Read pokoot LUKA 20 Bible Online

LUKA 20 - pokoot bible

LUKA 20

¹Asistanka ato kimi Yeso kuneto pich Kö pö Tororöt* akwomchini chane Lökoy cho Karamach, kïpkonchï tïsï cho echön nko koneti kirurut nko poy.

²Kipka kïtep nyinte lö, “Mwowecha owesyö ne nyï ighonyi tïkuchï? Anta ngo nyo kökoninyi owesyononi?”

³Kuyokyï Yeso lö, “Akanye nyu atepakwa kïgh mwowante

⁴Kingwïna owesyonay kipatisano Yoana pich, wölo mi Tororöt nya anta kingwïna pich?”

⁵Kïngölonchï kegh chane lö, “Akiyokyini lö ne nya? Ato kïlecha, ‘Kingwïna wölo mi Tororöt,’ kïlenchinecha, ‘Kï kilö ne tömaghanakwa nyinte?’

⁶Kïnyïl ato kïlenchicha, ‘Kingwïna wölo mi pich,’ kïwirenecha koghïn pïchete mi yi, ompöwölo kikughan chane löwïr lö, werkoyon Yoana.”

⁷Sörömunyi kuyokyï lö, “Mökinkïtöchanye wölo kingwïna.”

⁸Atoni nyu kïlenchï Yeso chane, “Kïmomwowokwanye tïkwïl lö owesyö ne nyo oghonan tïkuchï.”

⁹ Kitas tagh Yeso kïmwochï chane körkeyïn nyo lentöy, “Kikatkat chi parenyi nyo pö sapipun akumönokyï ngorï. Atolapay kïrutö kore anka akïtöpö wölini nyo kogh.

¹⁰Otini kirir sapipun, kïyonta mötworintenyi wölo mi ngorichay tökwipchï akwe walak. Wölo kimuny chane mötworintonay akïyon kïwö kïtuw.

¹¹Kïtas tagh kiyonta mötworinte anka. Kimuny chane nyoni tïkwïl akutö arasï atolapay kïyon kïwö kïtuw.

¹²Kïyonta chichay ngat mötworintenyo pö sömök. Kïmuny ngorichay nyinte tïkwïl lönay, akutulö paranay.

¹³Atoni nyu kunonsyö chito par lö, kïgh ne nyo ‘Oghan nya? Konyorwan! Oyontonan werïnyan nyo le chamanenyan, konyïtöy ana nyinte.’

¹⁴Wölo otini kisïwa ngorichay nyinte, kïngölonchï kegh lö, ‘Anyï nyu mïlinto par. Ketïghö kïma tökïlïkwï chicho tïkuchi.’

¹⁵Kutul chane weray ompö paranay pö sapipun atolapay kïtïgh.” Kïtep Yeso pïchay kïteröy nyinte lö, “Olentekwa idone chito par ngorichoni?

¹⁶Nyomwowok, ngwïnöy kïpöröy chane akutö pikö walaka kïngor pareto sapipun.” Nyini kilïm chane ngalechoni kïlö, “Purörö! Nya kïkïr yïmö meghisyö choni!”

¹⁷Kïtopön Yeso chane akï lö, “Pköchinokwa lö ne nyu Kikirutchay lentöy, ‘Kawaghaka koghay kisas tekï lö kwïle kïlïkwï kada nyini tighöy kot kïmïkul?’

¹⁸Chi anka tïkwïl nyo pïtyini koghoni, kenyoknyoköy kïlïkwï mïnchïran, kïnyïl ato rulchï chi koghoni, kïngoghöy nyinte lö körpïs.”

¹⁹Kimukyï koneti kirurut nko tïsï cho echön kïnam Yeso ompö atoni, ompöwölo kisöwï lö, kingölono körkeyïnoni chane. Wölo kimemïcha kïnam ompöwölo kuwagh pich.

²⁰Kïlenyona kïyar chane pöroyïn anka tökïnam nyinte. Otini kighöy lenyoni, kïyonta ghotï cho kigh kegh pich cho karamach tökumï kïnama Yeso ngal cho kimwoghöy, atolapay kuonkoghchï nyinte mori soch.

²¹Kïlenchï, pïchay Yeso, “Konetin, kinkïtöcha lö, imwoghenyi ainetöy kïpö man. Kinkïtöcha tïkwïl lö, mekïlenyinye pich ainetenyi ompö man machata Tororöt ompö pich.

