Read pokoot LUKA 13 Bible Online

LUKA 13 - pokoot bible

LUKA 13

¹Kimito pich osiswechoni cho kimwochï Yeso ngala pipö Kalilaya, cho kipar pöytoghin Pilato otini kimi chane kïpelchini Tororöt amöros.

²Kuyokyï Yeso chane lö, “Olentekwa ye so ki mwokïyis pïchoni pö Kalilaya kïtïl piko Kalilaya walaka ompöwölo kinyorï meghat nyo lata nyoni?

³Ewo mölenye nyoni! Wölo omwowokwa nyoman lö, ato mokötekwanye apïstö ngokikwo, omeghsokwa le chane.

⁴Ononekwa pïchanya le 18, chay kirulchï kö nyo kogh nyo pö Siloam akïtïgh chane? Olentekwa so ki mwokïyis chane kïtïl pikö walaka cho kimönyöy Yerusalem?

⁵Ewo, mölenye nyoni! Wölo omwowokwa lö, ato mokötekwanye apïstö ngokikwo, omeghsokwa le chane.”

⁶Atolapay kïmwochï Yeso chane körkeyïn nyo kilö, “Kitïng chi ket nyo kyomöy akwechi nyo kikötkötyï paranyi nyo pö sapipun. Kïwö kïyara akwa ketay, wölo kimönyorïnye nyo le ompö akonga.

⁷Kïlenyona, kïlenchï ripinto paranay, ‘Rose köny lö, könyito sömök nyete nyo kangwïnan amara okin ketï, wölo tomönye onyorwan kïgh. Törö ketoni. Pö ne kïkarta par kwïle?’

⁸Wölo kuyokyï ripintonay lö, ‘Echotyon nya kïtöpö könyinete onkït. Opölan pïrïm kuwitwit atolapay ayinan pures.

⁹Kwoto yinï akwa könyinïna, kïkaram. Kïkany ato meyin, ingwïn itör.’ ”

¹⁰Kimi ato kinetisyegho Yeso asistanka kö pö saghat,* asispa Sapato.

¹¹Ompö köyoni kimito korka nyo kitïng oy cho ghach cho kitö kokononi kösotyö nyo pö könyis 18. Kigh kösotyononi kokonay kukudö nyo kimemukönye ntökughïtö kïrutenyi.

¹²Otini kisïwa Yeso nyinte, kïkur akïlenchï, “We yo, kakesopeninyi kichïrtangu.”

¹³Atolapay kukanagh morichi parakunyi, panini lawel kïsöp akughïtö kegh kokonay akïsal Tororöt.

¹⁴ Wölo kïnarek wowïn pö kö pö saghat, ompöwölo kisop Yeso chi asispa Sapato. Atolapay kïmwochï nyoryonay lö, “Mi osiswö mut nko akonga cho kimuköy keghöy ighisyewut. Karam apkanakwa osiswechoni atökesopok, wölo okïr mapkan asispa Sapato.”

¹⁵Kuyokyï Echotyon chichay lö, “Ochech chepölköstinechï! Nyaye tyoköy chi tïkwïl edanyi anta sïkïryenyi kïngeta kaw akïkat kïwö kïgha pögh asispa Sapato?

¹⁶Anyï ye mi yi korka nyo pö ara Apraam nyo kirat Onyötö könyis 18, olentekwa kömömïchininye ketyaka nyinte kichiratanï asispa Sapato?”

¹⁷Atoni kilïm ngalechoni. Kïlolïyonchö pungkachi löwïr. Wölo kïngörekyö nyorye kïmïkul ompö kïgh anka tïkwïl nyo töngönchin nyo kigh nyinte.

¹⁸Atolapay kïlö Yeso, “Kïkarkegh Pöyunöto Tororöt nko ne nya? Kikongityö nko ne?

¹⁹Karkegh nko kösïghyonto ket nyo kïkuro aradali, nyo kicheng chi akïkötkötyï parenyi. Kïpit ketay akïlïkwï ket nyo wow. Kïpka töritwö kitek korikwa morichi.”

²⁰Atolapay kïtep Yeso ngat lö, “Okongityonan nko ne Pöyunöto Tororöt?

²¹Karkegh nko mumar cho kicheng korka, akukulkulyö nko köröpon sömök pïsya cho pö ntökïkutï löwïr.”

²²Kuwer akunetata pich ompö kanastin cho echön nko cho mïnkech. Otoni kimi Yeso kïwetöy kutöngöy Yerusalem.

²³Kïtep chitö anka lö, “Echotyon, ngörï so pich cho kïsöru?” Kuyokyï Yeso lö,

²⁴“Okil kegh lasiny atamuka olïtö kukat nyo marich, ompöwölo omwowokwa lö, chang pich cho möröy lö, tökïlït pöyunöto Tororöt, wölo memuköcha.

²⁵Ompöwölo ato nget chito kot akïkar kukenyi, apkakwa oghyongo sany akonykony kukanay akursyö lö, ‘Yotwecha kuke, we Echotyon,’ mölyöngu nyinte lö, ‘Monkïtönye wölo opkonokwa.’

²⁶Atoni nyu ato omwoghekwa lö, ‘Nyaye kikyomisyecha akegheghsyö nko nyi ainetisyenyi ompö kanastinecha!’

²⁷ Yoku nyu nyinte ngat lö, ‘Monkïtönye wölini opkonokwa. Angetena wölo omitan cho ochï mwokïyis.’

²⁸ Wechï Lïku rira nko nyaghata kelat ompö akwa atoni, ato osïwïyekwa Apraam nko Isak nko Yakopo nko werkoy löwïr kïmï Pöyunöto Tororöt akewirchokwa sany!

²⁹ Pkono pich kongasis nko wölnö röytoy asis ta, kïpkana walaka wölno akumpur kwomisyö ompö Pöyunöto Tororöt.

³⁰ Akany kïpköchok lö, lïku pich walaka cho pö löt cho pö tagh, akïlïkwï cho piko walaka tagh, cho pö löt.”

³¹Otini kiwany Yeso kïmwa ngalechoni, kïpka Parisaytin* walaka akïlenchï, “Ngetena yi aiwechï kegh kareran. Möchöy Erode kïpörinyi.”

³²Kuyokyï Yeso chane lö, “Ape omwochinö Erode, tïsintonona karkegh nko chepkonö lö, ‘Oyonan oy, asopan pich cho chiryote asisete nko asïyech, ato mi köyoghi awangan pöghisyenyu.’

³³Wölo mïchini onkïtunökwa lö omitan pantanyu asisete nko asïyech nko köyoghi, ompöwölo mököchininye ato kïpörchï werkoyon wop anka tïkwïl kïpoto Yerusalem.

³⁴“Ochech Yerusalem! Nkepar werkoy aiwira koghïn kiyoktoghi Tororöt cho kikïyonunyi. Kyaghamïtan piköku löwïr kïnyïl cho tya le wölo ghömïtïto kokorochö warechi ompö köpepoy, wölo kimepïswanïnyinye.

³⁵ Kïlenyona, kökïpïstö kanasyantengu nko kö pö saghat kïlïkwï kïratyan. Amosïwïyanïkwanye ngat ntökïtenö olekwa, ‘Nya kusoyön Tororöt nyinte nyini ngwïnöy ompö kaynata Echotyon.’ ”