Read pokoot MARKO 13 Bible Online

MARKO 13 - pokoot bible

MARKO 13

¹Otini kingetunö Yeso Kö pö Tororöt, kïlenchï kinetanenyi akong, “Rose konetin lö, pö töngönchin koghichï nko teksyonï!”

²Kuyokyï Yeso lö, “Osïwïyekwa teksyonete wow le nyï? Möminye kögh nyo le ompö akonga nyo kïpïsini kughyongo parakuto anka, kityorchini ngwïny löwïr.”

³Akwotini kimi Yeso kumpuröy kutïng pö Arol, nyo kipoyot kegh nko Kö pö Tororöt, kïtep Petro nko Yakopo nko Yoana nko Andrea, Yeso ato kimi chane opïn lö,

⁴“Mwowecha ato ighisyot ngalechï aimwowech kïgh nyo poru lö, ketïta ato pïntegho ngalechini löwïr.”

⁵Kutor Yeso kïmwochï chane lö, “Orip kegh tömölïsak chi.

⁶Pkonöy cho chang ompö kaynatenyan cho lentöy, ‘Ochan nyinte!’ Lïsöy pich cho chang.

⁷Mosus kegh ato alïmakwa kighumöto lïkos nko mwowunöto poryot. Itu tïkuchoni nyo mötïny, wölo tomönye kwitïta sörömu.

⁸Ompöwölo poryegho korö kore anka, kïsetï pöyunötö pöyunöte anka. Rïngringöy ngwïnya ompö koros cho chang, akïpkonchini kömeywok koros. Lata ngalechoni pat kitoröto kichïr pö korka nyo kïghöy.

⁹ “Orip kegh ompöwölo kipokwa ka kirwok, Kïmungonekwa kori sowut. Oghyongonekwa tawu kirwokot nko pöytoghï akwompö ani, atomchinö chane ngalechan.

¹⁰Kïnyoghöy kyomchini koros löwïr Lökoy cho Karamach.

¹¹Akwato namakwa akipokwa ka kirwok, kïmosus kegh lö, kïpetöy kemwoghöy ne, wölo omwoghekwa ngölyon nyo kïkonokwa panini keti asisoni. Ompöwölo melö ngalekwa cho ongölonekwa, konokwa Mïkulögh nyo Tïlil kïgh nyo omwoghöy.

¹²Wïchtoy chi werïngwa kepar akï wïchtoy papo tïkwïl montanyi. Pusyini monïngö yiyikwa akïwïchtö chane kepar.

¹³ Reyokwa pich lapay akwompö kaynenyan, wölo anka tïkwïl nyo kömöghöy ntökwit söröm, kesöru.

¹⁴ “Ato asïwekwa kïgh nyo gha nyo kipolpolöy ketö wölo melö keroko kïmi, nya kïpköchï chi nyo somönöy ngalechï, akany kïryagh pich cho mi Yudea kïpus kutïngkot.

¹⁵ Mörökunye chi nyo mi kö pörkö kïlïtöy konyi lö tacheng kïgh nyo mi ori.

¹⁶Mömïlonye chi nyo mi par katanyi lö tacheng anankenyi.

¹⁷Wechï ngwan nyoman ompö kor cho mirsïyi nko chane cho rerïyöy monïng!

¹⁸Asagha tömeghisyö ngalechoni ompö asispa kaghïtan.

¹⁹ Ompöwölo itu nyarïl osiswechoni nyo tomönye kesïwa kïngeta otini kitowï Tororöt kwigh ngwïny ntökïtenö ye, amökwitunye nyaril nyo lata nyoni ngat.

²⁰Akï ntökimechïchuk Echotyon osiswechoni, tömöminye chi nyonikïny nyo kïsöru. Kichïchuk nyinte osiswechoni ompö pich cho kikïl kïlïkwï chechi.

²¹“Kïlenyona ntökïlenchokwa chi, ‘Anyi Kristo,’* anta lö, ‘Anyinö mi otinö!’ Maghan ngalechi,

²²ompöwölo relu Kristotino putintön nko werkoyi putintön. Poru chane tïkwïn cho pö töngönchin cho lïso pich, lïsöy ompö chini le kïlan pö Tororöt ato muko.

²³Orip kegh! Kanyaghan omwowokwa ngal löwïr kïtö kïlowöch.

²⁴ “Nyini kewonyö nyarïlnoni pö osiswechoni, kïtuwit asis akïma arawa,

²⁵ röröku kokel ompö yïm aketimtim pchörino mïröt.

²⁶ Atolapay kïsïwa chane Wero Chi kungwïno poltoy ompö owesyö nyo wow nko ororyö.

²⁷Yoktoy nyu malaykenichi kïpa ngwïny kïmïkul kïghamïtï kïlankachi kïngetunö sörömu ngwïny ntökwit sörömu anka.

²⁸“Anetene kegh körkeyïn pö moköngwö nyo otini kasanach morichi akusïl sökechi onkïtukwa lö, karikï osiswo kitokot.

²⁹Kïlenyona ata asïwekwa tïkuchoni löwïr ankïtï lö, kikïrich kwitï nyinte, mi yeteyi.

³⁰Amwowokwa nyoman lö, mewerönye pïnete kïtomö kwitïta ngalechï löwïr.

³¹Weröy yïmö nko ngwïny, wölo meweröcha ngalechan.

³² “Möminye chi nyo nkït ato itu asisoni anta pöghetunoni menkïtnye ompö malayken cho mi yïm anta Wero Tororöt, poto Paponyan onkït.

³³Agha kegh oripsyenö, ompöwölo monkïtökwanye lö, oyï ato itu.

³⁴ Karkegh nko chi nyo köwö kïrutö. Nyo yomisöy mötworichi. Töni anka tïkwïl woyenyi, akïmwochï mötworinte nyo ripöy or kïripsyö lasiny.

³⁵Oripseyenö nyu, ompöwölo monkïtökwanye lö mïlo oyï chito kot, ekïmönon anta oghökwen anta kiwasan anta ato pusï asis,

³⁶atömemirok kïnyorwok omitö rïwön.

³⁷Akïngölyontonete omwowokwa, omwochinan pich löwïr lö, ‘Oripsyö!’ ”