²²Mwowecha köny ngölyontonï. Mïchinecha kekwöghchinö surï Kaisari nya anta ewo?”

²³Wölo kïsöwï Yeso ngöghöptöngwa, kïlenyona kïlenchï,

²⁴“Oporwanïn ya ropïyon.” Kïtep pïchay lö, “Pö ngo mötï nko kaynanï kikikirchi ropïyontonï?” Kïlö, “Pö pöytoghin.”

²⁵Kïlenchï Yeso, “Otönö Kaisari tïkuchi, otö Tororöt chechi.”

²⁶Kïlenyona kïmökumïcha kïnama Yeso ngölyon nyo kimwagha tawu pich. Wölo kïsisyö lökïr, akïtöngönchï wölini kiyokyï nyinte teputkökwa.

²⁷ Kïpkonchï Yeso pipö Sadukaytin* walaka pichoni kï pipö Yaudi cho lentöy metutucha pich cho kimeghö. Kipka kïtep nyinte lö,

²⁸ “Konetin, mwowecha Kirurut pö Musa lö, ‘Ato rapas chi nyo kitïng korkenyi nyo kitomönye kïsïch monïng, kïmïchini kïmïl werïngwa anka kokononi tökïyichï monïng weri nyay karapas.’

²⁹Kimi nyu werpö chi cho le mut nko odeny. Kïkensyö weri nyo tagh akïma kïtomö kïsïch monïng.

³⁰Atolapay kwip weri nyo pö odeny kokonay akïma tïkwïl.

³¹Atolapay kwip nyo pö sömök kokonay. Kirïpkegh lenyoni werchay le mut nko odeny. Kimeghö chane löwïr amosïkïcha kokonay monïng.

³²Ato mi lötï, kïma kokonay tïkwïl.

³³Kïtepichanyi ye nyu lö, pöyitu ngo kokonay ato tutï pich? Ompöwölo kikikwip chane kï mut nko odeny kokononi.”

³⁴Kuyokyï Yeso lö, “Kensïyi akuyiltoy monekwa pich cho pö osiswechï.

³⁵Wölo pich cho töni Tororöt kimukat kututuna ngwen atökïmïl söpon osis cho pkonöy, kïmökensïyicha anta yilta monekwa.

³⁶Melö tökïmeghsot chane ompöwölo möngisïyi le malayken akï monïngo nyinte nyo Töror tya, ompöwölo kiketutunö chane ngwen.

³⁷ Ompö ngalechï pö kitutunöto pich cho kimeghö, olentan Musa nyinte nyo kiporï lasiny atay kikir ngala sïkwïr nyo kinöghöy. Ompö atoni kimwa nyinte lö, Echotyon, ‘Kï Tororöt pö Apraam, akï Tororöt kï Tororöt pö Isak akï Tororöt pö Yakopo.’

³⁸Meporunye nyoni lö, Tororöt kï Tororöt nyo pö cho sötote amelö nyo pö cho kimeghö? Ompöwölo tïng pich söpon ompö Tororöt.”

³⁹Otini kimwa lenyoni, kïlenchï koneti kirurut cho kimi atoni, “Owöy konetin, keyokyini chane kïsisyö.”

⁴⁰Kimwa lenyoni ompöwölo kimökumïcha kïtep nyinte teputkö walaka.

⁴¹Kïtep Yeso pïchay lö, “Kölö ne tökïlentöy pich Kristo kï wero Daudi nya?

⁴² Ompöwölo mwoghöy Daudi nyinte ompö Kitapu Tumwöy lö, ‘Kilenchï Echotyon Echotyontenyan, Töpenö okumpö ewunyan nyo pö tagh,

⁴³ntökïtenö arïntewunyi, punköku.’

⁴⁴Otï ye kuröy Daudi nyinte, ‘Echotyon,’ kïlïku nyu Masiya* wero Daudi lö ne?”

⁴⁵Akwotini kimi pich kïteröy ngalechi, kïlenchï Yeso kinetankachi,

⁴⁶“Orip kegh koneti kirurut cho chömöy kunisonchegho sïrokökwa cho koghöch atökutakwes pich ompö konyït ompö donyö. Kïlöy chane ngöcher cho mi tagh ompö kori sowut akwighöy lenyoni nko ompö wölo kyomisyegho.

⁴⁷Söro chane mïsïktin tïkukwa ompö lïs, atolapay kïsagh sowut cho koghöch tökelentöy karamach. Nyoru chane kirwok nyo wow tya.”