Read pokoot LUKA 2 Bible Online

LUKA 2 - pokoot bible

LUKA 2

¹Kichikyï osiswechoni Kaisari Aukusto lö, kïmököy kekiröy kaynötut pö pich ompö kor kïmïkul atökeyit.

²Kipö kiyitötononi tagh kekir atoni kipöytoy Kurenio koro Sirya.

³Kïpa pich tïkwïl atökekir chi anka tïkwïl ompö kanasyantenyi.

⁴Kïngeta Yosep kanasyanta Nasaret nyo mi Kalilaya akïwö kutang Yudea ntökwit kanasyan nyo kikuro Petleem, wölo kikïyichï pöytoghin Daudi. Kiwö Yosep wöloni ompöwölo kipö nyinte ara Daudi.

⁵Kiwö wöloni atökukir kegh nko Marya, nyo kökikulotokïn akimirsïyi.

⁶Akwotini kitökïmi Petleem, kwitïta osiswechi cho pö lusyogh.

⁷Kïyï poretyenyi nyo le weri, kuyenö sïra monïng akumïkonchï atekerya kyak, ompöwölo kimöminye pöroyïn kö pö to nyo kitempuröy chane.

⁸Kimito mösöwö osiswechoni korononi cho kiripöy kyakikwa oghö.

⁹Kuchumchï chane malaykayanta Echotyon kulïwchï ororyo Echotyon kuwit chane, kuwöghisyö nyoman,

¹⁰wölo kïlenchï malaykayantanay, “Mowöghisyö! Ompöwölo opkokwa Lökoy cho Karamach cho ipchini pich lapay ngörekyö nyo wow.

¹¹Kikeyï asisete ompö kanasyanta Daudi Ghetin ompö akwa nyo le Kristo* akï Echotyon.

¹²Akwanyï kiporunöte ompö akwa, onyorunekwa mnyarkil nyo kikiyenö sïro pö monïng akemïkonchï atekerya kyak.”

¹³Kïnyini lawel kuchumï söpïch nyo wow nyo pö malaykeni yïm, akuryam nko malaykayantanay akïtum tumwöy cho sölo Tororöt lö,

¹⁴“Nya kwororit Tororöt nyo mi wölo töror tya, akïsïch ngwïnya kalya nyo pö pich cho le chamankachi.”

¹⁵Otini kipechï kegh malaykenichay kïmïlonchö yïm, kïmwochï mösöwechay lö, “Kepe Petleem atökesïwena kïyï kegha kömwowecha Echotyon.”

¹⁶Kïlenyona kïryagh akïnyorï Marya nko Yosep akïsïwa mnyarkil nyo rïwöy ateker.

¹⁷Akwotini kisïwa mösöwechay monïngay, kïmwochï chane ngal cho kömwochï chane malayken ompö monïngoni.

¹⁸Kïtangany pich nyoman cho kilïm ngalechoni kimwoghöy mösöwö.

¹⁹Wölo kïkomönchï Marya mïkulöwunyi ngalechoni löwïr akunan lasiny.

²⁰Kïmïlonchö mösöwechay, akï tumöy sölut pö Tororöt ompö ngal löwïr cho kilïm akïsïwa, ompöwölo kighisyö nyo mötïny le wölini kimwochï malayken chane.

²¹ Otini kit osis mut nko sömök, kwit ato kïmutöy montö, kekurö nyinte Yeso, kaynat nyo kitö malaykayan nyinte otini kitomönye kesïch.

²² Kitïta ato kimïchini Yosep nko Marya kutïlil kegh kïrïp kegh nko Kirurut pö Musa. Kwip monïngay ntökwit Yerusalem atökutö Echotyon,

²³ ompöwölo kikikir ompö Kirurut pö Echotyon lö, “Kitöni poret anka tïkwïl Echotyon nyo le weri.”

²⁴Kipetöy chane tïkwïl Yerusalem atökutö tïsin amöros kïrïp kegh nko Kirurut pö Echotyon nyo lentöy, “Kïkonu chepïrïmpen odeny anta wara cheptuken odeny.”

²⁵Kimito osiswechoni chi nyo kimönyöy Yerusalem nyo kikïkuro Simion. Kitenate nyinte akuwöghöy Tororöt, kiköngöy chichoni sörunöto Israel. Kimito Mïkulögh nyo Tïlil nko nyinte

²⁶akikïngongchï Mïkulögh nyo Tïlil nyinte lö, mönyoghönye kïröpösöy kïtomö kïsïwa Kristo nyo kiyomis Echotyon.

