Read pokoot LUKA 1 Bible Online

LUKA 1 - pokoot bible

LUKA 1

¹Takwes apoy Teopilo: Inkïtönyi lö chang pich cho kikumukyï kukir ngalechay kighisyeghö kwenunyo.

²Kikir chane ngalechoni le otini kimwowecha pich cho kisïwa tïkuchoni kïngeta otini kighisyö akwamtata ngalechoni.

³Kïlenyona, we apoy Teopilo, kokïtön ante tïkwïl ngalechoni kïngeta otini le towunöt, olan mïchini akirunyi ngalechï lasiny.

⁴Akakiran lenyoni temukanyi nkïtunö man ompö ngal löwïr cho kikenetïnyi.

⁵ Kimi tïsin nyo kikïkuro Sakaria nyo pö ara Apiya, pich cho kile tïsï, ato ki pöytoghin Erode ompö koro Yudea. Kikïkuro korkenyi Elisapet aki pö nyinte tïkwïl ara tïsï.

⁶Kitïpïyot chane kwodeny otöp pö tïlilïn ompö tawu Tororöt, kiteröy akïrïpöy Kirurut pö Echotyon löwïr.

⁷Wölo kimötïngcha monïng, ompöwölo ki sonö Elisapet akiyositu nyoman chane kwodeny.

⁸Kiwö asistanka tïsin Sakaria Kö pö Tororöt* kïpöghisyö atokile pösyenyi.

⁹Kïrïp kegh nko tötut pö tïsï, ki Sakaria nyo kikïkïl kïwö asisoni Kö pö Tororöt kïpel tïkwïn cho ngutoy cho onyïn.

¹⁰Otini kipelöy Sakaria tïkuchoni, kimi pich sany kïsoghöy.

¹¹Kungwïnchï nyinte malaykayanta Echotyon akughyongö okumpö tagh ompö ato kïpelo tïkwïn cho ngutoy cho onyïn.

¹²Kïkany kïsïwa Sakaria nyinte, kwotyö akïmïgh.

¹³Wölo kïlenchï malaykayantanay, “Mewöghisyö Sakaria! Kikïlïm Tororöt saghatengu, yiyunyi korkengu Elisapet worö aikuronyi kaynenyi Yoana.

¹⁴Ingörökenyi nyoman akïsïköy pich cho chang ngörekyö otini kakïyï nyinte.

¹⁵ Ororitu nyinte nyoman ompö tawu Echotyon amögheghönye dipay* anta kumïn. Kinyïghitöy nyinte Mïkulögh nyo Tïlil kïngeta kïmi mu.

¹⁶Yoku pipö Israel cho chang kïpkonchï Echotyon Tororötïngwa.

¹⁷ Nyoghöy kïwetöy tawu Echotyon ompö mïkulögh nko owesyo werkoyon Eliya. Linyot papotïn nko monïng. Wöghököy pich cho le tighï kïrïp kinetut pö pipö man akwigh pipö Echotyon kïtïpï kïpsach kïtak nyinte.”

¹⁸Kïlenchï Sakaria malaykayantanay, “Akumukisot ngalechï lö ne? Akwanyï kyayositwan akiyosit kokönyontenyan tïkwïl.”

¹⁹ Kïlö malaykayantanay, “Ochan Kapriel nyo opöghisyechini Tororöt. Köyonwanïn nyinte angalan nko nyi tomwowunyi ngalechï karamach.

²⁰Wölo tere nyu, nöminyi kïgh kut nyo memukenyinye ngölone ntökïtenö kwighisyö ngalechï löwïr, ompöwölo melö keghananyi ngalechan cho tökïpïntoy.”

²¹Otini kighisyot ngalechï kïtöngönchï pich cho kiköngöy Sakaria lö, ekï kïgh ne nyo körötyï nyinte Kö pö Tororöt?

²²Nyini kilïtï sany kungwïn chi nyo kinam kïgh kut. Kïlenyona kïpköchï pïchay lö, kisïwa nyinte sïwïyagh ompö Kö pö Tororöt. Kïngalana morïn kwïle akïtöpö lenyoni mangalan.

