Read pokoot MARKO 10 Bible Online

MARKO 10 - pokoot bible

MARKO 10

¹Kïngeta Yeso atoni, kïwö kutang okumpö Yudea akwoghyö lalwa Yordan. Kighömïtyï kegh tuyot nyo wow nyinte ngat, kunet chane le wölo kenetïtoy kïnomnyö.

²Kïpkonchï Parisaytin* atökïtyam nyinte, kïtep lö, “Chömunote kïyon chi korkenyi anta ewo?”

³Kuyokyï Yeso chane lö, “Kimwowokwa ne Musa?”

⁴ Kuyokyï lö, “Kichömwecha Musa kukirchï palalyan nyo pö korka kityakat atökumï kïyon nyinte.”

⁵Kuyokyï Yeso lö, “Ay, kimwowokwa Musa lenyoni ompö oghïghyeto mïkulöwekwa.

⁶ Wölo kïngeta otini kikïtowï ngwïny, kï kigh Tororöt mïrön nko korka.

⁷ Nka nyoni pökoktoy chi kwanta nko kame akïnomnyö nko korkenyi

⁸akïlïkwï chane kwodeny akonga, amelö tökwodeny chane ngat, wölo akonga.

⁹Nyo merokonye kepesyö pich cho kakunomnyö Tororöt.”

¹⁰Kïtep kinetankachi ngat ngölyontonay otini kilït kö.

¹¹ Kïlenchï, “Chi nyo tyoköy korkenyi akwip anka, kwighöy cheporesnan,

¹²akwanka tïkwïl nyo ipöy korka nyo kakityak kwighöy cheporesnan.”

¹³Kimïtyï pich monïng Yeso tökukanagh ewunechi chane, wölo kïtagha kinetankachi pïchay.

¹⁴Kïkany kïsïwa Yeso, kïnarek akïlenchï kinetankachi, “Opïstenö monïng kïpka wölo omitan, motögho chane ompöwölo pö Pöyunöto Tororöt pich cho lata chete.

¹⁵ Omwowokwa nyoman, lö chi anka tïkwïl nyo mötochönye Pöyunöto Tororöt le monïng kïmölïtönye wöloni nyonikïny.”

¹⁶Kïsïtyï monechay kïpesyenyi akuperur, kukanagh ewunechi parakungwa.

¹⁷Otini kimi Yeso kïnopöy kegh kïwetöy rutoghtanyi, kurïpï chi akïkïtïngö tawunyi akïlenchï, “Oghan ne tosïkön söpon pö kokay nya konetintonï karam?”

¹⁸Kïlenchï Yeso chichay, “Ompö ne tekurenaninyi lö karam? Möminye chi nyo karam kïpoto Tororöt onkït.

¹⁹ Inkïtönyi kirurut chay lentöy, ‘Mepörisyö, megh cheporesnan, mechorsyö, mesöwintönchï putintön, melïsisyö, itech kon nko komöt.’ ”

²⁰Kuyokyï lö, “Konetin, kyarïpan choni löwïr kïngeta otini kyanaran.”

²¹Kuros Yeso nyinte akïngölonchï nyo karam kïlenchï, “Köngötunyi kïgh akong, wïyö altena tïkuku lapay cho itïng aitö mey tenyorunö sïkönöt ompö yïm, atolapay ingwïn irïpkanïn.”

²²Nyini kïlïm chichay ngalechoni, kïma mu, akïwö kïnörekotoy ompöwölo ki sïkön nyinte nyoman.

²³Kuros Yeso wop lapay akïlenchï kinetankachi, “Ochï aghïgh nyoman kïlït sïkönö Pöyunöto Tororöt!”

²⁴Kïtangany kinetankachi ompö ngalechoni, wölo kïlenchï Yeso, “Monechu aghïgh kïtya kelït Pöyunöto Tororöt!

²⁵Nyïmnyïm tamas kïlït kompa södök kïsir kïlït monkoryonta Pöyunöto Tororöt!”

²⁶Kïtöngönchï chane nyoman, atolapay kïlö, “Ekïngo nyu nyo kïsöru?”

²⁷Kuros Yeso chane akïlenchï, “Memukonye nyoni ompö ptangengmöt, wölo muko ompö Tororöt. Mukisot tïkwïn lapay ompö Tororöt.”

²⁸Kutor Petro kïlö, “Rose lö kakïpïstecha tïkucho löwïr akerïpinyi!”

