgh nyo mïchini.’

⁵Kïpa nyu chane. Ato kingata satïn mut nko akonga nko ngat ato ngata satïn mut nko angwan, kwigh lenyaye.

⁶Kïmi ato ngata satïn taman nko akonga, kïwö chichay ngat donyö, kinyorï pich walaka cho kimi kimpuröy kwïle. Kïtep lö, ‘Ompö ne toghyongonekwa wöl kwimön kwïle puryö kasï?’

⁷Kuyokyï lö, ‘Ompöwölo möminye chi nyo kökonecha kasï.’ Kïlenchï, ‘Ape nyo agha kasï parenyan pö sapipun!’

⁸ “Nyini kiröytö asis, kïmwochï chichay pö par kighyongtoghintenyi, ‘Kurö pïchay keghöy kasï para sapipun atetönö chane ropïyenikwa, itoronyi chichinö kötö kungwïnöy iwantegha nyinö kitor.’

⁹Kïpka nyu chinö kitor kasï ato kingata satïn taman nko akonga, kïtak chi anka tïkwïl ropïyonto silpa akonga nyo kipö asis akonga.

¹⁰Kïkany kïpka chinö kinya kutor, kïlenchini kegh kïnyoru cho tïlöy, wölo ketö chi anka tïkwïl ropïyonto silpa akonga nyo kipö asis akonga.

¹¹Kïcheng ropïyenikwa akïngwïrngwïronchï chichay pö par lö,

¹²‘Nyini kegh pïchï kapka löt kasï nyo pö sa akonga kwïle, kï kölö ne tekongityenönyi nko acha cho kakighotisyö asis kwimön?’

¹³Kïlenchï chichay akonga ompö pïchay, ‘Tere wena, melö kalïsinyi nkolentan kakïterchinö lö sïköy chi tïkwïl ropïyonto silpa akonga ompö asis akonga?

¹⁴Chenga nyengu aiwechï kegh, kamachan otö chichï pö löt kïkarkegh nko nyi.

¹⁵Kömotïngetanye so man otötö tïkuchu le wölo komöktoy? Kelilinyi so köromïntanyan?’ ”

¹⁶ Kuwany nyu Yeso kïmwa lö, “Kïlenyona, lïku pich cho pö lötï cho pö tagh, kïlïkwï cho pö tagh cho pö löt.”

¹⁷Otini kimi Yeso kïpusöy kutöngöy Yerusalem, kumït kinetankachi kïtaman nko odeny ato le sirö akïlenchï chane kimi pan,

¹⁸“Atere, kakïpusacha ketany Yerusalem akï wöloni wölo kitötegho Wero Chi ketöni tïsï cho echön nko koneti kirurut. Rwokyini chane nyinte ketïgh,

¹⁹atolapay kutö pipö punton kïnyerera nyinte akïmungö syaritin akïwudochï kimurtöwon, wölo kitutu nyinte ompö asispa sömök.”

²⁰Kiwö koko Sepedayo nko werkachi odeny wölo Yeso, akïkïtïngchï akïsom nyinte kïgh.

²¹Kïlenchï Yeso, “Imökenyi awunyi ne?” Kuyokyï lö, “Yomisö tökïtöpï werköchan chï le odeny ewungu nyo pö tagh nko nyo pö löt ompö Pöyunötengu.”

²²Kuyokyï Yeso lö, “Monkïtökwanye kïgh nyo osomöy! Omukekwa so ogheghone kikompa nyo karich agheghtan?” Kuyokyï lö, “Kimuchecha.”

²³Kïlenchï Yeso, “Nyoman, omukekwa ogheghone kikompenyan, wölo melö ani nyo okïlchini chi kïtöpö ewunyan nyo pö tagh anta nyo pö löt. Pö woptinechoni kwodeny pich cho kitötyï Paponyan.”

²⁴Otini kilïm kinetanpa Yeso walaka ngalechini, kïnörekyï werchay tupchö le odeny.

²⁵ Kïkur Yeso chane akïlenchï, “Onkïtökwa lö pöghisyegho pöytoghi Punton charut otini pöytoy pikökwa akïpöghisyeghö kintöghoghikwa kat.

²⁶ Wölo melö lenye nyona ompö akwa. Ato mököy chi ompö akwa kïyetu, kïmïchini kïlïkwï nyinte mötworintekwa,

²⁷ akwoto mököy chi akong ompö akwa kïlïku nyo pö tagh kïmïchini kïlïkwï sekeyontenkwa,

²⁸le ato melö kingwïn Wero Chi tökepöghisyechï, wölo kingwïn kïpöghisyö akusalta söpontanyi tökutyaka pich cho chang ngokikwa.”

²⁹Akwotini kïngeto Yeriko, kïrïp söpïch nyo wow.

³⁰Kïnget chepkörotonoy odeny cho kimpuröy kamas, otini kilïm lö mi Yeso kuweröy otini kuteghyö lö, “Wero Daudi, syonchecha wey!”

³¹Kïkar kong söpïchoni chane kïsisyö. Wölo kïtas tagh kuteghyö ngat tya lö, “Wero Daudi, syonchecha wey!”

³²Kughyö Yeso akïkur chane kïtep lö, “Ne nyo omökekwa oghwokwa?”

³³Kïlö, “Echotyon igha konyicha kurosïta!”

³⁴Kusyonchï chane akïswany konyikwa kïnyini kurosïta akïrïp nyinte.