Read pokoot LUKA 19 Bible Online

LUKA 19 - pokoot bible

LUKA 19

²kïnyorï yetïn pö kwöghi surï nyo kikïkuro Sakayo, chi nyo kile sïkön.

³Kimököy nyinte kunkïtu Yeso lö, ki chi nyo nen. Wölo ki chi nyo tangogh nyinte, nyo kimemïnye kïsïwa Yeso ompöwölo kikarta söpïch.

⁴Kïlenyona kurïp kïnyagh söpïchay tagh akïpus moköngwö tökïsïwa Yeso kuweröy aranoni.

⁵Otini kitï Yeso atoni, kïtopön yïm akïlenchï, “Sakayo, rökunö lawel, ompöwölo ochan tontengu asete.”

⁶Otini kilïm Sakayo lenyoni, kïrökwï lawel akïtach nyinte ompö ngörekyö nyo wow.

⁷Akwotini kisïwa pich, kïngwïrngwïronchö lö, “Kölö ne tökïwö Yeso kïlïkwï tonto mwokïyon.”

⁸Atolapay kughyö Sakayo ompö tawu pïchay lapay akïlenchï Echotyon, “Omwowunyi Echotyon lö, otöninan kareran pö tïkuchan mey. Kïnyïl ato mi chi anka tïkwïl nyo achengan tïkuchi ompö ara lïs, oyokyinan nyinte kïnyïl angwan.”

⁹Kïlenchï Yeso, “Ketï sörunötö köyete asiswanete, ompöwölo chichete tïkwïl kï pö ara Apraam.

¹⁰ Ompöwölo kingwïn Wero Chi kïmar akïsörï cho potyote.”

¹¹ Kikany atoni kimi pich kïteröy ngalechoni, kulet tagh Yeso kunet chane ompö körkeyïn. Kiwö nyu lenyoni ntökïrich kanasyanta Yerusalem, akilenchini kegh chane kikïlekïtit ketowï Pöyunöto Tororöt.

¹²Kïlenyona kïlenchï, “Kimi chönökopïryon akong nyo kiwö kor nyo low atökengopchï kïlïkwï pöytoghin, atolapay kïmïla korenyi.

¹³Kïtomö kïwö, kïkur mötworichi taman akutö anka tïkwïl ropïyen cho körökegh atolapay kïlenchï, ‘Aghena pasyara ropïyenichï ntökïtenö amïlan.’

¹⁴Wölo kïtagh piko korenyi nyinte, kïlenyona kïyonta pich kïpa kïmwa lö, ‘Melö kïmökecha chichoni kïpöytonecha.’

¹⁵“Kimïla chichoni ato kikengopchï kïlïkwï pöytoghin. Kïkur mötworichay kitö nyinte ropïyen, kïpka kimwochï lö kiyï ne ropïyenichay kitö nyinte chane kwigha pasyara.

¹⁶Kingwïn mötworin nyo pö tagh kïlenchï, ‘Echotyon, kiyï ropïyenichay kikonaninyi ropïyeni walaka kïnyïl taman.’

¹⁷Kuyokyï chichay lö, ‘Oso, mötworintenyu nyo karam! Ompöwölo kelïkunyi nyo ghanate ompö kïgh nyo mïnïng, opïsunyi ghyongchinö kanastin taman.’

¹⁸Kwitï mötworinte nyo pö odeny akïlö, ‘Echotyon, kiyï ropïyenichay kikonaninyi ropïyeni walaka cho le mut.’

¹⁹Kïlenchï, ‘Opïsunyi ghyongtenö kanastin mut.’

²⁰“Kwitï mötworinte anka akïlö, ‘Echotyon chenga ropïyeniku chanye kikonon, kyorötyan ananka.

²¹Kyawaghinyi, ompöwölo ichinyi chi nyo kowkow. Ichengonyi chi kïgh nyo kömelö nyengu, ailenyi che melö kengoranyi.’

²²Kïlenchï chichay, wechï ichinyi mötworin nyo gha, ‘Orwokyininyi ompö ngaleko kutingu. Kinkïtönyi lö, ochan chi nyo kowkow, achengan kïgh nyo melö nyinyan, alön cho mangoranye.

²³Kïlö ne nyu, tömetönönyi ropïyenichan penki nyo kotö konyorunan tösöw otï kamïlan?’

²⁴“Atolapay kïlenchï pïchay kighyongo atoni, ‘Achengena nyinte ropïyenichoni atolapay otö mötworintonay kiyï ropïyenichi kïnyïl taman!’

