Read pokoot LUKA 18 Bible Online

LUKA 18 - pokoot bible

LUKA 18

¹Kïmwochï Yeso asistanka kinetankachi körkeyïn nyo kinetöy lö, mïchini kïsagh osis löwïr, amömeghö mutïnö.

²Kïlö, “Kimi mutinto ngal ompö kanasyan akonga nyo kimewöghönye Tororöt anta konyït pich.

³Kingwïnchini nyinte kïnomnyö korka nyo kile mïsïk kingwïnöy nyo kimöngöy kanasyantanoni kïlenchini, ‘Pesyencha nko chichï wökanïn.’

⁴Ompö osis cho te kimöterchïnye kokonay. Wölo ato mi löt kunonchï kegh lö, ‘Kïrkegh kömowöghanye Tororöt amoyonganye pich,

⁵wölo ompö kisusöt nyo kesusön kokonï kïtenö osis, oghchinan mantanyi. Kyopïrönan kingwïnatenyi nyo pö kïteno osis.’ ”

⁶Atoni nyu kïlö Echotyon, “Atere nyu ngal cho kimwa mutintononi pö ngal nyo kimörïpönye man.

⁷Aki yeo, olontekwa möporyechininye Tororöt kïlankachi cho rirchini nyinte pöghet nko nangat kïnyorï man? Alentekwa meghönye lawel?

⁸Omwowokwa lö, yörchini chane man lawel. Wölo ato itï asïyech Wero Chi ekïnyoru pich cho ghönöy nyinte ompö ngwïny nya?”

⁹Atolapay kïmwochï Yeso chane körkeyïn anka nyo ngölono pich cho kilenchini kegh kïchï tenote akïsas pikö walaka.

¹⁰“Kimi ato kipa pich odeny Kö pö Tororöt* kïsagh. Ki Parisayon nko kwöghinto surï.

¹¹Kughyongö Parisayontonay ato le tagh akïsagh lö, ‘Oyokunyi sörö, Tororöt, ompöwölo moköranye kegh nko pikö walaka cho le chelölos, cho ghach anta cheporestin. Malatanye ompö kwöghintoninö pö surï.

¹²Okïruran kïnyïl odeny ompö wïki, akoninyi kareranpa taman cho pö tïkuchan löwïr cho onyoru.’

¹³Wölo kughyongö kwöghintonay pö surï otinöna, akimemïnye ntökïsyol tokochunyi kuros yïm. Atolapay kïwira morichi takat kosyochï kegh akïlö, ‘Syonchante Tororöt, ochan mwokïyon.’ ”

¹⁴ Kïlenchï Yeso pïchay, “Omwowokwa lö, kirot kaw kwöghinto surï, chi nyo kikelöstoghchi wölo melö Parisayontonay. Ompöwölo anka tïkwïl nyo syolöy kegh, kerekuno, akwanka tïkwïl nyo rekuno kegh kesyolöy.”

¹⁵Kimi kimïtyï pich cho Yeso monekwa, tökukana morichi. Wölo otini kisïwa kinetankachi pïchini kimïtu monekwa.

¹⁶Wölo kïkur Yeso kïpkonchï nyinte kuteghchï atolapay kïlenchï kinetankachi, “Akanya kïpka monïnge wölo omitan. Motögho chane ompöwölo pö Pöyunöto Tororöt cho lata chete.

¹⁷Omwowokwa nyoman lö, chi anka tïkwïl nyo mötochönye Pöyunöto Tororöt le monïng nyo mïnïng, kïmölïtönye wölini.”

¹⁸Kïtep asistanka kintöghoghinto pipö Yaudi Yeso lö, “We konetin nyo karam, oghan ne tosïch söpon pö kokay?”

¹⁹Kuyokyï lö, “Ompö ne temwaghanyi lö chan karam? Möminye chi nyo karam kïpoto Tororöt onkït.

²⁰ Inkïtönyi kirurut ompö chay lentöy, ‘Megh cheporesnan, mepar chi, mechorsyö, mesöwintön ompö putintön, itech kon nko komötï?’ ”

²¹Kuyokyï chichay lö, “Kyarïpan choni löwïr kïngeta otini kyochan mïnïng.”

²²Kïkany kïlïm Yeso lenyoni, kïlenchï, “Mi kïgh akong nyo mïchini ighanyi. Wïyö altena tïkwïn löwïr cho itïngetö aitö ropïyeni mey, telïkuna sïkön ompö yïm. Atolapay ingwïn irïpanïn.”

²³Wölo otini kilïm chichay ngalenchoni, kïwurön nyoman ompöwölo ki sïkön nyinte.

²⁴Kïkany kïsïwa Yeso lö kiwurön chichay kïlö, “Aghïgh kïtya kïlït sïkön pöyunöto Tororöt!

²⁵Kwïskwïs kïlït tamas kompa södök kïtïl kïlït sïkön Pöyunöto Tororöt.”

²⁶Kïtep pich cho kilïm ngalechoni lö, “Akï ngo nyu köny nyo nyoru sörunöt?”

²⁷Kuyokyï Yeso lö, “Nyo memukonye ompö ptangengmöt, kumuko ompö Tororöt.”

²⁸Atolapay kïlö Petro, “Rose acha! Kökïpïstecha kestonicho akerïpinyi.”

²⁹Kuyokyï Yeso lö, “Nyoman omwowokwa lö, chi anka tïkwïl nyo pïstoy katanyi anta korkenyi anta werkökwa anta yiyichi anta monechi ompö Pöyunöto Tororöt,

³⁰kïnyoru kïnyïl cho chang ompö möngonete nko nyu söpon pö kokay ompö osis cho pkonöy.”

³¹Kimït Yeso kinetankachi chay le taman nko odeny ato le yona akïlenchï, “Ato le nyete kïpetecha ketöngöy Yerusalem wölini pïntegho ngala lapay cho kikir werkoy ompö Wero Chi.

³²Kitöni mori punton cho mïnöy akumwa akïngwïtï nyinte.

³³Ngetöy ngat kïmungöy akïpar nyinte. Wölo tutu nyinte asisto sömök.”

³⁴Wölo kimöpköchïcha kinetankachi ngalechoni nyonikïny. Kimanamnye ngale chane möt nyo kimenkïtïnye lö ne nyo kimwoghöy Yeso.

³⁵Kïkany otini kirich Yeso Yeriko, kimi atoni chepkarot nyo kitöpo arawet kamas, kïsomsïyi.

³⁶Otini kilïm chichay söpïch kuweröy, kïtep pich cho kilekïto nyinte lö, “Kïgh nyo mi kwigho nya?”

³⁷Kïlenchï pïchay, “Yeso nyo pö Nasaret nyete weröy yi.”

³⁸Atoni nyu kutegh chichay tya lö, “Yeso Wero Daudi, syonchante!”

³⁹Kuteghchï pich cho kimi tawunyi kïsï, wölo kuta ngat tya lö, “Wero Daudi syonchante!”

⁴⁰Kughyö Yeso ochï pïchay kumïtï chepkarotnay wölo mi nyinte. Otini kilekïtyï kïtep Yeso nyinte lö,

⁴¹“Imökenyi awunyi ne?” Kïlö, “Echotyon omökan arosïta.”

⁴²Kïlenchï Yeso, “Rosïtena ye. Kesopinyi kighanatengu.”

⁴³Panini lawel kurosïta chichay. Atolapay kïrïp Yeso kïmï kïsölöy Tororöt. Otini kisïwa tuyonay, kïsal löwïr Tororöt.