²³Kïkany kuwonyö pösyenyi nyo kipöghisïyi ompö Kö pö Tororöt, kïwechï kegh Sakaria katanyi.

²⁴Nyo matyanye kïsïkisyö korkenyi Elisapet akimökïlïtnye sany ompö aro mut akïlö,

²⁵“Kesyonchanïn ye Echotyon ompö wölini kalatan akïmalteghenanïn arasï ompö tawu pich.”

²⁶Kïkany otini kikïnïkisit Elisapet ompö aro mut nko akonga, kuyoktö Tororöt malaykayan Kapriel kïwö kanasyanta Nasaret nyo mi Kalilaya.

²⁷ Kiwetöy wölo mi mïrar nyo le chepkïltït nyo kikikulotokïn chi nyo kïkuro Yosep nyo pö ara pöytoghin Daudi. Akikïkuro mïraranoni Marya.

²⁸Kungwïnchï malaykayan akïlenchï, “Pöghisyö Marya, nyi nyï keporun Echotyon pöropchö. Mi Echotyon nko nyi.”

²⁹Nyini kilïm Marya ngala malaykayan, kusus kegh nyoman akunonchï kegh lö, ekïpö ne takwesnï!

³⁰Kïlenchï malaykayantanay, “Mewöghisyö Marya, ompöwölo kinyorunyi pöropcho Tororöt.

³¹ Isïkisïyenyi ayiyönyi worö nyo ikuronyi Yeso.

³² Ororitu nyinte akekuro wero Tororöt nyo Töror Tya. Töni Echotyon Tororöt nyinte ngacharu paytaghpa kukötanyi Daudi

³³akïlïkwï nyinte pöytoghinto pipö ara Yakopo kokay akïmewonyotnye paytaghtanyi.”

³⁴Kïlenchï Marya malaykayantanay, “Ekumukisyot ngalechï lö ne akwanyï melö kyochömisyan?”

³⁵Kuyokyï malaykayantanay lö, “Ngwïnchininyi Mïkulögh nyo Tïlil akuwuro owesyo Tororöt nyo Töror Tya parakungu, kïlenyona monïngoni iyiyenyi kekuro nyo tïlil, Wero Tororöt.

³⁶Rose tupchengu Elisapet, nyay kilentöy pich mökïsïkönye monïng, wölo miröy ye nyinte monïng nyo pö aro mut nko akonga, kïrkegh kiyosit nyoman.

³⁷ Ompöwölo möminye kïgh nyo pölöy Tororöt kwighöy.”

³⁸Kïlö Marya, “Ochan mötworinto Echotyon, nya kwigha lenyoni kemwaghanyi.” Atolapay kïwechï kegh malaykayantanay.

³⁹Nyo matyanye kïnap kegh Marya akukuskus kïpus kamas koro Yudea.

⁴⁰Kïwö ntökïlït kö pö Sakaria akutakwes Elisapet.

⁴¹Kïkany kïlïm Elisapet takwespa Marya, kïpirön mönïng ompö muyenyi. Kungwïnchï Elisapet Mïkulögh nyo Tïlil,

⁴²kïngalan tya lö, “Ichinyi soyönot kïtïl kor löwïr akusoyönote monïngoni iyiyenyi!

⁴³Akï töngönchin nyo tya nyï körutowanïn yoto Echotyontenyan?

⁴⁴Ompöwölo otini kalïman takwestangu, kïpirön monïng ompö muyenyan ompö ngörekyö.

⁴⁵Ichinyi soyönote nyo keghan lö, pïntoy ngölyonto Echotyon nyo kimwowunyi.”

⁴⁶ Atolapay kïlö nyu Marya, “Sölöy mïkulöwunyan Echotyon.

⁴⁷Ngörökyini söpontönyan Tororöt, Ghetintenyan,

⁴⁸ nyo kikunananïn nyinte, ani mötworintenyi nyo mochï kïgh. Kïngeta ye kutang tagh, kurenanïn pïnwöy löwïrï nyo soyönote,

⁴⁹ompöwölo keghwanïn Tororöt Kimuktoghin tïkwïn cho echön akï tïlil kaynenyi.

