Read pokoot MARKO 4 Bible Online

MARKO 4 - pokoot bible

MARKO 4

¹ Kitor ngat Yeso kunetisyö ompö sörömu nanampa Kalilaya. Kurik söpïch nyo wow nyoman, tökïtenö kïlït meli nyo kimi pögh parak kumpur. Kimito söpïchtö kïmïkul sany sörömu nanam.

²Kïpöghisyeghö körkeyïntin kunet chane tïkwïn cho chang, kïlenchï chane,

³“Atere! Kimito chi nyo kiwö kïleta kösïgh.

⁴Otini kiletoy kösïgh, kïchïnchï kösïgh walaka araor, kïpka töritwö kwam.

⁵Kïchïnchini kösïgh walaka wolö le ngaynatyan, wölo kimïnïng nyïngwïtyanta, kïghyöghï kösïghechay lawel ompöwölo kimïnïng nyïngwïtyante.

⁶Kïkany kïpusï asis kïpel ompöwölo kitomöcha kïnam ighinkökwa ngwïny lasiny kisilonchö akïyomö.

⁷Kïchïnchï kösïghe walaka kato kwen, kïpit kato, akwam tömökuyincha pagh.

⁸Kichïnchini kösïghe walaka nyïngwïtyan nyo akwagh. Kïghya akïpit akuyin pagh. Kuyin walaka 30, kuyin walaka 60, kuyin walaka 100.”

⁹Kuwany Yeso lö, “Chi nyo itïng yitïn cho kïlïmo, ilïm!”

¹⁰Otini kimökïminye söpïchay wow, kïtep kinetankachi chay le taman nko odeny nko pich walaka cho kiwit nyinte, mwowut pö körkeyïntinechoni.

¹¹Kïlenchï Yeso, “Kakekonokwa wïngata Pöyunöto Tororöt. Wölo pich löwïr cho tökïmi sany kïlïmo tïkwïn löwïr körkeyïntin,

¹² ‘Rosïtoy ompö kirosat amösïwïyinye kïgh, teröy ompö terat amöpköchininye kïgh, tömöwöghökisyö wölo mi Tororöt akïlöstoghchï ngokikwa.’ ”

¹³Atolapay kïlenchï Yeso chane ayo, “Möpköchinokwanye körkeyïnï? Kïnyïl ato möpköchinokwanye, omukekwa lö ne nyu onkïtune körkeyïntin walaka löwïr?

¹⁴Letoghin kïlata chi nyo letoy ngölyonto Tororöt.

¹⁵Lata pikö walaka kösïgh cho kichïnchï arawet, nyo otini kalïm ngölyon, kungwïn Onyötö panini lawel kïcheng ngölyontonay kakïlechï chane.

¹⁶Karkegh pikö walaka nko kösïgh cho kichïnchï wölo le köghïn, nyo nyini kalïm ngölyontonay kïnam panini lawel ompö ngörekyö.

¹⁷Akwompöwölo mötïngcha ighin ompö oringwa kïnam nyo tangogh pata, nyini ketï nyarïl anta itï kichopata kong nyo pö ngölyontonay, kupïtyö lawel.

¹⁸Kïkarkegh pikö walaka nko kösïghechay kikïlechï kato, lïmöy chane ngölyon,

¹⁹wölo ato itï sïngut pö ngwïny nko pïghyöng nyo pö sïkönön nko pïrchin pö tïku walaka, kwam ngölyonte, tömökïyïcha akwa.

²⁰Wölo kösïghechay kikïlechï nyïngwïtyan nyo akwagh, kïkarkegh nko pich cho lïmöy ngölyon akïtach akuyin akwa. Yiyöy nyu walaka akwa tömönut sömök, kïyï walaka 60, kïyï walaka 100.”

²¹ Kïlenchï chane, “Muko kepï kitömöwon nyo kipköngtoy kö ori akeluma otupö anta ki lut pïrïnta? Olentan kitöni sökotïn nya?

²² Kïgh anka tïkwïl nyo kikïwïng keyotu kungwïn sany, akï kïgh anka tïkwïl nyo kikïkörchï kïgh, keyotu ntökesïwa.

²³Tera nyu chi nyo ketïng yitïn!”

²⁴Atolapay kïlenchï chane, “Ater lasiny kïgh nyo opetekwa olïmöy ye! Köröp nyo okörchinonekwa pich, kïnyoni nyo körunonekwa Tororöt, akïkonokwa kïtöswokwa.

²⁵ Ato tïng chi tïkwïn ketösini walaka, wölo chi nyo mötïngnye tïkwïn, kechengo ompö chini le tïkwïte kötïngetö.”

²⁶Kulet tagh Yeso kïmwa lö, “Lenye Pöyunöto Tororöt chi nyo letoy kösïgh.

²⁷Nyo wetöy kirïwöy nangat akïnget tökwoghö, kighyöghö kösïghechay akïpit amenkïtnye nyinte wölini pitïtoy.

²⁸Nyïngwïtyan nyo ighöy töntörwö kïghya akuyin akwa, nyoghöy kïrïtu suswon, atolapay kïtereman akïrïr.

²⁹ Akwotini körïr, kutor chi pö par ilö ompöwölo ketïta asistanyi.”

³⁰Kïtep Yeso lö, “Kikongityonecha Pöyunöto Tororöt nko ne? Anta kimustoy körkeyïn ne?

³¹Karkegh nko kösïghyonto ket pö aradali, nyo mïnïng kïtïl kösïgh lapay ompö ngwïny kïmïkul.

³²Wölo otini kakïkatkat, kïghya akïpit kïlïkwï ket nyo wow kïtïl keti walaka lapay, kïpit akïsach morichi cho chang cho muköy töritwö kïtek korikwa.”

³³Kwomchï Yeso pich ngalechi ompö ngötïnyö cho chang cho lata choni, kïle wölo kimï chane kïlïmta.

³⁴Akimöngölonchïnye chane ngölyon anka tïkwïl nyo metönye körkeyïn, wölo otinö kimi nyinte siriron nko kinetankachi, kï kïngongchï chane tïkwïn lapay.

³⁵Kïlenchï Yeso asisoni kinetankachi ato le mönon, “Kepe kyoghyenö nanam antakwagh.”

³⁶Kïlenyona kïpïstö söpïchnay, akïpus melinay kökimi Yeso ori akïpa nko nyinte. Kimi meline walaka cho ki lekïto atoni kimi Yeso.

³⁷Kïkutï chepkiriri nyo wow nanamay kulyöngchï pögh melinay ntökïtenö kïnyïghï.

³⁸Kimito Yeso meli wölo le löt kïrïwöy kïtigho mötïnyi mïkïn. Kunget kinetankachi akïlenchï, “Mökïghnye so ompö nyi ato kiwonyecha, konetin?”

³⁹Kïnget Yeso akuteghchï chepkiririnay kïlenchï nanam, “Sisa!” Kïwïs chepkiririnay akïsï nanam.

⁴⁰Kïlenchï Yeso chane, “Kölö ne towöghisyenökwa? Motïngökwanye kighanat so?”

⁴¹Kuwöghisyö nyoman akïtep kegh lö, “Ngo chitö nyï terchini chepkiriri nko nanam?”