Read pokoot MARKO 1 Bible Online

MARKO 1 - pokoot bible

MARKO 1

¹Kitoröto Lökoy cho Karamach cho pö Yeso Kristo* Wero Tororöt

² le wölo kikirta werkoyon Isaya lö, “Oyontonan chi nyo ntöghoghunyi, atökwighunyi arengu,

³ mi chi nyo tegho surkwen lö, ‘Agha ara Echotyon, oghïtenö ortïnechi.’ ”

⁴Kichumuna Yoana Kipatisanintö surkwen kwomchini pich lö, “Okötenö ngokikwo tökepatisanak, akïlöstewok Tororöt ngokikwo.”

⁵Kïghamïtuna kegh pich koro Yudea nko kanasyanta Yerusalem kïmïkul kïpa kïter ngala Yoana. Kïnganyta chane ngokikwa, kupatisan Yoana chane ompö lalwa Yordan.

⁶ Kiloköy nyu Yoana sïro cho kikïnapa puto tamas nko angwa mu akyomöy talam nko ponit.

⁷Kyomtoy kïlentöy, “Pïnï chi lötunyan nyo wow kïtïlanïn, chi nyo mömïchinanïnye ompö atyak kweghkachi.

⁸Opötisönekwa ompö pögh, wölo pötisönekwa nyinte ompö Mïkulögh nyo Tïlil.”

⁹Kingwïna Yeso osiswechoni Nasaret nyo mi Kalilaya, kupatisan Yoana nyinte ompö lalwa Yordan.

¹⁰Panini lawel kipusuna Yeso pögh, kïsïwa kïyata yïmö kïrökyï nyinte Mïkulögh nyo lata chepïrïm.

¹¹ Kungwïna kut yïm, “Ichinyi Werïnyan nyo le chamanenyan. Ochömeninyi kegh tya.”

¹²Kïtökïnyini lawel kumït Mïkulögh kïwö surkwen.

¹³Kïtöpö wölini osis tömönut angwan kïtyömöy Onyötö nyinte. Kimito nko tïpö wudïn, kipka malayken kïpöghisyechï nyinte.

¹⁴Otini kikïrat Yoana, kïwö Yeso kutang Kalilaya kwomtotoy Lökoy cho Karamach cho pö Tororöt,

¹⁵ kïlentöy, “Kikwitïta osiswö, kirikwï Pöyunöto Tororöt, okötenö ngokikwo, aghan Lökoy cho Karamach.”

¹⁶Otini kimi Yeso kuweröy sörömu nanampa Kalilaya, kïsïwa nömi kaghagh odeny, Simon nko werïngwa Andrea kinömo kaghagh net.

¹⁷Kïlenchï Yeso chane, “Arïpkanïn ataghakwa alïkuna nömi pich.”

¹⁸Kïpïstö netinekwa lenyini akïrïp nyinte.

¹⁹Kïwö yona kite kïsïwa pich odeny cho tupchö, Yakopo nko Yoana, werpö Sepedayo cho kimi meli ori, kïnöpöy netinekwa.

²⁰Kïnyini lawel kikur Yeso chane. Kïpïsyï papongwa Sepedayo meli nko mötwor akïrïp Yeso.

²¹Kïpa kanasyanta Kapernaum, kïlït Yeso kö pö saghat* lenyini ompö asispa Sapato,* akutor kunetisyö.

²² Kïtangany pich cho kilïm kinetutkachi, ompöwölo melö kinet le wölo kinetïtoy koneti kirurut, kinet le chi nyo kitïng owesyö.

²³Kïnyini kïlïtï chi nyo kitïng oy kö pö saghat* akuta lö,

²⁴“Kïtïngetecha ne nko nyi nya Yeso nyo ipo Nasaret? Kengwïnanyi iparecha? Onkïtön nyoman lö, ichinyi Nyo Tïlil nyo pö Tororöt.”

²⁵Kupkong Yeso lö, “Sisa aingetunö chichï!”

²⁶Kutimtim oy chichan tya akuta, atolapay kungwïna nyinte.

²⁷Kïtangany pïchay löwïr akutor kïtep kegh lö, “Kïgh ne nyï? Kinetut cho sis? Cho tïng owesyö nyo muköy kuteghchinegho oy akïterchï oy!”

²⁸Kïyasta lawel lökoyo Yeso kïghömï Kalilaya kïmïkul nko korokwechi.

²⁹Panini lawel kïngeta Yeso kö pö saghat, kïwö nko Yakopo nko Yoana kutang ka ompö Simon nko Andrea.

³⁰Kichirate pokörto Simon, kimi kïrïwöy ompöwölo kinamate tïnyon, nyini kïlït Yeso köyay kemwochï lawel ngala poray.

³¹Kïwö wölo kimi nyinte, kïnam ewunyi akunget, kïsöpö tïnyontonay. Kïnget akwighchï pïchay omisyö.

³²Otini le mönon kiröytoy asis, kemïtyï Yeso pich cho chiryote nko cho kipote oy.

³³Kïghömïtyï kegh köyay kukat piko kanasyantanoni kïmïkul.

³⁴Kusop Yeso cho chang ompö chane cho kichiryote nko cho kinamate sömewut cho sisinchö akutul oy cho chang, akimöpïsyïnye oy kïngalan nyonikïny ompöwölo kinkït nyinte.

³⁵Kïngeta Yeso kiwasan, kïwö wölo le sison kïsagh.

³⁶Kïmarata nyinte Simon nko pich cho kimi tïkwïl.

³⁷Otini kinyorï Yeso kïlenchï, “Mörinyi pich löwïr.”

³⁸Kuyokyï Yeso lö, “Kepe tagh metanga kestonichara lekïtöch, atamtan ompö wölini tïkwïl, ompöwölo pöghisyonete nyo kyongwïchan.”

³⁹ Kïlenyona, kiwestegho Yeso Kalilaya kïmïkul, kwomchinotoy ompö korikwa pö sowut akutulöy oy.

⁴⁰Kungwïn chi nyo kyamate psenkwet akïkïtïng ompö tawu Yeso akïlö, “Ato imökenyi, imukenyi sopanïn.”

⁴¹Kusyon Yeso kukana nyinte ewunyi akïlenchï, “Omökan, söpö!”

⁴²Panini lawel kïsöpö psenkwetnay.

⁴³Atolapay kuros Yeso chichay kong, kïyonta nyinte lawel

⁴⁴ kïlenchï, “Memwochï chi ngalechï nyonikïny, wölo wïyö porchinö kegh tïsin, atolapay itötö ropöwon nyo kiyomis Musa ompö kisopötengu atökïsïwa pich tïkwïl lö kesöpönyi.”

⁴⁵Wölo kïwö chichay akïmwatïta ngalechay kïghömï wop löwïr ntömökumïnye Yeso ngat kïlït kanasyan kesïwïyi, wölo kitöpö wölo kile siriron, kïpkana pich woptin lapay kïpka wölo mi nyinte.