Read pokoot MATAYO 8 Bible Online

MATAYO 8 - pokoot bible

MATAYO 8

¹Otini kirökunö Yeso kutïngoni, kïrïp söpïchis cho chang.

²Kïlenyona kïwechï nyinte chi nyo kyamate psenkwet akïkïtïngö tawunyi akïlenchï, “Ato imökenyi, Echotyon, imukenyi isopanïn.”

³Kughïtö Yeso ewunyi akïswany akïlenchï, “Omökan, tïlilitunö!” Kïnyini lawel kïsöpö nyinte sömewononi.

⁴ Atolapay kïlenchï Yeso chichay, “Tere! Memwochï chi nyonikïny ngalechï, wölo wïyö wölo mi tïsin aikany kurosinyi aitötö konutyengu le ato kiyomïs Musa pich atökunkïtï chi anka tïkwïl lö kesöpönyi.”

⁵Otini kilït Yeso Kapernaum, kïtuyeghö wowïn pö askarin

⁶nyo kisagh nyinte lö, “Echotyon, chirate mötworintenyan nyo mi kaw, rïwöy kimeyta por, akïmemukonye ntökïnget, chirate nyoman.”

⁷Kuyokyï Yeso lö, “Ongwïnan osopöy nyinte.”

⁸Wölo kuyokyï wowïnay pö askarin lö, “Ewo, Echotyon, ochan mïnïng tya nyo melö mïchini lïtönyi konyan. Mwagha pat ngölyon atökïsöp mötworintenyan.

⁹Ompöwölo ochan chi nyo kïpöytenon tïkwïl atïngetan askarin cho opöytenan. Omwochinan akonga lö, ‘Wïyö,’ kïwetöy, amwochan anka lö, ‘Nyonö yi,’ kungwïnöy, amwochinan sekeyontenyu lö, ‘Igha ki,’ kwighöy!”

¹⁰Otini kilïm Yeso lenyoni, kïtöngönchï nyoman akïlenchï pïchoni kirïpöy nyinte, “Omwowokwa nyoman lö, tomönye osöchan chi koro Israel nyo tïng kighanat nyo lata nyï.

¹¹ Omwowokwa nyoman lö pkono pich cho chang kongasis nko ta akïpka kumpur akwomisyö nko Apraam nko Isak nko Yakopo ompö Pöyunöto Yïm.

¹² Wölo kïwirchini wölo tuw pïchini kötöpöyitu Pöyunötö yïm, riryegho nyu chane wöloni akïnyagh kelat.”

¹³Atolapay kïlenchï Yeso wowïnay pö askarin, “Wïyö katangu, nya kwigha ompö nyi lenyini keghananyi.” Kïsöp mötworintonay pö wowïnoni pö askarin panini.

¹⁴Aki nyini kilït Yeso kö pö Petro, kïnyorï pokör pö Petro chirat rïwöy pöröy, kyamate tïnyon.

¹⁵Kïswany Yeso ewunyi, kïweghö tïnyontonay, kïnget akïpöghisyechï chane.

¹⁶Otini kimön, kemïtyï Yeso pich cho chang cho kipote oy. Kiyon oyichoni ghach ompö ngölyontenyi akusop pich löwïr cho kichirsot.

¹⁷ Kigh lenyoni atökumï kwitïta lö man ngölyonto werkoyon Isaya nyo kimwa lö, “Kicheng nyinte nyörkölelyencha akïkasan sömewutköcha.”

¹⁸Otini kisïwa Yeso söpïch nyo kiwitwit nyinte, kïmwochï kinetankachi kïpa kwoghyö nanam antakwagh.

¹⁹Kungwïn konetinto kirurut wölo kimi nyinte akïlenchï, “Omitan kïpsach konetin arïpatinyi ompö wop anka tïkwïl wölo iwetenyi.”

²⁰Kuyokyï Yeso nyinte lö, “Tïngeto chepkonöw pïrïmpotikwa akïtïng töritwö korikwa, wölo mötïngnye Wero Chi wölo rïwöy.”

²¹Kïlenchï kinetanenyi anka, “Echotyon, pïswante anyagh owö otïp paponyu.”

²²Wölo kuyokyï Yeso nyinte lö, “Nya kïtïp pich cho kimeghö meghonkökwa, rïpaninyi.”

²³Otini kilany Yeso meli, kïpa kinetankachi nko nyinte.

²⁴Akïtökïnyini kïkut chepkïrïri nanamay, löt tökulum pögh melinay. Wölo kirïwöy Yeso.

²⁵Kïpa kinetankachi kunget. Kïlenchï, “Sörwech, Echotyon kakewonyecha!”

²⁶Kïlenchï Yeso, “Ompö ne towöghisyenökwa? Akwa pïchï mïnïng kighanatenkwa!” Atolapay kïnget akuteghchï chepkiririnay nko mirtino pögh kïsisyö, kïsï nanamay lasay.

²⁷Kïtöngönchï pïchay akïlö, “Ne chitö nyï nya terchini ompö yomöt nko mirtino pögh?”

²⁸Otini kiwö Yeso kwoghyö okumpö Kadaren, nanam antakwagh, kïtuyeghö pich odeny cho kipkono wölo kile parsïkontin. Kipote oy pïchoni akiköromöch chane tya ntökïmelö kitökumuköy chi ntökuwer aranoni.

²⁹Kïnyini kuteghyö tya lö, “Kïtïngecha kegh ne nko nyi nya, Wero Tororöt? Kengwïnanyi so inyarilecha kong kïtomö kwitïta asistanyi?”

³⁰Kimi nyu ato lekïto atoni okwot pö nkïruwen nyo kyoketïyi.

³¹Kïsom oyichay Yeso lö, “Ato imökenyi itulecha, iyontecha kelïte okwotara pö nkïruwen.”

³²Kïchömchï Yeso chane lö, “Ape.” Kïpa akïlïtöy nkïruwenichay. Kïryagh okwotnoni pö nkïrwen kïmïkul kururtoy wölo le ngötut akïlïtöy nanam akuwonyechï wölini.

³³Kïryagh mösöwechoni kiyokwïyi nkïrwenichoni kutang kanasyan akïmwochï pich lökoyechoni löwïr nko kïgh nyo kigha ompö pïchoni kipote oy.

³⁴Kïnyini, kïngetunö pich löwïr kanasyan akïpa kïtaroch Yeso, otini kisïwa chane nyinte, kïsagh kïngeta korengwa.