Read pokoot LUKA 12 Bible Online

LUKA 12 - pokoot bible

LUKA 12

¹ Ataye kokay, kighömïtyï kegh pich cho makïrar kipka wölo mi Yeso ntökïtïk kegh chane. Atolapay kïngalan Yeso ngalechï kutang kinetankachi lö, “Orip kegh mumara Parisaytin.* Nyoni kï chepölkösnönengwa.

² Möminye kïgh nyo tïpote nyo melö kïwösu kungwïn sany akï möminye ngölyon nyo wïnyate nyo mökinkïtu.

³Nyo ye ngölyon nka tïkwïl nyo kangalanekwa tuwïn kelïmöy pöghet kulïwu asis akï ngölyon anka tïkwïl nyo kachamekwa kö nyo karat kukat, kemwotïtegho pörkö parak.

⁴“Omwowokwa kongotïnechu lö, mawagh pich cho pöröy chi por atolapay kïmökïmi kïgh anka nyo gha nyo muköy kwigh.

⁵Oporwokwa nyo mïchini awaghakwa. Awagha Tororöt nyo tïng owesyö kïpar chi akïtïng owesyö nyo wirchini nyinte mapa kokay. Nyoman, awagha nyinte.

⁶“Ngo nyo menkït lö kyoltegho alurïtin mut senten odeny kwïle? Akï möminye nyo le ompö akonga nyo wutyegho Tororöt.

⁷Nana ngat lö, kikeyit pute löwïr cho mi mötöwekwa. Kïlenyona mowöghisyö ompöwölo opokwa kinyiwut kïtïl alurutin cho chang.

⁸“Amwowokwa lö, chi anka tïkwïl nyo mwochini pich lö kikughananïn nyinte, omwotïtonan lö nyinyan nyinte ompö tawu malaykeni Tororöt.

⁹Wölo anka tïkwïl nyo töghananïn ompö tawu pich, otöghan nyinte tïkwïl ompö tawu malaykeni Tororöt.

¹⁰ “Kïlöstoghchini ngokï chi anka tïkwïl nyo mwoghöy ngölyon nyo gha paraku Wero Chi, wölo melö kïlöstoghchini chi ngokï nyo mwoghöy Mïkulögh nyo Tïlil.

¹¹ “Akwato kipokwa kerwokwok ompö sinakokin anta tawu kirwokot anta pöytoghï, mosus kegh lö kïghetöy lö ne kegh anta lö kïmwoghöy ne.

¹²Ompöwölo porwokwa Mïkulögh nyo Tïlil atoni ngölyon nyo mïchini amwaghakwa.”

¹³Kinget chi akong ompö söpïchinay kïlenchï Yeso, “Konetin, mwochinö werïncha nyï wow kïchöghwanïn tïkwïn cho kipïswecha paponyo.”

¹⁴Kuteghchï Yeso chichay lö, “Ayo, kighanïn ngo oghyongchï anta alïkwï chöghinto tïkukwa kwodeny?”

¹⁵Atolapay kïlenchï pïchay löwïr, “Wechara! Oripö kegh pïrchinogh pö tïkwïn. Ompöwölo molenchï kegh lö köromitu tya söpon pö chi ato tïng tïkwïn cho chang.”

¹⁶Otolapay kunet chane ompö körkeyïn, “Kimi sïkonö nyo kitïng par nyo kirïr nyoman.

¹⁷Kunonchï kegh lö, ‘Otï ye motïngetanye wölo olchini paghe walaka, kïgh ne nyo oghan nya?’

¹⁸Atolapay kïlö, ‘Konkïtwan kïgh nyo oghöy. Ongonyan töpotonichu löwïr atek cho echön kïtïl chï atolapay olchan paghechu löwïr arorchï ori tïkucha walaka.

¹⁹Atoni nyu olenchan kegh, pöyösinö kegh aiyomisyö aigheghsyö le wölo kechamta, ompöwölo itïngetenyi tïkwïn cho chang cho karamach cho ghöminyi ompö könyis cho chang.’