⁵⁰Akïtöpo kisyonötenyi nko pich cho konyïtöy nyinte ompö pïnwöy löwïr.

⁵¹Kiporï owesyenyi nyo mamïnïng akutoytoyö menot

⁵² akutyartegha pöytoghï cho owesöch ngöcherwekwa akutokunö pich cho melö kïgh.

⁵³Kikïpagh pich cho amate kömöy kïpïghyö akutul monkor kïpa kïtuw.

⁵⁴Kikupuntö kiyomisötenyi nyo kimwochï papotïnecha akungwïn ompö kisyonötenyi, kungarak mötworintenyi Israel,

⁵⁵ lenyini kiporchï kisyonötenyi Apraam nko monechi kokay!”

⁵⁶Kïtöpö Marya nko Elisapet aro cho ngata sömök, atolapay kïmïla katangwa.

⁵⁷Kwitïta nyu osiswo Elisapet cho pö lusyogh, kïyï weri.

⁵⁸Kïlïm pöröriskachi nko piko arengwa lö, kisyonchï Echotyon nyinte tya, kïturonchö chane nko nyinte.

⁵⁹ Otini kitïta monïngay osis mut nko sömök, kïpka chane kïmut montö, kimököy chane kïmïnchini kayneto kwanta Sakaria,

⁶⁰wölo kïlö kame, “Ewo! Kïkuro kaynenyi Yoana.”

⁶¹Kïlenchï pïchay, “Nkï möminye arenkwa kaynatanoni.”

⁶²Atolapay kïngölonchï paponyi ompö morïn, atökuporï lö, mököy nyinte kekuro ne werïnyi.

⁶³Kïsom Sakaria kïgh nyo kikiröy, kukir lö, “Kïkuro kaynenyi Yoana.” Kïtöngönchï pïchay lapay.

⁶⁴Otini lawel, kumï Sakaria kïngalan ngat akïsal Tororöt.

⁶⁵Kuwöghisyö pöröriskökwa nyoman, kwamta pich ngalechay kïyasta komoswechay pö koro Yudea.

⁶⁶Kunan chi anka tïkwïl nyo kilïm ngalechoni akïtep kegh lö, “Wetöy su monïngï kïlïkwï ne? Ompöwölo kirumï lö, kimi owesyo Echotyon nko nyinte.”

⁶⁷Kikinyïghit Sakaria papoto Yoana Mïkulögh nyo Tïlil, kïngorsyö lö,

⁶⁸“Nya kesala Echotyon Tororöt pö Israel! Kengwïn nyinte kungarak pikachi akutyak chane.

⁶⁹Akïkonecha Ghetin nyo le nyakan tya nyo pö areto mötworintenyi Daudi.

⁷⁰Kimwa nyinte könyisyok ompö werkoykachi cho tïlilöch,

⁷¹lö, sörunenecha pungköcho nko owesyo pich löwïr cho reyecha,

⁷²atökupuntö kisyonötenyi nyo kiyomisï papotïnecha akunan mumenyi nyo tïlil.

⁷³Muma* nyo kyam nko paponyo Apraam

⁷⁴nyo kiyomis lö, osörunenecha pungköcho, atökepöghisyechinöcha nyinte kïpuryö kiwaghat,

⁷⁵ompö tïlilyö nko man ompö tawunyi, ompö osiswecha löwïr.

⁷⁶ Kïkurinyi we montanyu lö, werkoyonto Tororöt nyo Töror Tya. Intöghoghchinenyi Echotyon ateghchinö nyinte arenyi,

⁷⁷atemwochinö pikachi lö, kïsöru chane, ompöwölo kïlöstoghchini chane ngokikwa,

⁷⁸tïng Tororötïncha kisyonöt nko tölosyö, ighöy kenyorunöcha löpoyïn nyo ngwïno yïm,

⁷⁹ atökulïwchï chane cho mi tuwïn akïmöngöy rurwo meghat akwigh kelyecha kïtïkata ara pöghisyö.”

⁸⁰Kïyetï monïngay akïchïrerit. Akïmang surkwen ntökwit asis ato kiporchï kegh nyinte, pipö Israel.