Read pokoot MARKO 16 Bible Online

MARKO 16 - pokoot bible

MARKO 16

¹Nyini kiwer asispa Sapato,* kwal Marya Makdalena nko Salome nko Marya yoto Yakopo tïkwïn cho ngutoy lö pïlpïlpïl atökïpa kïnyïra por pö Yeso.

²Ompö asispa Chumapili kiwasan, kïpa kutang pïrïm.

³Kïngölonotoy chane lö, “Ekïngo nyo mïlmïltowecha köghay mi pïrïmponay kukat?”

⁴Nyini kitopöntö, kïsïwa lö, kïchï kikemïlmïlta köghay kunach. Ki wow koghoni nyoman.

⁵Nyini, kïlït chane pïrïmponay, kïsïwa chumwak nyo kimpuröy ompö ewu tagh loköy ananka nyo rel, kïmïghyö koruchay nyoman.

⁶Kïlenchï chumwakanay, “Mowöghisïyi, onkïtön lö, oyörekwa Yeso, nyo pö Nasaret, nyay kikïwudochï kimurtöwon. Melö mi yi, kikututï! Arose, ayi ataye kikïrorchï.

⁷ Wölo ape omwochinö kinetankachi nko Petro lö, ‘Kinyaghakwa tagh nyinte kiwö Kalilaya, onyorchinekwa nyinte wölini, le atanye kimwowokwa.’ ”

⁸Kïlenyona kïryagha koruchay pïrïmponay, ompöwölo kimïghyö akïtangany. Amömwochïcha chi anka tïkwïl ngölyon ompöwölo kiwöghisyö. [

⁹Otini kitutunö Yeso ngwen, asispa Chumapili kiwasan, kïnya kuporchï kegh Marya Makdalena, nyo kitulö nyinte oy cho le mut nko odeny.

¹⁰Kïwö kokonay kïmwochï pich cho kimi nko Yeso ngal cho kighisyö. Ompö atoni kï kimi chane kïrirsot akïloksot.

¹¹Otini kïlïm lö satate Yeso, akakïsïwa Marya Makdalena nyinte, kïmökughancha ngalechi.

¹²Ato mi sörömuto ngalechoni, kuchumchï Yeso kinetankachi ompö kïton nyo sis, otini kimi chane pan kïpetöy keston.

¹³Kïmïlisyö kipa kïmwochï kinetanka walaka, wölo meghancha nyonikïny.

¹⁴Ato mi nyu sörömuto ngalechoni lapay, kuchumchï Yeso kinetankachi chay le taman nko akonga otini kyomisïyi. Kugheghchï chane ompöwölo meghancha nko oghïghyeto mïkulöwekwa akwompöwölo kimeghancha pich cho kisïwa nyinte lö, kikututï.

¹⁵ Kïlenchï, “Ape ngwïny kïmïkul amtatena Lökoy Karamach kwityï pich lapay.

¹⁶Chichona ghönöy akepatisan kesöru akï nyo meghönönye kerwokyini.

¹⁷Rïpotoy möcheywechï pïchona ghönöy, tulöy oy ompö kaynenyan akïngölonöy kutïw walaka.

¹⁸Akwato nam chane moroyut anta am ködöwï, kïmedonye kïgh, könoghöy ewunekwa pich cho chirsot, kïsöpchö.”

¹⁹ Otini kiwany kïngölonöy Echotyon Yeso nko chane, kep nyinte kutang yïm akïtöpö okumpö tagh nyo pö Tororöt.

²⁰Kïpa wop lapay akwamtata kimi Echotyon kïpöghisïyi nko chane akuchichim ngölyotononi, pö amtaghtangwa kutö machey nyo kinomnyoto tïkwïl.]