Read pokoot LUKA 22 Bible Online

LUKA 22 - pokoot bible

LUKA 22

¹ Kilekïtit atoni Ichon pö Makatin cho puryö Mumar nyo kikuro Pasaka.*

²Kumukyï tïsï cho echön nko koneti kirurut kïmar or nyo kïtïgho Yeso ompö sison ompöwölo kiwoghöy chane pich.

³Atoni nyu kïlït Onyötö Yudas Iskariote nyo kile akonga ompö kinetanchay le taman nko odeny.

⁴Kïlenyona, kïwö Yudas kïngalan nko tïsï cho echön nko yetïntino ripi Kö pö Tororöt,* kingölonöy or nyo kimuköy Yudas kwipchï Yeso chane.

⁵Kïngörekyö chane akïchomnyechï kutö nyinte ropïyen.

⁶Kughönchï Yudas chane atolapay kïmar pöroyïn nyo wïkchini Yeso chane ompö or nyo mösöwunye pich.

⁷Kitïta Ichon pö Makatin cho puryö Mumar, asis nyo kïyengöy wara kechir tökïlïkwï omisyo Pasaka.

⁸Kuyoktö Yeso Petro nko Yoana kïlenchï, “Ape agha omisyo Pasaka tökyama.”

⁹Kuyokyï chane lö, “Imökenyi keghenacha omisye onö?”

¹⁰Kïlenchï Yeso, “Ape akwoto olïtökwa kanasyan, otuyeghokwa chi nyo kosönöy pögh kösïm nyo mi. Arïpa nyinte ntö kïlït kö,

¹¹atolapay olenchikwa chito kot, ‘Katepakwa Echotyon lö mi onö köyay omonan Pasaka nko kinetankachu?’

¹²Porwokwa nyinte kö nyo pöro nyo mi koropa nyo kikegh lö sïkatat. Aghenakwa nyu omisye köyoni.”

¹³Kïpechï kegh, akïnyorï le nyaye kimwochï Yeso chane, atolapay kwigh omisyonay pö Pasaka.

¹⁴Kikany kwitïta ato kyomisiyi, kumpur Yeso ngwïny nko kiyoktoghichi.

¹⁵Atolapay kïlenchï, “Kyopïrchan nyoman am omisyonete pö Pasaka nko akwa kïtomö kenyarilanïn kong.

¹⁶Ompöwölo omwowokwa nyoman lö, momanye Pasake anka ngat ntökïtenö kwitïta sörunötö nyini poru ngala Pasaka ompö Pöyunöto Tororöt.”

¹⁷Atolapay kïcheng Yeso kikompo dipay* akuyokyï Tororöt sörö akïlö, “Achï, omosotenö.

¹⁸Omwowokwa lö, mogheghanye dipaychï ngat, tökïtenö kwitï Pöyunötö Tororöt.”

¹⁹Kicheng makatyan akuyokyï Tororöt sörö. Atolapay kïmïnchïr akïchöghchï chane akïlö, “Portönyan nyete, nyo kakïkonï akwompö akwa. Agha le nyete tananenanïn.”

²⁰ Kïmwa lenyoni ngat ompö kikompo dipay otini kiwany omisyo nangat lö, “Kikomponï kuporu muma* Tororöt nyo rel ompö kisönköchan cho kïmïltoy akwompö akwa.

²¹ “Wölo arose, mi chichini wïchtonanïn yete yi, omisïyi nyinte nko ani.

²²Nyoman meghöy Wero Chi le wölini kitatïta Tororöt, wölo otyogh nyo wow ompö chichoni wïchtoy nyinte.”

²³Otini kimwa lenyoni kïte kegh chane lö, ekï ngo ompö kwenungwa nyoni wetöy kwighöy ngölyontononi köny.

²⁴ Kïghyagha kïmölötö kwenu kinetanpa Yeso lö, ngo nyo ompö chane cho kikirosöy lö wow kïtïl walaka.

²⁵ Kïlenchï Yeso, “Pöytoy pöytoghi punton pikökwa ompö kat akïmököy kekuro chane, ‘Pich cho ngöroköy pich.’

²⁶ Wölo mölenye nyoni ompö akwa, ompöwölo chi nyo wow ompö akwa kïmïchini kumïnïngit kegh. Kïkany nyo le kintöghoghin kïmïchini kwigh kegh le mötworin.

²⁷ Ayo, nyono nyo wow, nyinö töpo mesa kwomisïyi nya anta nyo ipchini pich omisyö? Mö nyinönye töpo kwomisïyi? Wölo omitan kwenunkwa le chi nyo opöghisyechini pich.