²⁵Kuyokyï chane lö, ‘Echotyon, tïng nyinte ropïyen taman!’

²⁶ Wölo kuyokyï chichay lö, ‘Anka tïkwïl nyo tïng kïgh ketösini, wölo nyo mötïngnye kïgh, kechengo ompö nyini kötïng.

²⁷Akï yeo, kunko punkachan chanya kimachamnye alïkwan pöytoghintengwa? Amïtuna yi, apara chane tawunyan.’ ”

²⁸Nyini kiwany Yeso kïmwa ngalechoni, kuntöghoghchï nyinte chane ompö pan nyo kipetöy kugheghöy Yerusalem.

²⁹Kïkany kïrich Petpake nko Petaniya, ompö kutïng pö Arol, kïyonta kinetankachi cho le odeny kuntagha.

³⁰Akïlenchï chane, “Ape kanasyantaninö mi tawunkwa. Otini kolïtökwa kanasyante, asïwekwa wawa sïkïryö nyo tömönye kïweghö chi akï ratate. Atyaka atolapay okötï yete omitan.

³¹Akwoto tepakwa chi lö, ‘Kölö ne totyokekwa waweto sïkïryö?’ Olenchï, ‘Möchöy Echotyon kïwegho.’ ”

³²Kïpa kinetanchay kikiyoktö pantangwa akïnyorï wawa sïkïryö le nyaye kikïmwochï.

³³Akwotini kimi chane kutyoköy wawanay pö sïkïryö, kïlenchï piko kïpö, “Kölö ne totyokekwa waweto sïkïryö?”

³⁴Kuyokyï chane lö, “Möchöy Echotyon kïwegho.”

³⁵Kïkat nyu chane wölo mi Yeso. Atolapay kïnget pich kukorkorchï sïrokökwa wawanay pö sïkïryö, akïkany kïtöpö Yeso parak.

³⁶Akwotini kiwegho Yeso sïkïryonay, kukörkorchï pïchay sïrokökwa or nyo kuweröy nyinte.

³⁷Kïkany otini kirich kïrökyï kwit Yerusalem ato kirökuno ara kutïng pö Arol, kutor tuyo kinetankachi kïmïkul kïngörekyö. Kingörekyö lenyoni akïsal Tororöt ompö kut nyo wow, ompö ighisyewut löwïr cho echön cho kisïwa chane.

³⁸ Kimwoghöy lö, “Nya kusoyönö pöytoghintö nyo ngwïnöy ompö kaynata Echotyon! Nya kïsïch yïmö kalya akïpöyit Tororöt ororyö.”

³⁹Atoni nyu kïlenchï Parisaytin* cho kimi kwenu söpïchay, “Konetin, mwochinö kinetanköku kïsisyö.”

⁴⁰Kuyokyï Yeso lö, “Omwowokwa nyoman lö, atosisyö chane, kuteghyot koghïn.”

⁴¹Kitas tagh Yeso kirich kanasyanta Yerusalem akwotini kisïwa kïlokyï ompö kisyonchin

⁴²akïlentöy, “Porun ne asisete or nyo ipunyi kalya? Wölo manyï ye memukenyinye ntesïwa!

⁴³Pkonöy osiswö cho rikinyi punköku lö tïlkwïch akïkörchinyi ori tömökïminye wölo ilïtunonenyi.

⁴⁴Purpurchininyi chane ngwïny ntelïkwï terïtyon akïnyaknyakan pich cho möngöy oringu. Möminye kogh nyo le ompö akonga nyo pïsini chane kïmi paraku kada anka, ompöwölo kimöpköchinyinye ato kingwïn Tororöt kïsörunyi.”

⁴⁵Kïlït Yeso Kö pö Tororöt akïyon pich cho kyoltoy tïkwïn

⁴⁶ Otini kiyonsïyi kilenchini chane, “Mwoghöy Kikirut lö, lentöy Tororöt, ‘Lïku Konyan kö pö saghat.’ Wölo anyï kaghakwa ye kïlïkwï köpöno mosï.”

⁴⁷ Ompö osiswechoni, kinetisyeghö Yeso Kö pö Tororöt osis löwïr. Kïmach tïsï cho echön nko koneti kirurut kïpar nyinte kimach tïkwïl lenyoni pich cho echön ompö korononi.

⁴⁸Wölo kimönyorïcha ore nyo tïgho, ompöwölo kipïrchï pich kïter ngalechi lödo.