Read pokoot MATAYO 9 Bible Online

MATAYO 9 - pokoot bible

MATAYO 9

¹Kïlany Yeso meli akïmïla kwoghyö nanamay akïwö kutang kanasyantenyi.

²Kumïtyï pich nyinte chi nyo kisipö por nyo kirïwöy pöröy. Kïsïwa Yeso wowïnto kighanatengwa, kïlenchï chichay kisipö por, “Inyakanitï, werïnyu, kakelöstowunyi ngokiku.”

³Atolapay kutor koneti kirurut walaka cho kimi atoni kïmwochinchö lö, “Kemwagh chichï Tororöt!”

⁴Kïpköchï Yeso ngalechoni kinonöy chane, kïlenchï, “Ompö ne tononokwa mïkuliskökwo ngal cho ghach?

⁵Kwïskwïs kemwa lö, ‘Kakelöstowunyi ngokiku,’ nya anta kemwa lö, ‘Ngeta aiwechï kegh?’

⁶Oporwokwa ye nyu lö tïng Wero Chi wowïn ompö ngwïny nyo löstoghchini pich ngokï.” Kïlenchï chichay, “Ngeta aicheng menyontengu aiwechï kegh katangu!”

⁷Kïnget chichay akïwechï kegh katanyi.

⁸Otini kisïwa söpïchoni, kuwöghisyö akukus Tororöt nyo kitö pich wowïn nyo lata nyoni.

⁹Kïngeta Yeso atoni, akwotini kimi kïwetöy kïsïwa chi nyo le kwöghinto surï nyo kikïkuro Matayo, mito kumpuröy kokwenyi wölo kikwögho surï. Kïlenchï, “Rïpkanïn.” Kïnget Matayo akïrïp nyinte.

¹⁰ Akwotini kimi Yeso kö pö Matayo kwomisïyi, kïpka kwöghi surï walaka cho chang nko mwokïyiskö walaka akumpur nko nyinte kïmi nko kinetankachi.

¹¹Otini kïsïwa Parisaytin,* kïlenchï kinetankachi, “Ompö ne tökwomisïyi konetintenkwa nko kwöghi surï nko mwokïyis?”

¹²Kïlïm Yeso ngalechoni, kïlenchï, “Melö möröy pich cho melö chiryot chepsakïtyan, kïpoto cho chiryote.

¹³ Ape aneta kegh lö mwoghöy ne Kikirutchay lentöy, ‘Opïrchinan kisyonchin, amelö amörostin.’ Ompöwölo kimangwïnanye okur pich cho karamach kïpoto mwokïyis.”

¹⁴Atolapay kïpka kinetanpa Yoana Kipatisanin wölo mi Yeso akïtep nyinte lö, “Ompö ne tökekïrurecha nko Parisaytin kïnomnyö amelö kïruröy kinetanköku?”

¹⁵Kuyokyï Yeso chane lö, “Olentekwa so, muköy toyo kensyö kïkïruröy otini tökïmi chi pö koyögh nko chane? Muko nyo mi onö! Wölo pkonöy osiswö ato kïchengo chane chi pö koyögh, kïkïrur nyu chane asisoni.

¹⁶“Möminye chi nyo kïno kïnöwon nyo rel sïra nyo kayosit, ompöwölo köreröy sïre tya nyinö kiyosit.

¹⁷Ametöninye chi dipay* cho kötökeryököy tökol cho kiyositu. Ato igh lenyoni, kïköreröy tökolkö akïmïlta kegh dipayka kunyorisyö tökolkö. Wölo kitöni dipay cho kötökeryököy tökol cho relach tökïrorisyö.”

¹⁸Otini kitökïmi Yeso kïmwochini chane ngalechoni kungwïn kintöghoghinto pipö Yaudi akong akïkïtïngö tawunyi akïlö, “Kötökïmeghöy cheptönyan, wölo nyonö kanagha ewungu parakunyi tökïsöp.”

¹⁹Kïnget Yeso akïrïp chichay, kïpa kinetankachi tïkwïl nko nyinte.

²⁰Kimi korka nyo kikuyit könyis taman nko odeny, kungwïn akïrïp Yeso löt akïswany sörömuto sïrenyi.

²¹Kinonchï kegh lö, “Ato aswangan sörömuto sïrenyi kwïle, osöpan.”

²²Kiwaghaka Yeso akïsïwa nyinte, kïlenchï, “Inyakanitï, cheptanyu kakusopinyi kighanatengu.” Akïnyini lawel kïsöp kokonay.

²³Otini Yeso akïlït kö pö pöytoghintonay. Kïsïwa pich cho kikutöy pkurerun nko pich cho kiriryot,

²⁴kïlenchï, “Angete ape! Tomönye kïma chepï kör, wölo rïwöy!” Kïroröchï chane nyinte.

²⁵Kïkany kïpa pïchay sany, kïwö Yeso kïlït köyoni kimi cheponi akïnam egh, kïnget.

²⁶Kïyasta ngalechoni kighomï korononi kïmïkul.

²⁷Otini kiweghö Yeso atoni kirïp pkörotonoy, odeny nyinte. Kuteghyö lö, “Wero Daudi syonchecha!”

²⁸Kïkany otini kilït nyinte köyay, kïlïtu pïchay le odeny köryote akïpa wölo mi nyinte, kïtep Yeso chane lö, “Oghönekwa lö omukan oghwokwa ngölyontononi?” Kuyokyï lö, “Owöy, Echotyon!”

²⁹Atolapay kïswany Yeso konyikwa akïlö, “Nya kwigha ompö akwa lenyini kaghanakwa!”

³⁰Kïyotisyö konyikwa. Kïtagha Yeso chane nyoman lö, “Momwochï chi nyonikïny!”

³¹Wölo kïpa akïmwatïta ngalechay pö Yeso kïghömï korononi kïmïkul.

³²Akwotini kimi pich kïpetöy, kumïtyï pikö walaka Yeso chi nyo kimangate, ompöwölo kipote oy,

³³akwotini kikitul oyichay, kutor chichay kïngalan. Kïtöngönchï pich löwïr akïlö, “Tomönye kesöchinöcha kïgh nyo lata nyï koro Israel.”

³⁴ Wölo kïlö Parisaytin, “Wowïn pö oy nyoni töni nyinte owesyö nyo yono oy.”

³⁵ Kiwö Yeso kïrutochï kanastin cho echön nko cho mïnkech cho kimi korononi kïmïkul. Kunetisyö ompö korikwa pö sowut akwamta Lökoy cho Karamach cho pö Pöyunöto Yïm, akusopö pich sömew anka tïkwïl nko kosotyö anka tïkwïl.

³⁶ Kikany kisïwa nyinte söpïchis, kusyonchï nyinte chane nyoman, ompöwölo kyoghochö akïtoytoyö le kechir cho kipuryö mösöwon.

³⁷ Kïlenyona, kïlenchï kinetankachi, “Mito ilö nyo wow, wölo ngörï pikö cho pöghisïyi.

³⁸Kïlenyona nyu, asagha Echotyonto ilö kïyonta pich kïpa kwilisyö.”