Read pokoot MATAYO 5 Bible Online

MATAYO 5 - pokoot bible

MATAYO 5

¹Otini kisïwa Yeso söpïchis, kïpus kutïng akumpur ngwïny. Kïpa kinetankachi wölo mi nyinte

²atolapay kutor kunet chane lö,

³“Soyönote pich cho nkït lö kïchï mey ompö tawu Tororöt, ompöwölo nyingwa Pöyunöto Yïm!

⁴ Soyönote pich cho sönöniot, ompöwölo syonchini Tororöt chane!

⁵ Soyönote pich cho tölose, ompöwölo mïlöy ngwïny.

⁶ Soyönote pich cho omöy kömöy nko maral nyo pö manpa Tororöt, ompöwölo kipïghyongöy.

⁷Soyönote pich cho syonchini pich, ompöwölo syonchini Tororöt chane!

⁸ Soyönote pich cho tïlilöch mïkulöwekwa, ompöwölo sïwïyi chane Tororöt.

⁹Soyönote pich cho linyot pich, ompöwölo kïkuro chane monïngo Tororöt!

¹⁰ Soyönote pich cho kichopöy kong ompö man, ompöwölo lïku nyingwa Pöyunöto Yïm.

¹¹ “Ochikwa soyönote ato chïpokwa pich akuchopokwa kong akïngalanenekwa ngal cho ghach ompö putintön, akwompö ani.

¹² Oturonchenö angörekyö, ompöwölo wow ropöwontenkwa nyo mi yïm. Ompöwölo kikichop kong werkoy cho kimi tawunkwa lenyoni.

¹³“Ochikwa partin ompö ngwïny. Wölo ato pot onyïnio partin, kïmökïminye or anka nyo tökwonyïnituno ngat. Melö tökunyiwu kïgh nyonikïny kïpoto kelasta akïtïkata pich.

¹⁴ “Ochikwa löpoyïn pö ngwïny. Möwïngonye kanasyanta nyo kikïtek kutïng parak

¹⁵ akï möminye chi nyo nömöy kitömöwon akïkartegha otupö, wölo syolöy töpöyöwe atökïlöpochï chi anka tïkwïl nyo mi kö.

¹⁶ Akanya nyu kulïwunö löpoyïntöngwo tawu pich atökïsïwa chane ighisyewutkökwa cho karamach atökïsal Papongwo nyo mi yïm.

¹⁷“Molenchï kegh kyangwïnan anategha Kirurut pö Musa anta kinetut pö werkoy. Mangwïnanye anategha, wölo kyangwïnan agh kïpïntö kinetutkökwa.

¹⁸ Ompöwölo omwowokwa nyoman lö, weröy yïmö nko ngwïny nyo mötïny, wölo mewerönye ompö kemeryanta kite nyo pö kirurut ntökïtenö kïpïntö tïkwïn löwïr.

¹⁹Kïlenyona, chi anka tïkwïl nyo penyöy ompö kirurut akonga nyo mïnïng tya ompö kirurutchï, akunet pikö walaka kwigh lenyoni, kïmïnïngitu nyinte tya ompö Pöyunöto Yïm. Wölo chi anka tïkwïl rïpöy akunetöy lenyini kekuro nyo wow ompö Pöyunöto Yïm.

²⁰Ompöwölo omwowokwa lö, momukekwanye ntolït Pöyunöto Yïm ato matïlnye kighanatenkwa nyo pö koneti kirurut nko nyo pö Parisaytin.*

²¹ “Kyalïmakwa kemwochï pich könyisyok lö, ‘Mepar chi, akï chi nyo kapar chi, kepöy ka kirwok.’

²²Wölo omwowokwa nyu ye lö, chi anka tïkwïl nyo nörekyini werïngwa, kepöy kokwö,* akwanka tïkwïl nyo kuro werïngwa sölwö, kuroko kewirchï mapa kokay.

²³Kïlenyona ato imököy töne Tororöt konutyengu ompö ato kïpelo amöros ainan ompö atoni lö mi kigheghchinogh nyo tïng werïnkwa ompö nyi,

²⁴ipïsyï konutyengu atoni kïpelo amörostin aiwö lawel ichomnyö nko werïngwo. Atolapay imïla itötö konutyengu.

