Read pokoot MATAYO 25 Bible Online

MATAYO 25 - pokoot bible

MATAYO 25

¹ “Kikongityot nyu Pöyunöto Yïm nko tipïn taman cho kip tatïnekwa akïpa kïtaroch chi pö kensyö.

²Ki sölwöy cho le mut ompö chane, kï kingöghomöch cho le mut.

³Otini kip chay le sölwöy tatïnekwa mökwipcha mwowöy walaka,

⁴wölo kwipö chay ngöghomöch chupen mwowöyi walaka nko tatïnekwa.

⁵Otini kuling chi pö kensyö, kïtönköryö tipichay löwïr akïruyö.

⁶“Ato mi oghö kwen, kïpölyö pich kïlentöy, ‘Kikwitï chi pö kensyö apkana ataroka!’

⁷Kinget tipichay kï taman akutam tatïnekwa.

⁸Kïlenchï tipi chinö le sölwöy chinö ngöghomöch, ‘Chöghwecha mwowöyikwa ompöwölo kemisisyö tatïnecha.’

⁹Kuyokyï chinö ngöghomöch lö, ‘Ewo, mömïchinechanye nko akwa! Ape duken ala chikwo.’

¹⁰Kïnget tipichay le sölwöy kïpa kwal mwagh akwotini kitökïmi wölini, kwitï chi pö kensyö. Kïpa tipichinö kimi kïpsach nko nyinte kïlïtöy kö pö kensyö atolapay kekar kukat.

¹¹ Ato mi löt kwitï tipichay walaka akïkursyö lö, ‘Echotyon, echotyon yotwecha!’

¹²Kuyokyï chichay pö kensyö lö, ‘Omwowokwa nyoman melö onkïtokwa.’ ”

¹³Kuwany Yeso kïlenchï pïchay, “Oripsyenö nyu ompöwölo monkïtökwanye asista anta saye.

¹⁴ “Kikongityot atoni Pöyunöto Yïm nko chi nyo kimököy kïrutoy antakwagh, kïkur mötworichi akutö chane kughyongchï tïkuchi.

¹⁵Kitö chi anka tïkwïl kïrïp kegh nko owesyenyi: kitö akonga talanten mut, kutö anka talanten odeny, kutö anka talantayan akonga atolapay kïrutö.

¹⁶Kïwö lawel mötworintonay kikitö talanten mut kuchirusön kïsïch talanteni walaka mut cho mi parak.

¹⁷Kwigh lenyoni tïkwïl nyay kikitö talanten odeny akïsïch talanten walaka odeny cho mi parak.

¹⁸Wölo kiwö nyay kikitö talantayan akonga kïwas ngwïny akïtïpchï talantayantanay echotyontenyi.

¹⁹“Kikany kuwer osiswö cho chang, kïmïla echotyontonay akutor kuyitisyö nko chane.

²⁰Kungwïn mötworintonay kikitö talanten mut, kwipï talanteni walaka mut akïlenchï, ‘Rose köny, echotyon achï ropïyeni walaka cho le talanten mut cho kötösisyö.’

²¹Kïlö echotyontenyi, ‘Karam, ichinyi mötworin nyo karam nyo kighönöy. Kelïkunyi chi nyo kighönöy ompö tïkwïn cho ngörï, oghinyi ghyongchinö tïkwïn cho chang. Nyonö kengörekyenö tïkwïl.’

²²“Kungwïn mötworinte nyay kikitö talanten odeny kïkonï talanteni walaka odeny cho kitösisyö.

²³Kïlenchï, echotyontenyi, ‘Karam nyoman, ichinyi mötworin nyo karam nyo kighönöy. Kelïkunyi chi nyo kighönöy ompö tïkwïn cho ngörï, oghinyi ye ghyongchinö tïkwïn cho chang. Nyonö atökengörekyenö tïkwïl.’

²⁴Wölo kungwïn mötworintonay kikitö talantayan akonga akïlö, ‘Echotyon, kyonkïtön lö ichinyi chi nyo aghïgh, ikösenyi pagh ompö wölo kimelechinyinye kïgh aighamïta wölo melö kilechinyi kösïgh.

