Read pokoot MARKO 2 Bible Online

MARKO 2 - pokoot bible

MARKO 2

¹Nyini kiwer osiswö cho te kïmïla Yeso ngat Kapernaum, kelïm lö, mi nyinte kaw.

²Kïghamïtï kegh pich ntömökïminye pöroyïn, ompö nyini le kukat sany. Kwomchï Yeso chane Lökoy cho Karamach.

³Kïpka pich angwanï cho kisïtu chi nyo kimeyta por.

⁴Kïkany otinö kimökïnyorïcha or nyo kimïto chichay ntökwit wölo kimi Yeso ompö chongïn pö pich, kïngany pörkö otinö kimito Yeso, kïkany kïyata pörkonay, kureytö chichay nko menyontenyi.

⁵Otini kïsïwa Yeso kighanatengwa, kïlenchï chichay kimeyta por, “Werïnyu, kakelöstowunyi ngokiku.”

⁶Kunonchï kegh ompö mïkuliskökwa koneti kirurut walaka cho kimpuröy atoni lö,

⁷“Ompö ne tökïngölonöy chichï le nyï? Nkïkimwoghsyö nyï! Olentan Tororöt onkït nyo muköy kïlöstoghchini pich ngokï?”

⁸Panini kunkïtï Yeso kinonutkökwa, kïlenchï, “Ompö ne tononekwa ngal cho lata choni ompö mïkulöwekwo?

⁹Kwïskwïs kemwochï chichï kimeyta por lö, ‘Kakelöstowunyi ngokiku nya,’ anta kemwochï lö, ‘Ngeta, tagha menyontengu aiwö?’

¹⁰Omökan onkïtunökwa ye nyu lö, tïng Wero Chi owesyö ompö ngwïny nyo löstoghchini pich ngokï.” Atolapay kïlenchï chichay kimeyta por,

¹¹“Omwowunyi lö, ngeta tagha, menyontengu aiwechï kegh kaw.”

¹²Kïnget chichay akïcheng menyontenyi lawel akïwechï kegh, ompö tawungwa löwïr. Kïtöngönchï chane löwïr akïsal Tororöt kilentöy, “Tomönye kesïwenacha ngölyon nyo lata nyï kokay!”

¹³Kïmïla Yeso ngat kïwesteghö sörömu nanampa Kalilaya, kïghamïtï kegh söpïch, kutor nyinte kunet chane.

¹⁴Akwotini kiwetöy, kïsïwa kwöghinto suru, Lawi wero Alpayo, mpuröy ato kikïtoko suru kïlenchï Yeso, “Rïpanïn.” Kïnget akïrïp nyinte.

¹⁵Otini kyomisïyi Yeso ompö köyay pö Lawi. Kïghömïtï kegh kwöghi suru nko mwokïyis cho möngörï akumpur nko Yeso, kïmi kinetankachi, ompöwölo kichang pich cho kirïp nyinte.

¹⁶Kïsïwa Parisaytin* cho kile koneti kirurut kwomisïyi Yeso nko mwokïyis nko kwoghi suru, kïtep kinetankachi lö, “Ompö ne tökwomisïyi nyinte nko kwöghi suru nko mwokïyis?”

¹⁷Kïkany kïlïm Yeso kïlenchï chane, “Melö möröy pich cho karamach chepsakïtyan, kïpoto chona chiryot. Kimangwïnanye okur pich cho pö man wölo kyangwïnan okur mwokïyis.”

¹⁸Kimi ato kikïruröy kinetanpa Yoana Kipatisanin nko cho pö Parisaytin. Kïpa pich wölo mi Yeso akïtep lö, “Ompö ne tökïkïruröy kinetanpa Yoana Kipatisanin nko cho pö Parisaytin melö kïruröy cheku?”

¹⁹Kuyokyï Yeso chane lö, “Muköy so toyo kensyö kïkïruröy ato mi nko chichini pö kensyö? Memuköcha kïkïruröy ato mi chane nko chi pö kensyö.

²⁰Wölo pkonöy asiswö cho kïchengo chane chito kensyö, kikirur nyu ompö asisoni.

²¹“Möminye chi nyo kïno kïnöwon nyo rel sïra nyo kiyosit. Ato igh lenyoni kïkörero sïre nyinö tya.

²²Amöminye chi nyo töni dipay* cho kötökeryököy tökol cho kiyositu. Ato igh lenyoni kïköreröy tökolwe, nyorisyot nyu dipayka nko tökolwe, kitöni dipay cho kötökeryököy tökol cho relach!”

²³ Kiwerata asistanka Yeso ompö asispa Sapato paren, akwotini kipetöy chane kutor kinetankachi kïpakata yiti pagh.

²⁴Kïlenchï Parisaytin Yeso, “Rose, kinetanköku lö ighöy kïgh nyo meghönye chi ompö asispa Sapato?”

²⁵ Kuyokyï Yeso chane lö, “Tomönye osomönökwa so kïgh nyo kigh Daudi ato kisutate akimököy kïgh nyo kyomöy nko pich cho kimi tïkwïl lö,

²⁶kïlït Kö pö Tororöt* akwam makatyan nyo kipöy tawu Echotyon, ato ki Tïsin nyo Wow* Apyatar. Ki tïsï opïn cho kichömchini kirurut kwomöy makatyantanoni. Wölo kwam Daudi, akutö pikachi kwam?”

²⁷Kuwany Yeso kïmwa lö, “Kikigh asispa Sapato ompöwölo ptangengmöt. Melö kikigh ptangengmöt ompöwölo Sapato!

²⁸Kïlenyona, Echotyon Wero Chi nyo pö asispa Sapato tïkwïl.”