²⁵“Nyagha chomnyenö nko chichini ipinyi kokwo kïtomö ata ka kirwok, atömepïn nyinte tawu kirwokin nyo mutöy ngaleku akutöninyi mori askaryon kïtorchinyi chela.

²⁶Omwowunyi nyoman lö mengetunonyinye wöloni ntökïtenö ghaktenanyi ompö nyo le sentöyon.

²⁷“Kyalïmakwa kemwa lö, ‘Megh cheporesnan!’

²⁸Wölo omwowokwa ye nyu lö chi anka tïkwïl nyo rosöy korka ompö pïrchin, kï kikwigh cheporesnan tïkwïl.

²⁹ Kïlenyona ato ighinyi kontangu nyo pö tagh igha ngokï, iködötï aiwirta! Ngwangwa chopanyi nyichay akonga nyo pö portöngu, kïtïl kewirchï portöngu kïmïkul mapa kokay.

³⁰ Akwoto ighinyi ewungu nyo pö tagh igha ngokï, imut aiwirta! Ngwangwa chopanyi ngichay akonga nyo pö portöngu kïtïl kewirchï portöngu kïmïkul mapa kokay.

³¹ “Kikïmwa ngat lö, ‘Chi anka tïkwïl nyo tyoköy korkenyi, nya kutö nyinte palalyanta kityakat.’

³² Wölo omwowokwa ye lö, ato tyak chi korkenyi, kïpoto ompö cheporesnan, kwighöy kokononi kïlïkwï chepores. Ato ip chi anka kokononi, kï kegh nyinte tïkwïl cheporesnan.

³³ “Kyalïmakwa ngat lö kikïmwochï pich könyisyok lö, ‘Mewalwal kegh ompö putintön, wölo ighchinönyi Echotyon kini kewolwolchinyi Echotyon.’

³⁴ Wölo omwowokwa ye nyu lö, mewalwal kegh nyonikïny, yïm ompöwölo ngacharu Tororöt nyo pö paytagh

³⁵ anta wolwolchï kegh ngwïny, ompöwölo ngacharu kelyechi anta ompö Yerusalem, ompöwölo kanasyanta Pöytoghin nyo wow.

³⁶Amewalwala kegh mötïngu, ompöwölo memukenyinye ighe putyon akonga kïrelit anta kïtuwit.

³⁷Nya kïlïkwï kïgh nyo imwoghöy, ‘Owöy’ anta, ‘Ewo.’ Kïgh anka tïkwïl nyo tïlöy nyoni, kungwïno wölo mi Onyötö.

³⁸“Kyalïmakwa kemwa lö, ‘Kong nko kong, kelat nko kelat.’

³⁹Wölo omwowokwa ye nyu lö, metak ato iwun chi nyo gha. Ato rapakïn chi lalapka okumpö tagh, iwöghökyï okumpö löt.

⁴⁰Akwoto ipinyi chi ka kirwok kïmököy kïchengöy syatingu, ipïsyï kwip koti tïkwïl.

⁴¹Akwoto chikyinyi chi kasana tïkuchi kilomita akonga, ikösönchï kilomiten odeny.

⁴²Ato somïn chi kïgh itö, ato mököy chi kïpösöneninyi kïgh ipösönchï.

⁴³ “Kyalïmakwa kemwa lö, ‘Chama pöröryengu airey punyontengu.’

⁴⁴Wölo omwowokwa ye nyu lö, ‘Achama punkökwo asoghchï pich cho chopokwa kong,

⁴⁵atalïkuna monïngo Paponkwa nyo mi yïm.’ Ompöwölo ighöy nyinte asistanyi kuluchï pich cho le mwokïyis nko cho karamach akïkonu rop kïropönchï pich cho pö man nko cho melö pö man.

⁴⁶Ato achamakwa pich cho chömekwa, onyorukwa tösunöt ne? Ompöwölo ighöy lenyoni tïkwïl kwöghi surï!

⁴⁷Kwato ato atakwesakwa kongotikwa opïn, kïkaghakwa ne nyo tïlate kïsïr pich walaka? Ighöy lenyoni tïkwïl pipö punton.

⁴⁸ Alïkuna nyu pich cho tenote le wölo lata Paponkwa nyo mi yïm.