Read pokoot MARKO 11 Bible Online

MARKO 11 - pokoot bible

MARKO 11

¹Otini kirich chane Yerusalem, kurel kanastina Petpake nko Petaniya, ato lekïto kutïng pö Arol, kuyoktö Yeso kinetankachi odeny.

²Kuyomis lö, “Ape kanasyantaninö ate mi tawunkwa, nyini katïtekwa wölini osïwïyekwa wawa sïkïryö nyo ratate, nyo tomönye kïweghö chi, atyaka akötï.

³Akwato tepakwa chi lö, ‘Ompö ne totyokekwa waweto sïkïryö?’ Olenchï, ‘Mököy Echotyon wawanete pö sïkïryö,’ akuyoku kungwïn yete lawel.”

⁴Kïlenyona kïnam or, kïnyorï sïkïryö kikïrötyï kukat sany ato le apuke, kutyak,

⁵kïtep pich cho kighyongo atoni lö, “Ompö ne totyoke waweto sïkïryö?”

⁶Kimwochï le nyaye kömwochï Yeso chane, kepïstö chane kïpa.

⁷Kïkötï wawanay pö sïkïryö wölo mi Yeso, akukorkorchï sïrokökwa parakuto sïkïryonay, atolapay kïweghö Yeso sïkïryonay.

⁸Kukorkorchï pich cho chang sïrokökwa araor, kukarkar pikö walaka sökö cho kirïnga ket.

⁹ Kuteghyö pich cho kintöghoghöy nko cho kirïpöy löt ompö kut nyo wow lö, “Osana! Nya kusoyönö nyinte nyini ngwïnöy ompö kayna Echotyon!

¹⁰Nya kusoyönö paytaghpa paponcha Daudi nyo ngwïnöy! Nya kïsala Tororöt!”

¹¹Kïlït Yeso Yerusalem akïwö kïlït Kö pö Tororöt,* kuros tïkwïn lapay lasin. Wölo ompöwölo kökituwit, kïlïtï sany akïwö nko pïchay le taman nko odeny kutang Petaniya.

¹²Asïyechu otini kipkono Petaniya kusut Yeso.

¹³Kïsöchï moköngwö wölo low nyo kilumate sökö. Kïwö kutang ketay lö, tonyorï akwa wölo nyini kitïta ketay kïmökïnyorïnye kïpoto sökö, ompöwölo kïtomönye kwitïta ato yinöy makany.

¹⁴Kïlenchï Yeso ketay, “Kïngeta ye mökwomeninyinye chi akwa, kokay!” Kilïmöy nyu kinetankachi ngalechoni.

¹⁵Kwïtïta Yerusalem, kïwö Yeso kïlït Kö pö Tororöt akutor kïmas pich cho kyolöy nko cho kyoltoy tïkukwa ompö Kö pö Tororöt. Kïköpïghon meseni pich kiwöghököy ropïyen nko ngöcherwo pich cho kyoltoy chepïrïmpen

¹⁶akimöchömchïnye chi anka tïkwïl kwip kïgh kiweghö Kö pö Tororöt.

¹⁷ Atolapay kunet chane lö, “Kïchï mekiratnye so lö, ‘Kïkuro Konyan kö pö saghat* nyo pö pich lapay?’ Wölo kawaghakakwa kïlïkwï köpöno mosï!”

¹⁸Kïlïm tïsï cho echön nko koneti kirurut ngalechoni, kïyar wölo pörtoy Yeso. Wölo kuwagh chane nyinte ompöwölo kitöngönchï söpïch kïmïkul kinetutkachi.

¹⁹Kïkany kwimön, kïngeta Yeso nko kinetankachi kanasyantanay.

²⁰Otini kini chane kuwerotoy aranay tökwoghö, kïsïwa moköngwonay kiyam kïyamta ighin.

²¹Kunan Petro ngalechay akïlenchï Yeso, “Echotyon rose lö, kiyam moköngwonay kechïpönyi.”

²²Kuyokyï Yeso chane lö, “Aghana Tororöt.

²³ Omwowokwa nyoman lö, ato lenchï chi kutïngï, ‘Ngöwunö kegh aichoghchï kegh nanam.’ Amötomtomönönye ompö mïkulöwunyi, aghan lö, igho kïyoni lenyini, keghchini nyinte.

²⁴Kïlenyona omwowokwa lö, kïgh anka tïkwïl nyo osomekwa ompö saghat, aghan lö kyonyorukwa, anyorunekwa lenyoni.

²⁵ Akwatoni koghyongökwa asagh, olöstoghchï chi anka tïkwïl nyo kölelwok, atökumï kïlöstowok Papongwo nyo mi yïm lelutkökwo. [

²⁶Ato molöstoghchikwanye pich ngokikwa, kïmölöstowokwanye Papongwo nyo mi yïm ngokikwo.”]

²⁷Kïmïlisyö ngat Yerusalem. Otini kiwestegho Yeso Kö pö Tororöt kïpkonchï Yeso tïsï cho echön nko koneti kirurut nko poy

²⁸akïtep lö, “Ngo nyo kömwowunyi lö igha tïkuchï? Ayo, kenyorchinyi onö owesyonï ighonenyi tïkuchï?”

²⁹Kïlenchï Yeso, “Nya tepakwa teput akonga, nyo ato oyokwanïkwa, omwowokwa lö oghan tïkuchï owesyo ngo.

³⁰Kingwïna kipatisanata Yoana yïm nya anta kingwïna pich?”

³¹Kutor kumölomöl kegh chane lö, “Ato kïlecha, ‘Kingwïna Tororöt,’ kïlentöy, ‘Kwato lenyona kwompö ne tömaghanakwa Yoana?’

³²Wölo ato kïlecha kingwïna pich?” (Kuwagh chane pich ompöwölo kikït pich lapay lö werkoyonto man Yoana.)

³³Kuyokyï Yeso lö, “Mökinkïtöchanye.” Kïmwochï Yeso tïkwïl chane lö, “Kïmomwowunanye tïkwïl lö owesyo ngo nyo oghonan ngalechï.”