²⁷Kuntöghoghchï Mïkulögh nyo Tïlil Simion kïlït Kö pö Tororöt. Akwotini kipï yïyiko monïngoni le Yeso Kö pö Tororöt atökeghchï kïrïp kegh nko machat nyo kipö kirurut.

²⁸Kïnama Simion monïngay ewunechi akïsal Tororöt lö,

²⁹“Pïstenönyinyu ye mötworintengu, Echotyon, kïwö ompö kalya kïrïp kegh nko ngölyontengu,

³⁰Kasïweghan konyichu sörunötengu,

³¹nyo kitötinyi tawu pich löwïr.

³²Löpoyïn nyo ngongchini pipö punton machatengu akwipchini ororyö piköku Israel.”

³³Kïtöngönchï kwanta nko kame ngalechoni, kingalana Simion nyinte.

³⁴Kusoyön Simion chane akïlenchï Marya, yoto monïng, “Rose, kikïl Tororöt mönïngï kïlïkwï macheypa kipotöt nko sörunöto pich cho chang ompö Israel. Lïku nyinte kiporunöt nyo ngwïno wölo mi Tororöt nyo mölomölo kegh pich cho chang,

³⁵atökingongwï kinonutkökwa cho wïngote. Ailïmtonyi nyarïl ompö mïkulöwungu kegh le chok nyo ngatip.”

³⁶Kimi werkoyontö nyo kïle korka nyo kikïkuro Ana akekuro kwanta, Panuel nyo kipö ara Asyer. Kikikïyosit nyinte, kitöpö nko santenyi könyis mut nko odeny kïngeta otini kile mïrar,

³⁷akwato mi löt kïlïkwï mïsïk ntökwit könyis 84. Wölo kimöpïstönye Kö pö Tororöt, kisagh nyinte Tororöt pöghet nko nangat, ato kikïruröy nyinte.

³⁸Kwitï kamanoni sayanoni akuyokyï Tororöt sörö akïngölonchï pich lapay ngala monïngay, cho kikönöy kityakata Yerusalem.

³⁹ Kikany kuwany chane ngal tïkwïl cho kiyomisöy Kirurut pö Echotyon, kïmïlonchö Kalilaya ntökwitï kanasyantengwa kegh nyo pö Nasaret.

⁴⁰Kïyetï monïngay akïnar, kingöghom nyoman akimi kisoyönöto Tororöt parakunyi.

⁴¹ Kipetöy yïyiko Yeso könyis lapay Yerusalem, atökwam omisyo Pasaka.*

⁴²Otini kitïta Yeso könyis taman nko odeny, kïpa Pasaka le kïnomnyö.

⁴³Kikany kuwonyö osiswo omisyö, kïmïlonchö kutöngwï katangwa, wölo kudong Yeso Yerusalem, akimenkïtcha yïyichi.

⁴⁴Kinonöy lö, kimi nyinte kwenu söpïchnoni, kïlenyona kïrutö kwimön, atolapay kutor kïmaramar monïngay wölo kimi pikökwa nko kongotikwa.

⁴⁵Akimökïnyorïcha, kïmïlonchö ngat Yerusalem kïmarata nyinte,

⁴⁶ato mi asisto sömök, kïnyorchï nyinte Kö pö Tororöt, mpuröy nko konetï, teröy chane akïtepöy teput.

⁴⁷Kitangany pich tïkwïl, cho kiteröy ompö pköchintanyi nko wölini kiyodoy nyinte teputchay kïlïkwï.

⁴⁸Kïtangany yïyichi otini kisïwa nyinte, kïlenchï kame, “Kölö ne teghwecha nyi le nyï nya monïngï? Rose lö, kamarinyi nko papongu ompö nyarïl.”

⁴⁹Kuyokyï chane lö, “Komörchinanïkwa ne? Kömonkïtökwanye so lö kömökyinanïn omitö koto Paponyu?”

⁵⁰Wölo kimöpköchïnye ngölyontononi kimwochini Yeso chane.

⁵¹Atolapay kïwö Yeso nko chane kutang Nasaret, kïtech nyinte chane akïterchï. Kïwïnchï kame ngalechoni löwïr mïkulöwunyi.

⁵² Kïtasa Yeso kïngöghomit akïghetï, kïcham Tororöt akïcham pich tïkwïl.