Read pokoot MATAYO 22 Bible Online

MATAYO 22 - pokoot bible

MATAYO 22

¹Kïpöghisyeghö Yeso ngat körkeyïntin kunet pich.

²Kimwa lö, “Karkegh Pöyunöto Yïm nko pöytoghin nyo kigh ichon nyo pö kensyo werïnyi.

³Kiyonta mötworichi kïpa kïkur pich kïpka ichon, wölo kïtagh pich kikïkur kïpka.

⁴Kïyonta ngat mötwori walaka kïmwochï pïchay kikikekur lö, ‘Kyaghan omisyewutkachu, kayengan eghinechu nko walaka cho okwoghöch akikwighisyö tïkwïn löwïr. Apkana ama ichon nyo pö kensyö!’

⁵Wölo kimökïyangcha chane, kïpa pat kwigh ighisyewutkökwa: kiwö anka parenyi, kïwö anka kwigh mïnchïrïsnön,

⁶kïnam walaka mötworichi, kïmuny akïpar.

⁷Kïnarek pöytoghintö akïyonta askarinechi kïpa kuwany pörichini akïpel kanasyantengwa.

⁸Atolapay kïkur mötworichi akïlenchï, ‘Kikwitïta ato pö ichontönyan wölo kimömïchinotnye pïchay kikïkur.

⁹Ape nyu ortïna kanasyan okurunö pich cho chang cho tenö cho konyorï kïpka kwam ichon pö kensyö.’

¹⁰Kïlenyona kïpa mötworichay kutang ortïna kanasyan akïghamïtï pich löwïr cho kimï chane kïnyorï cho karamach nko cho ghach, kïnyïghï pich köyoni pö kensyö.

¹¹“Nyini kïwö pöytoghintö kura toyechi, kïsïwa chi nyo kimelaknye sïro pö kensyö mi ori.

¹²Kïtep chichay lö, ‘Wena, kengwïnanyi lö ne wölï amelö itïngetenyi sïro pö kensyö?’ Wölo kïnam kïgh kut.

¹³ Kïlenchï pöytoghintö mötworichi, ‘Arata morïn nko kelyön awirchï sany wölo tuw. Lïku nyu rirat nko nyaghata kelat ompö kichïr.’ ”

¹⁴Kuwany Yeso nyu kïmwa lö, “Chang cho kïkukuröy, wölo ngörï cho kïkïlöy.”

¹⁵Kïpa Parisaytin* kurwoch wölo nömtoy Yeso ompö kinetutkachi.

¹⁶Kïlenyona, kïyonta kinetankakwa nko pich cho rïpanpa Erode kïpa kïtep nyinte lö, “Konetin, kinkïtöcha lö ingölonenyi ngala man ainetenyi kunkïtï chi lö ne nyo möko Tororöt nyinte. Amewöghenyinye chi, ompöwölo meyongenyinye wowïn pö pich.

¹⁷Mwowecha köny wölo inontonyi, mïchini kekwöghchï Kaisari surï nya anta ewo?”

¹⁸Wölo kunkïtï Yeso lïsatengwa, kïlenyona kïlenchï, “Ochikwa lïsï! Kölö ne tomökekwa olutanïn ngöghöp?

¹⁹Oporwanïn ropïyeni chini kïkwögho surï!” Kutö nusïyon,

²⁰kïtep Yeso chane lö, “Pö ngo motï nko kaynatanï mi ori nya?”

²¹Kïlenchï, “Pö Kaisari.” Kïlenchï Yeso chane, “Kilenyona, otönö Kaisari tïkuchi, otö Tororöt chechi.”

²²Nyini kilïm pïchay lenyoni, kïtöngönchï akïpïstö nyinte kïpechï kegh.

²³ Kïpkonchï Yeso Sadukaytin,* ki chane cho kinetöy lö möminye kitutunötö.

²⁴ Kïtep lö, “Konetin, kinetecha Musa lö ato rapas chi nyo kimösïknye monïng kïmïchini kïmïl werïngwa korketö atökïsïkyï werïngwa monïng.

²⁵Kimi werpö chi cho le mut nko odeny cho kikïmöngecha tïkwïl. Kikensyö weri nyo wow akïma puryö monïng, kïmïl werïngwa korkenyi.

²⁶Kwighisyö lenyoni ompö weri nyo pö odeny nko nyo pö sömök ntökwit weri nyo pö mut nko odeny.

²⁷Ato mi löt kïma kokonay.

²⁸Pöyitu ngo nyu kokonï ato tutï pich? Ompöwölo kip chane tïkwïl nyinte kï mut nko odeny?”

²⁹Kuyokyï Yeso chane lö, “Ochikwa lelote nyoman ompöwölo monkïtökwanye kirurut anta owesyo Tororöt!

³⁰Ompöwölo otini tutu cho kimeghö kïwöghökisyot kïkarkegh nko malayken ompö yïm, melö kensïyi chane anta kip.

³¹Kïkany ngala kitutunöto pich cho kimeghö, kitö tomönye so osomönökwa ngalechay kimwowokwa Tororöt?

³² Kimwa lö, ‘Ochan Tororöt pö Apraam achan Tororöt pö Isak achan Tororöt pö Yakopo!’ Poru nyoni lö nyinte kï Tororöt pö cho sötote, melö nyo pö cho kimeghö.”

³³Otini kilïm söpïchischay ngalechoni kïtöngönchï kinetutkachi.

³⁴Nyini kilïm Parisaytin lö kimï Yeso kwigh Sadukaytin kïsisyö, kïghamïtï kegh,

³⁵ kumukyï akong ompö chane nyo kile konetinto kirurut kityam nyinte kïtep lö,

³⁶“Konetino, kirurut ne nyo wow tya ompö kirurut nya?”

³⁷ Kuyokyï Yeso lö, “ ‘Chama Echotyon Tororötïngu ompö mïkulöwungu kïmïkul nko ompö söpontöngu kïmïkul nko ompö ngöghomnyengu kïmïkul.’

³⁸Nyoni Kirurutye nyo tagh akïnyoni nyo pïchigh tya.

³⁹ Akï nyo pö odeny nyo pïchigh tya kïlata nyoni, lentöy, ‘Chama pöröryengu le wölo ichömtonyi kegh.’

⁴⁰ Chïchïmo Kirurut pö Musa nko kinetut pö werkoy kirurut chete le odeny.”

⁴¹Otini kighamïtï kegh Parisaytin, kïtep Yeso chane teput lö,

⁴²“Ononekwa ne ompö Kristo? Wero ngo nyinte?” Kuyokyï lö, “Pö ara Daudi.”

⁴³Kuyokyï Yeso lö, “Kwompö ne tökïkurö Daudi nyinte ‘Echotyon,’ ompö owesyo Mïkulögh nyo Tïlil? Ompöwölo kilö Daudi,

⁴⁴ ‘Kilenchï Echotyon Echotyontenyan: Töpenö ewunyan pö tagh wölo konyïtote ntökïtenö otönön punköku ngwïnyi kelyeku.’

⁴⁵Kwoto kuro nyu Daudi Kristo ‘Echotyon,’ kï kalïkuna onö werïnyi?”

⁴⁶Melö kitökïmi chi nyo kitökuyokyï nyinte ngölyon akimökïminye chi nyo kimukyï kïtep nyinte teput ngat kïngeta asisoni.