Read pokoot MATAYO 28 Bible Online

MATAYO 28 - pokoot bible

MATAYO 28

¹Otini kimach kuwonyö asispa Sapato,* Chumapili kiwasan, kuwasta Marya Makdalena nko Marya nyay anka akïpa kuros pïrïmponay.

²Kurïngring ngwïnya ompö owesyö, kïrökunö malaykayanta Echotyon yïm, kïyumtö koghay akumpur parak.

³Kilata kïtontanyi kiryal akirelach sïrokachi löpöt.

⁴Kïpotonchö ripichay ompö nyökoryö nyo wow ntökïkarkegh nko meghon.

⁵Kïlenchï malaykayantanay koruchini, “Mowöghisïyi, onkïtön lö omörekwa Yeso, nyay kikïwudochï kimurtöwon.

⁶Möminye yi, kikututï lenyini kimwa nyinte. Apkane arosa wölini kirïwöy.

⁷Kïlenyona ape lawel amwochï kinetankachi lö, ‘Kikututï nyinte akïmi ye pan kuntöghowokwa kïwetöy Kalilaya, osöchinekwa nyinte wölini!’ Arosa anyï komwowokwa.”

⁸Kïngeta koruchay pïrïmponay lenyini kimïghyot wölo cho tïng ngörekyö nyo wow, kïryagh kïpa kïmwochï kinetankachi.

⁹Kïnyini kïtuyö Yeso nko chane akïlenchï, “Takwenya!” Kïpa koruchay wölini kimi nyinte akïkïtïngchï akïnam kelyechi akïsagh nyinte.

¹⁰Kïlenchï Yeso chane, “Mowöghisyö ape omwochinö werköcha kïpa Kalilaya, söchinanïn chane wölini.”

¹¹Otini kimi korï kïpetöy, kïnget askarin walaka cho kiripöy pïrïmponini kïmïlonchö kutang kanasyan akïmwochï tïsï cho echön ngalechini kighisyö löwïr.

¹²Kïtuyö tïsï cho echön nko poy akïtat ngalekwa, kutö askarin ropïyen cho chang

¹³akïlenchï, “Amwaghakwa kïnye lö, ‘Kapka kinetankachi oghö akïchor portanyi otini kikïmitecha kerusot.’

¹⁴Akwoto nkïtï pöytoghintö ngalechï, kengölonchinecha kunkïtï lö, motïngökwanye lelut tömonyorukwa nyarïl.”

¹⁵Kicheng ripichay ropïyen akwigh lenyini kikinetïta chane. Kïghömï ngalechoni kwenu pipö Yaudi nko nyete le ye.

¹⁶ Kïpa kinetanchay le taman nko akonga kutang Kalilaya ntökwit kutïngini kikikïmwochï Yeso chane.

¹⁷Nyini kisïwa chane nyinte, kïsagh, kïrkegh kitomtomön walaka ompö kwenungwa.

¹⁸Kïrich Yeso chane akïlenchï, “Kakekonanïn paytagh kïmïkul ompö yïm nko ngwïny.

¹⁹ Ape agha pipö punton löwïr kïlïkwï kinetankachan apatisan chane ompö kaynata Papo nko Weri nko Mïkulögh nyo Tïlil,

²⁰anet chane kïrïp ngal tïkwïl cho kochikwokwa, ankïtï lö omitan nko akwa osis löwïr ntökuwonyö ngwïnya.”