²⁹Kïlenchï Yeso, “Nyoman wölo mwowokwa lö chi anka tïkwïl nyo köpïstö konyi, anta werkökwa, anta tipikwa, anta kwanta, anta kame, anta monechi anta parenichi kïpïsteghenanïn nko Lökoyechï Karamach,

³⁰kïnyoru tya kïnyïl pokol atï le ye, nyoru korïn nko werkökwa nko tipikwa nko yotïnechi nko monechi nko paren akïnyorï kichopata kong tïkwïl nko söpon pö kokay ompö osis cho pkonöy.

³¹ Wölo chang pich cho mi ye tagh cho pöyitu löt asïyech akï chang pich cho mi löt cho petöy tagh asïyech.”

³²Kipetöy chane kutöngöy Yerusalem, akimi Yeso kuntöghoghchini kinetankachi, kïtangany kinetankachi akuwöghisyö pich cho kirïpöy. Kumït Yeso kinetankachi ngat kïpa yona akïmwochï, chane ngal lapay cho ighisyot ompö nyinte ato lekït.

³³Kïlenchï, “Arose lö, kïpetöy ketöngöy Yerusalem akï wölini wölo kitötegho Wero Chi ketöni mori tïsï cho echön nko koneti kirurut. Mutyini chane nyinte kepar kïma, atolapay ketö ewuno pipö punton.

³⁴Ngemöy chane nyinte akïngwïtyï akïmuny, akïpar, wölo ato wonyö osiswö sömökï kututï.”

³⁵Kïpa werpö Sepedayo, Yakopo nko Yoana wölo mi Yeso akïlenchï, “Konetin, kïmökecha ighwechanyi kïgh nyo kïsomecha.”

³⁶Kïlenchï Yeso, “Ne kitö nyini oyörekwa oghwokwa?”

³⁷Kuyokyï chane lö, “Konecha kïtöpö chi akong ompö acha ewungu nyo pö tagh kïtöpö anka ewungu nyo pö löt ompö Paytaghto ororyengu.”

³⁸ Kïlenchï Yeso chane, “Monkïtökwanye kïgh nyo osomöy, omukekwa ogheghtone kikompa nyo ogheghtonan omukekwa kepötisönok le wölini kipötisöntonanïn?”

³⁹Kuyokyï nyinte lö, “Ay, kimukecha.” Kïlenchï Yeso, “Owöy omukekwa ogheghone kikompa nyo ogheghtonan, akepatisanakwa le wölini kipötisöntonanïn.

⁴⁰Melö ani nyo okïlchini chi kïtöpö ewunyan nyo pö tagh anta nyo pö löt. Wölo pö pich cho kikelöwönchï.”

⁴¹Nyini kilïm kinetanchay le taman ngölyontononi, kïnörekyï Yakopo nko Yoana.

⁴² Kïkur Yeso chane löwïr akïlenchï, “Onkïtökwa lö pöghisyegho pich cho kiyitöy lö pöytoghi pipö Punton kat otini pöytoy pikökwa akwighöy kintöghoghikwa chane kïlïkwï mötwor.

⁴³ Wölo makany kï lïkwï nyoni ompö akwa. Ato mököy chi ompö akwa kïwowitu kïmïchini kïlïkwï mötworintenkwa

⁴⁴akwato mököy chi ompö akwa kïlïku nyo pö tagh, kïlïkwï mötworinto pich lapay.

⁴⁵Ompöwölo mengwïnye Wero Chi atökepöghisyechï, kingwïn kïpöghisyö atökïkonï söpontanyi kïsörï pich cho chang.”

⁴⁶Kwitïta Yeriko, kïkany kïngeta Yeso Yeriko nko kinetankachi nko söpïch nyo wow, kimito chepkarot nyo kimpuröy arawet kamas, kïsomsïyi, nyo kikuro Partimayo wero Timayo.

⁴⁷Nyini kilïm lö ki Yeso nyo pö Nasaret nyoni kiweröy, kutor kuta lö, “Yeso wero Daudi, syonchante!”

⁴⁸Kuteghchï pikö walaka nyinte lö, “Sisa!” Wölo kuta tya ngat lö, “Wero Daudi, syonchante!”

⁴⁹Kughyö Yeso akïlö, “Okurunö nyinte.” Kekurï chepkarotnay akelenchï, “Nyakanituna, ngeta, kurïnyi nyinte.”

⁵⁰Kïnget lawel akuchodö sïrenyi akïwö wölo mi Yeso.

⁵¹Kïtep Yeso nyinte lö, “Imökenyi owunyi ne?” Kuyokyï chepkarotnay lö, “Echotyon igha konyichan kurosta.”

⁵²Kïlenchï Yeso, “Wechinö kegh, kakusopinyi kighanatengu.” Kurosïta lenyini lawel akïwö nko Yeso.