Read pokoot MATAYO 26 Bible Online

MATAYO 26 - pokoot bible

MATAYO 26

¹Otini kinet Yeso ngalechi löwïr, kïlenchï kinetankachi,

² “Onkïtökwa lö köngötï ye osiswö odeny kwitïta asispa Pasaka,* kitötoy atoni Wero Chi tökewudochï kimurtöwon.”

³Kïtuyö nyu tïsï cho echön nko poyi pipö Yaudi ompö ka Tïsin nyo Wow* nyo kikïkuro Kayapa

⁴akïtat wölo nömtoy Yeso ompö sison tökïpar.

⁵Kimwochinchö lö, “Melö kighöy ngalechï asis nyo wow tömar kegh pich.”

⁶Otini kitökïmi Yeso Petaniya kö pö Simon nyo kyamate psenkwet.

⁷ Kungwïnchï korka Yeso nyo kitïng chupa nyo kimi mwagh nyo ngutoy nyo karam nyo pö olyot nyo wow akïmïlchï mwaghay möt pö Yeso otini kimi kwomisïyi.

⁸Kïsïwa kinetankachi kwighöy lenyoni, kïnörekyö akïlö, “Pö ne lastaghta nyo tenö nyï?

⁹Mötökyalta mwaghï tökesïkö ropïyen cho chang cho kitöni meyï!”

¹⁰Kunkïtï Yeso kinonutyengwa kïlenchï, “Kölö ne tosusekwa kamanï? Keghwanïn nyinte nyo karam.

¹¹ Mi meyï nko akwa osis löwïr, wölo momitanye nko akwa kïnomnyö.

¹²Keyilenanïn kamanï mwagh atökutönanïn kïpsach ketïpanïn.

¹³Omwowokwa nyoman lö wop anka tïkwïl wölo kyomtegho Lökoyechï Karamach ompö ngwïny kïmïkul, kengölono kïyï kegh nyinte kenono nyinte.”

¹⁴Kïwö Yudas Iskariote nyo kile akonga ompö kinetan pö Yeso taman nko odeny wölo mi tïsï cho echön

¹⁵ akïlenchï, “Okonanïkwa ne ato oporwokwa nyinte!” Keyityï kerpes pö silpa cho le tömönut sömök akutö nyinte.

¹⁶Kïmar Yudas pöroyïn nyo wïchtegho Yeso kïngeta atoni.

¹⁷Kïpkonchï Yeso kinetankachi asisto tagh nyo pö Ichon pö Makatin cho puryö Mumar akïtep lö, “Imökenyi keghenacha onö ichonto Pasaka?”

¹⁸Kïlenchï, “Ape wölo mi chi nyo le anïm nyo mi kanasyan alenchï, ‘Lentöy konetintö, kakwitïta sayenyan, ongwïnan nko kinetankachu omo Pasaka kongu.’ ”

¹⁹Kwigh kinetankachi lenyini kimwochï Yeso chane. Kwigh chichay ichonto Pasaka.

²⁰Otini kituwit kumpur Yeso ngwïny nko kinetankachi taman nko odeny akwomisyö.

²¹Kïkany otini kitökwomisïyi, kïlenchï chane, “Omwowokwa nyoman lö wïchtonanïn chi akong ompö akwa.”

²²Kwotyö chane nyoman akïtep chi anka tïkwïl nyinte lö, “Ani nya Echotyon?”

²³ Kuyokyï Yeso chane lö, “Chi nyo kenönok makatyan ompö tïwan akonga nko ani nyo wïchtonanïn.

²⁴Wechini kegh nyoman Wero Chi kïrïp kegh nko Kikirut, wölo heywey ompö chichini wïchtoy Wero Chi! Kitö karam ntökimelö kikïyï chichoni!”

²⁵Kïtep Yudas nyo kiwïchtoy nyinte lö, “Ani so, konetin?” Kuyokyï Yeso lö, “Nyi nyo kemwagh.”

²⁶Nyini kitökwomisïyi, kïcheng Yeso makatyan kusoyön akïmïnchïran akutö kinetankachi kïlenchï, “Achenga am, portönyan nyete.”

²⁷Atolapay kïcheng kikompa akusoyön Tororöt akutö chane akïlenchï, “Agheghena akwane tïkwïl kikomponï.