²⁰Wölo kïlenchï Tororöt chichay, ‘Sölwonï! Ochengan söpontöngu oghonete, kïlenyona pöyitu ngo nyu tïkuchï löwïr kerorchinyi kegh?’ ”

²¹Atolapay kuwanta Yeso lö, “Ighöy lenyoni ompö chi nyo rorchini kegh sïkönöt, wölo meywon nyinte ompö tawu Tororöt.”

²²Atolapay kïlenchï kinetankachi, “Omwowokwa lö, mosus kegh ompö tïkwïn cho kyomöy anta cho kïgheghöy anta cho kïloköy.

²³Mötïlönye so söpon omisyö anta tïl por sïro?

²⁴Arose törit, cho melö kötkötisïyi amelö ilsïyi amötïngcha töpoton. Wölo pöghöy Tororöt chane. Melö so opokwa tösunöt nyo wow kïtïl törit?

²⁵Akï ngo ompö akwa nyo ato sus kegh kumuköy kïtas kite osiswechi ompö ngwïny?

²⁶Kïnyïl ato momukekwanye ye ntagh kïgh nyo le kite lenyoni kwompö ne tosusenökwa kegh tïku walaka?

²⁷ Arose wölo pitïtoy tapïkoy pö wuw, cho meghöcha ighisyö anta nöpchï kegh sïro. Wölo omwowokwa lö kïrkegh ki oror pöytoghintö Solomon lö ne, kïmelö kiloköy sïro cho pïchighöch le tapïkoychï.

²⁸Wölo atö minöy Tororöt sus, cho nyörilöch ye akwasïyech kïyomö akepel, kïmemukönye nyinte tökulokwekwa sïro kïtïl? Heywey akwa cho mïnïng kighanata!

²⁹“Kïlenyona, makany kususok machata nyo pö tïkwïn cho kyomöy anta cho kïgheghöy.

³⁰Ompöwölo yöröy pipö punton tïkuchoni löwïr akunkït Paponkwa nyo mi yïm lö otïngetekwa machat nyo pö tïkuchoni löwïr.

³¹Wölo ayara Pöyunöto Tororöt nko mantanyi tökïtöswokwa nyinte tïkuchoni löwïr.

³²“Amowöghisyö, okwotnï mïnïng, ompöwölo kacham Paponkwa nyo mi yïm kïkonokwa Pöyunötenyi.

³³Altena tïkukwo atotönö mey ropïyeni. Oyörchinö kegh mïlot cho melö wïrsot amörchï kegh kaplawachtin cho mewonyot ompö yïm wölo mönyorucha chorï antewur rirïm.

³⁴Ompöwölo mi mïkulöwungu wölo mi kaplawachtangu.

³⁵ “Agha kegh lasiny atöpï kïpsach ompö kïgh anka tïkwïl nyo itu amomis tatïnekwo,

³⁶ Akara kegh nko mötwor cho mi kïköngöy echotyontengwa kwituna ichon pö kensyö, nyo otini ketï akukonykony kukat, keyotyini nyinte lawel.

³⁷Ngörechot mötworichoni otini ketï echotyontengwa, kupenï chïkonchot. Nyo pö nyoman ngetöy, echotyon nyo lata nyoni akulach sïrochay pö akuporchï chane wölo kumpuröy atolapay kïpagh chane.

³⁸Ngörechot kïtya mötworichoni ato nyorï echotyontengwa kïmi kïpsach kïrkegh ketï oghökwen anta kiwasan.

³⁹ Onkïtökwa lö ntökenkït chi nyo mi katanyi lö oyï ato itu chorin, kömöpïsininye nyinte kïwiröy konyi.

⁴⁰Otïpinö kïpsach atach Wero Chi ompöwölo ngwïnöy nyinte ato mokönekwa lö itu.”

⁴¹Kïtep Petro lö, “Echotyon, mwowechanyi körkeyïnï opïn anta kemwochinyi pich löwïr?”

