Read pokoot LUKA 21 Bible Online

LUKA 21 - pokoot bible

LUKA 21

¹Kimi ato kisïwa Yeso pich cho le sïkön kutöni ropöwekwa köröpo Kö pö Tororöt.*

²Kisïwa tïkwïl mïsïk nyo kile meywon kutötöy, ropöwontenyi nyo pö senten odeny.

³Atoni nyu kïlö Yeso, “Omwowokwa nyoman lö, ropöwon nyo kökonï mïsïknï le meywon kï chang kïtïl cho kökonï pïchona löwïr.

⁴Ompöwölo ketötö pïchinö walaka rarakan pö sïkönötengwa, wölo kïrkegh kö meywon kokonï lö ne, kemï kïkonï löwïr chini könömtoy kegh.”

⁵Akitö kïngölono pikö walaka ngala Kö pö Tororöt nyo kimi Yerusalem, wölini kikïmina koghïn cho pïchighöch kïlïkwï nko tïkwïn cho kikitö Tororöt. Kïlenchï Yeso chane,

⁶“Pkonöy osiswö cho möngötininye kagh nyo le ompö akonga parakuto kada anka, kïwirchini ngwïny löwïr.”

⁷Kïtep chane lö, “Konetin ighisot ngalechoni ato le oyï nya. Akï kiporunöt ne nyo mwowu lö, karich kwighisyö?”

⁸Kïlenchï Yeso, “Orip kegh tömökilutok wuw. Ompöwölo pkonöy pich cho chang ompö kaynenyan kïlentöy, ‘Ochan nyinte,’ akïlö, ‘Kikarik ato ngwïnöy Kristo.’* Mayay arïp chane.

⁹Akwoto alïmakwa ngala poryot nko ngala puchen, motyö, ompöwölo nyoghöy kwighisyot ngalechoni mötïny, wölo meporunye choni lö, kikwitï söröm.”

¹⁰Kulet tagh Yeso kïlö, “Ngetöy koro kïporyegho kore anka kinget paytagh kïporyeghö paytaghta anka.

¹¹Itu korïngringtinö ngwïny cho echön akwitu kömeywok nko sömewut ompö wop anka tïkwïl. Pkonöy tïkwïn cho otyegho pich nko töngönchin ompö yïm.

¹²Wölo kïtömö kwighisyö ngalechoni kïnömokwa akechopokwa kong. Atolapay ketötokwa tökerwokwok ompö kori sowut aketorchok chela. Kimïtinokwa tawu pöytoghï nko yetïntin akwompö kaynenyan.

¹³Lïku nyoni nyu pöroyïntonkwa nyo omwotïtoy Lökoy cho Karamach.

¹⁴ Mïchinokwa amuta akonga lö möminye machata kenya kenan lö kïghetöy kegh lö ne.

¹⁵Ompöwölo okonokwa ante kuti nko ngöghomnye nyo memukönye pungkökwa kuyokwï kïgh amemukönye kumöl.

¹⁶Wïchtonokwa chini le ompö yïyikwa nko tupchenikwa nko pich cho pö orenkwa nko kongotïnekwa. Kïtïghokwa walaka.

¹⁷Reyokwa pich akwompö kaynenyan.

¹⁸Wölo ompö choni löwïr, mepotönye putyon nyo le ompö akonga ompö mötöwekwa.

¹⁹Achïchïm nyu lasiny tonyorunö söpon.

²⁰“Ato asïwekwa kuwitwit lïkoswö cho reyö kegh Yerusalem, onkïtï lö, kirich kiwuratenyi.

²¹Nya nyu kïryagh pich cho mi Yudea kutang kutïngkot, akany kïpka sany cho mi kanasyan ori amopïsï cho kömi sany kïlïtï ori.

²² Ompöwölo osiswechete kï Osis cho tököy Tororöt pipö Israel atökïpïntö ngala löwïr cho mwoghöy Kikirut.

²³Mutyö nyoman atoni ompö kor cho mirsïyi osiswechoni nko yotïn cho rerïyöy monekwa ompöwölo itu nyarïl nyo wow ngwïnyinï akwitini nörekyo Tororöt pïchete.

²⁴Kïpöro walaka chok, kenam walaka kïlïkwï mampustin ompö koros löwïr. Pkonöy pipö punton kuwuröy Yerusalem ntökuwonyö osiswekwa cho kikïngor.

²⁵ “Osïwïyekwa tïkwïn cho pö kwongut ompö asis nko arawa nko kokel. Ngwïnchini nyarïl akïpotonchö pipö koros cho mi ngwïny kïmïkul, ompö kighumöto nanam nko mirtino pögh.

²⁶Ryöltoy pich ompö mïghö otini tupu kong nyörilwok cho pkonchini ngwïny kïmïkul, ompöwölo kitimtimöy tïkwïn cho owesöch cho mi yïm.

²⁷ Atolapay kïsïwa nyu chane Wero Chi kungwïno polta nko owesyö nko ororyö nyo wow.

²⁸Otini kasïwekwa nyu kwighisyö tïkuchoni, oghyong asyol mötöwekwo, ompöwölo kikïrikï sörunötenkwa.”

²⁹Atolapay kïmwochï Yeso pïchay körkeyïn lö, “Anane ket pö moköngwö nko ket walaka,

³⁰otini kasanach morichi akusïl sökechi onkïtukwa lö, karikï osiswo kitokot.

³¹Kïlenyoni ato asïwekwa tïkuchete komwowokwa kwighisyö, onkïtukwa nyu lö karich kwitï Pöyunöto Tororöt.

³²“Omwowokwa nyoman lö, mewerönye pïnete kïtomö kwighisyö tïkuchï löwïr.

³³Weröy yïmö nko ngwïny, wölo meweröcha ngalechan nyonikïny.

³⁴“Orip kegh nyu akwane, tömekaperak pïghyöny nko tamasa nko sïngut pö ngwïnyinï, tömemirok asispa kingwïnata Wero Chi le ngöghöp.

³⁵Ompöwölo itini asisoni pipö ngwïny kïmïkul lenyoni.

³⁶Wölo, otöpï kïpsach kïnomnyö asagh tochïwïtyeghenö tïkuchoni pkonöy löwïr, amuch oghyongö tawu Wero Chi.”

³⁷ Kinetisyegho Yeso osiswechoni Kö pö Tororöt nyo mi Yerusalem, wölo otini katuwit kïwö kutïng pö Arol.

³⁸Kingetöy pich otini le kiwasan kïpetöy Kö pö Tororöt kïteröy ngalechi.