²⁸ Ompöwölo kisönköchan chete, nyo puntoy muma* Tororöt cho kïmïltoy ompö pich cho chang atökelöstoghchï chane ngokikwa.

²⁹Omwowokwa lö mogheghanye ngat nko akwa dipay* pö sapipun ntökïtenö asisini ogheghan nko akwa dipay cho relach ompö Pöyunöto Paponyan.”

³⁰Atolapay kïtum chane tum akïpa kutang kutïng pö Arol.

³¹ Atolapay kïlenchï Yeso kinetankachi, “Otoyonekwa oghonete löwïr opïstonanïn, ompöwölo kirate ompö Kikirut lö, ‘Pöröy Tororöt mösöwonte, tökïtoyö kechir.’

³² “Wölo otini kotutwan, onyoghan owetöy Kalilaya.”

³³Kuyokyï Petro lö, “Mopïsteninyinye nyonikïny, kïrkegh köpïstinyi pich walaka!”

³⁴Kïlenchï Yeso, “Omwowunyi nyoman Petro lö itiyonaninyi oghonete kïnyïl sömök kïtomö kïwach kïrpö kokoroch.”

³⁵Kïlenchï Petro, “Kïrkegh kölïku meghe, kïmomukanye otiyot lö monkïtinyinye.” Kïmwa tïkwïl kinetanchay lenyoni löwïr.

³⁶Atolapay kïwö Yeso nko kinetankachi kutang ato kïkuro Ketsemane akïlenchï, “Ompure yi owan otinö asagh.”

³⁷Kumït Petro nko werpö Sepedayo odeny, kïsïch nyinte nyarïl akuwongwï tya,

³⁸kïlenchï pïchay, “Wongunote mïkulöwunyan nyoman, karich kïtïghanïn, ompure yi oripsyö nko ani.”

³⁹Kunayta yona kite, kupït akïsagh lö, “Ato muko, Paponyu, ichengenanïn kikomponï pö nyarïl kïlowit ompö ani! Wölo melö ompö machatenyan, wölo machatengu.”

⁴⁰Atolapay kïmïla wölay mi kinetankachi, kutomï mi kïrusot, kïlenchï Petro, “Kölö ne tömamukakwa oripsyö nko ani ompö nyo le sa akonga?

⁴¹Oripsyenö asagh atömolïtöy työmut. Tïng mïkulögh machat, wölo nyarkalal portö.”

⁴²Kïwö ngat panto odeny akïsagh kïlö, “Ato memukonye kechengenanïn kikomponï Papo ntökïtenö agheghan, ikany kwigha machatengu.”

⁴³Kïmïla ngat kutomï mi kinetankachi tökïruyot, ompöwölo kinïkisöch konyikwa nko rïwön.

⁴⁴Kïpïstö Yeso chane ngat akïwö kïsagh panto sömök le nyaye pö tagh.

⁴⁵Atolapay kuyokyï kegh kinetankachi akïlenchï, “Tomitenökwa so oruyot amungöy? Arose! Ketïta nyu sa ato kitöni Wero Chi mori mwokïyis.

⁴⁶Ongetyenö kepe. Arose, anyinö chichinö wïchtonanïn!”

⁴⁷Nyini kitökïngölonöy Yeso, kuchumï Yudas nyo kile akonga ompö kinetankachi chay le taman nko odeny. Kimito nyinte nko söpïch pö pich cho kitïng chokon nko runkun cho kiyonï tïsï cho echön nko poyi pipö Yaudi.

⁴⁸Kikikuporchï Yudas söpïchini lö, “Ato asïwekwa chi nyo otokwesan okonköy kegh tïkwïl anam, nyinte nyoni.”

⁴⁹Otini kit Yudas wölo mi Yeso kïlenchï, “Sïpay konetin.” Kutakwes ompö kikonköyöt.

⁵⁰Kuyokyï Yeso nyinte lö, “Igha wena kini kepunyi yi!” Kïpka pïchay akïnam Yeso lenyini.

⁵¹Kïngwïsï chi akong chokenyi nyo kimi nko Yeso akuchat yit pö sekeyonto Tïsin nyo Wow.

⁵²Kïlenchï Yeso chichay, “Yokyinö chokengu mïlenyi, ompöwölo chi anka tïkwïl nyo pöghisyegho chok, ketïgho chok.