⁴²Kuyokyï Echotyon lö, “Ngo ataye mötworintö nyo kighönöy akï ngöghom nya? Mötworin nyo lata nyoni kï nyo töni echotyontenyi kughyongchï pöghisyewut pö akuros lö könyorï konyi mötwori walaka ropöwo omisyo osiswechini kikïchomnyechï.

⁴³Ngarakat kïtya mötworintö nyo ato tomï echotyontenyi kupenï ighöy lenyoni!

⁴⁴Omwowokwa nyoman lö, töni echotyontononi mötworintononi kughyongchï tïkuchi löwïr.

⁴⁵Wölo ato lenchï kegh mötworintonay, ‘Mengwïnönye kaw lawel echotyontenyan,’ atolapay kïmuny mötwori walaka cho le mïrön nko tïpïn, akïnget kwomisyö akïgheghsyö ntökïtamas,

⁴⁶miru ye nyu echotyonto mötworintonay, akwotini ketï, törotöröy mötworintonay akïpïsï kwam nyarïlpa mwokïyis.

⁴⁷“Mötworin anka tïkwïl nyo möyongönye kwigh lenyini möktoy echotyontenyi, kïnyoru sitöt nyo wow.

⁴⁸Wölo ato mi nyo menkïtnye wölo kömöktoy echotyontenyi, akwigh cho könyoru sitöt nyo wow, kïnyoru site nyo mïnïng. Akwanka tïkwïl nyo kakitö tïkwïn cho chang, kemöko nyinte asïyech tïkwïn cho chang. Kïkany chi nyo kakitö cho chang tya kemöko nyinte asïyech cho chang tya.

⁴⁹“Kyangwïnan otyorchï ma kitas tagh ompö ngwïnyinete. Opï kötö kikïnagh mayoni!

⁵⁰ Wölo tökisis onyorwan kipatisanat anka nyo sis akïmötïngnye mïkulöwunyan kimïny ntökïtenö kïpïntö.

⁵¹Olentekwa so kyopkan kalya ngwïnyinï? Ewo, mopkanye kalya, kopkan pesyogh.

⁵²Ompöwölo kïngeta ye kutang tagh, chöghöy kegh kö akong nyo mi pich cho le mut kïlïkwï woptin odeny ompöwölo mi cho ghönanïn nko cho meghönanïcha. Mi odeny wop anka, kïmi sömök woptö anka amöchomsocha.

⁵³ Kïlenyoni tïkwïl, chuniot papo nko werïnyi, kïchuniö weri nko kwanta, chuniot kame nko cheptanyi, kïchuniö cheptö nko kame, chuniot korketo weri nko potïchtanyi, kïchuniö potïchtö nko korketo werïnyi.”

⁵⁴Atolopay kïmwochï Yeso söpïchinay lö, “Ato osöchikwa polta kungwïno ta, olekwa, ‘Mach kïropan,’ akïropönöy nyoman lenyoni.

⁵⁵Kïkany kïkutuna yomöt wölnö porö, olekwa, ‘Wechï loyöy asete,’ akïlïku nyoni.

⁵⁶Ochech chepölköstinechï, kölö ne tomukekwa atatame kïgh nyo igho ato arosakwa ngwïny nko yïm, akupölokwa onkïtunö lö kïgh ne nyo ighöy Tororöt osiswechete?

⁵⁷“Ompö ne tömomukekwa omutchini kegh ngal cho mïchini keghöy?

⁵⁸Muko kwipinyi chi kokwo kirwok kerwokyin. Mukyinö awanga ngalekwo kïtomitenö arawet atökïpïstin. Atomeghanyinye lenyoni, kumïtinyi tawu mutinto ngal nyo rwokyininyi akwonkoghchinyi askaryon nyo torchininyi chela.

⁵⁹Nyo pö nyoman mengetunonyinye wöloni ntökïtenö ghaktena ropïyenichay pö chi sentöyon lödo amöngötï ompö nyo le.”