²⁵Kyawaghan, owan owïnchï ropïyontengu ngwïny. Anyï ye nyu, nyini le nyengu.’

²⁶Kilenchï echotyontenyi, ‘Ichinyi mötworin nyo gha aichï sosö. Ato kinkïtönyi lö kyokösan pagh ompöwölo kimolechanye kösïgh, aghamïta wölo melö kyolechan kösïgh,

²⁷kimïchininyi nyu rorchinö ropïyenichan penki, wölo yiyegho ropïyen nyo kötonyorunan ropïyenichu nko tösöwekwa!

²⁸Asarena ropïyontonini tïng atö chichona tïng talanten taman.

²⁹ Ompöwölo kitöni chi kïgh nyo tïng aketösyï kïchangit. Wölo nyo melö tïng kïgh, kesöro ompö nyini kötïng.

³⁰ Owirchï sany wölo tuw mötworintonï mötïnye kinyiwut. Riryegho pich wölini akïnyöghöy kelat ompö nyarïl.’

³¹ “Otini kengwïn Wero Chi ompö ororyö kïmi nko malayken löwïr kïtöpö ngacharenyi nyo pö paytagh,

³²Kïtuyechini nyu pipö Punton tawunyi tökïtar chane le wölo törtoy mösöwontö kechir nko ngaror,

³³törchini kechir ewunyi pö tagh, kïtörchï nekö ewunyi pö löt.

³⁴Atolapay kïlenchï pöytoghintö pïchinö mi ewunyi pö tagh, ‘Apkana nyu cho kikusoyönok Paponyan! Apkana atacha pöyunöt nyo kikekïlwekwa kïngeta otini le towunöto ngwïny.

³⁵Kyochan sutate apaghanïkwa, kyamatanïn maral, okonanïkwa pögh, kyochan ton, atachanïkwa ompö kestonikwo,

³⁶kyochan chïrut, olokwanïkwa sïro, kyochan chirate apkanakwa arosanïn, kyomitan chela arutochanïkwa.’

³⁷Yokyini nyu pïchoni pö man pöytoghin lö, ‘Oyï nya, Echotyon ato kikïsïwecha nyi nko kömöy, kepaghacha nyi anta amatinyi maral kekoninyi pögh?

³⁸Akwoyï ato kikïsïwecha nyi le ton ketokocha nyi anta ichï chïrut akelokucha nyi sïro?

³⁹Akwoyï ato kikïsïwecha nyi ichï chirat anta imitö chela akerutoghchicha nyi?’

⁴⁰Yokyini nyu pöytoghintonay chane lö, ‘Omwowokwa nyoman lö kïgh anka tïkwïl nyo kyoghchikwa akonga ompö werköcha chï mïnkech, kï kyaghwanïkwa!’

⁴¹“Atolapay kïlenchï pïchinö mi ewu löt, ‘Apeghena wölo omitan cho kikechïpok, ape olïte mapa kokay nyo kikengotyï Onyöt nko malaykenichi!

⁴²Ompöwölo kyochan sutate omulanïkwa omisyö, kyamatanïn maral mokonanïkwanye pögh aghegh,

⁴³kyochan ton wölo kimatakanïkwanye, kyochan chïrut amelö kyokonanïkwa sïra alak, kyochan chirate akyomitan chela, wölo kimapkanakwanye arosanïn.’

⁴⁴Yokyini nyu chane nyinte lö, ‘Akwoyï nya Echotyon ato kikïsïwecha nyi nko kömöy anta amatïn maral anta ichï ton anta ichï chïrut anta chirate anta imi chela amelö kikingarakacha nyi?’

⁴⁵Yokyini nyu pöytoghinto chane lö, ‘Omwowokwa nyoman lö, le wölini kyataghakwa oghchinö ngalechoni akonga ompö monechï mïnkech, kï kyataghakwa oghwanïn.’

⁴⁶ Kïrongöy nyu pïchoni kïpa nyarïlpa kokay, wölo petöy chinö pö man söpon pö kokay.”