⁵³Olentekwa so kepölanïn orirchï Paponyu kïyonwanïn lïkos pö malayken cho tïlöy kïres taman nko odeny?

⁵⁴Wölo itïtoy lö ne Kikirut chay mwoghöy lö, ighisyot ngalechi nyo mötïny?”

⁵⁵ Atolapay kïngölonchï Yeso tuyonay pö pich kïlenchï, “Kaghanïkwa so le pkatyan tapkanakwa nko chokon nko runkun anamanïn? Nkomitan nko akwa ompuröy anetisïyi kïnomnyö ompö Kö pö Tororöt* akimöminye ato kyanamanïkwa.

⁵⁶Wölo keghisyö ngalechï le nyete ntökwitïta ngala werkoy cho kikikir ompö Kikirut lö.” Kïpïstö nyu kinetankachi löwïr nyinte akupertoy.

⁵⁷Kïnam pïchay Yeso akumït ka Kayapa nyo kile Tïsin nyo Wow, wölo kïghömïtï kegh koneti kirurut nko poy.

⁵⁸Kirïp nyu Petro Yeso ompö ato low ntökwitïta kiroryo Tïsin nyo Wow, kïlït ori akumpur nko ripï tökïsïwa sörömu ngalechoni.

⁵⁹Kumukyï tïsï cho echön nko Kokwö* kïmïkul kïmar söwintöno putintön nyo rwokinegho Yeso atökïpar,

⁶⁰wölo kimönyorïcha nyonikïny, kïrkegh kikonï kegh pich cho chang cho kipka kïmïrchï nyinte putintön. Ato mi löt, kïpka söwï odeny

⁶¹ akïlö, “Kilö chichï, ‘Omukan owuröy Kö pö Tororöt atek ngat ompö osis sömök.’ ”

⁶²Kughyö Tïsin nyo Wow akïtep Yeso lö, “Metïngetenyinye ngölyon nyo iyoku so? Ilentenyi ne ompö söwintöno pïchï?”

⁶³Wölo kïsï Yeso lasay. Kïlenchï Tïsintonay, “Omunyi muma ompö kaynata Tororöt nyo satate lö mwowu ne köny ato ichinyi Kristo,* Wero Tororöt.”

⁶⁴ Kuyokyï Yeso nyinte lö, “Kemwaghanyi! Wölo omwowokwa ye lö osïwïyekwa kïngeta ye Wero Chi kïtöpo ewu tagh nyo pö Kimuktoghin Tororöt akungwïno poltoy ompö yïm.”

⁶⁵ Otini kimwa lenyoni, kïkarer Tïsin nyo Wow sïrokachi akïlö, “Kemwa Tororöt! Tökïpö ne söwi walaka! Kalïmakwa ye kumwosïyi!

⁶⁶Olentekwa ne ye?” Kuyokyï pich löwïr lö, “Mïchini kïma chichï!”

⁶⁷ Kïlenyona kïngwïtyï konyïn, kurapach walaka ompö pïchini akïlenchï,

⁶⁸“Nyi Kristo, ngore lö ngo nyï kerapakinyi.”

⁶⁹Otini kimpuröy Petro sany köyini pö Tïsin Wow, kwitï työ nyo le mötworin akïlenchï, “Kimitenyi tïkwïl nko Yeso nyo pö Kalilaya.”

⁷⁰Wölo kïtiyeghö Petro tawungwa lö, “Monkïtönye ngalechoni imwöghenyi.”

⁷¹Otini kilïtï Petro kukat, kïsïwa mötworinte anka. Kïlenchï pich cho kimi otini, “Kimi chichete nko Yeso nyo pö Nasaret.”

⁷²Kïtiyö ngat Petro kïchïp kegh lö, “Monkïtönye chichoni!”

⁷³Kïnyini tomönye kite, kïpka pich kughyongö ato mi Petro akïlenchï, “Nyoman ichinyi akonga nyo pö pïchini, ompöwölo poru ngalanatengu!”

⁷⁴Atolapay kïchïp kegh Petro lö, “Monkïtönye chichoni!” Panini lawel, kïwach kïrpö kokoroch.

⁷⁵Kunan Petro ngalechay pö Yeso kilenchï, “Itiyonaninyi kïnyïl sömök kïtomö kïwach kïrpö kokoroch.” Kïwö sany akïloch nyoman.