²⁸“Akwa chaye kyomïkukonchö nko ani ompö tyomutköchan.

²⁹Nyo, le otini kikonanïn Paponyu apayta, okonokwa tïkwïl paytena.

³⁰ Omisyonekwa agheghsyö nko ani ompö Pöyunötenyan. Ompurekwa ngöcherwo paytagh atorwokyinö ortïn taman nko odeny cho pö Israel.”

³¹Atolapay kïlenchï Yeso Simon, “Simon, Simon! Tere ya! Kimököy Onyötö kïnamakwa akïserakwa löwïr le wölo kïsertoy pagh cho mi nko morïr.

³²Wölo kosowunyi Simon lö tömöwïs kighanatengu. Akwotini kemïlenyi wölo omitan, ichïchim werkökwo.”

³³Kuyokyï Petro lö, “Echotyon, kyokonwan kegh owö chela nko nyi amegh nko nyi.”

³⁴Kïlenchï Yeso, “Omwowunyi Petro lö, möwochönye kïrpö kokoroch soya kïtomö tiyenönyi kïnyil sömök lö, menkïtanïnyinye.”

³⁵ Atolapay kïlenchï Yeso chane, “Atanye kyayontekwa kïpuryö ropïyen anta mïlot anta kwegh kïgh nyo mi kyachopakwa?” Kïlö, “Ewo.”

³⁶Kïlenchï Yeso, “Wölo ye ato itïngetö chi ropïyen anta mïlot ip. Akwanka tïkwïl nyo metïng chok kïmïchini kwalta sïrenyi atökwal.

³⁷Omwowokwa lö, itïtoy ompö ani Kikirut nyay lentöy, ‘Kikinyoryö nyinte nko chelölos,’ Ompöwölo itïtoy nyo mötïny ngala löwïr cho kikikir ompö parakunyan.”

³⁸Kïlö kinetankachi, “Rose köny, Echotyon, kïtïngetecha chokon odeny.” Wölo kimöpköchïnye kïyinö kimwoghöy Yeso kïlenyona kïlenchï Yeso chane, “Nya kïten.”

³⁹Kingeta Yeso kanasyantanay kïwö kutang kutïng pö Arol, kïle wölo köle otöptanyi. Kïrïp kinetankachi nyinte wölini.

⁴⁰Kïkany kwit wölini kiwetöy, kïlenchï kinetankachi, “Asagha atömolït työmut.”

⁴¹Atolapay kïwö yona kite, nyo tenö ato itöy kögh nyo wirtoy chi. Kïkïtïng akïsagh

⁴²lö, “Papo, ato ichömenyi, ichengena kikomponï pö kiwongunöt. Amelö nyu machatenyan, wölo nya kwigha machatengu.”

⁴³Atoni nyu, kuchumchï nyinte malaykayan nyo kingwïna yïm kuchïchim nyinte.

⁴⁴Akwotini kilïmchï kegh ngwonïn nyo wow ompö mïkulöwunyi, kïtas kïsagh tya, kïwöghökisyö kighotichi kïkarkegh nko kisön cho ntökitökï ngwïny.

⁴⁵Kïkany kïngetunö saghatenyi, kïmïla wölo mi kinetankachi. Kutomtö rusot, kyoghöcheghö nyarïlwok.

⁴⁶Kïlenchï, “Ompö ne torusonekwa? Ongetyenö asagh, atömolït työmut.”

⁴⁷Otini kitökïngölonöy Yeso, kuchumï söpïch nyo kintöghoghchini Yudas nyo kile akonga ompö kinetankachi chay le taman nko odeny. Kungwïn lenyini Yudas akïtaroch Yeso.

⁴⁸Wölo kïlenchï Yeso, “Yudas, iwïchteghonyi tarokat Wero Chi?”

⁴⁹Kïkany kïpköchï kinetanchay kimi nko Yeso lö ne nyo cho kirïptoy ngal cho lata choni, kitep lö, “Echotyon, kïparecha pïchï chokonicho?”

⁵⁰Kïnget lenyini akong ompö chane kïtör yit pö ewu tagh nyo pö mötworinto Tïsin nyo Wow* kïchïnta.

⁵¹Wölo kïlo Yeso, “Pïstenö, nya kïten.” Kïswany atay kömi yit pö chichay akusop.

⁵²Atolapay kïlenchï Yeso tïsichay echön nko echot pö ripi Kö pö Tororöt nko poy chini kipka kïnam nyinte, “Ochan so chelölosyon topkonchanïkwa nko chokon nko runkun?

⁵³ Kyomitan nko akwa kïnomnyö ompö Kö pö Tororöt amöminye chi nyo kinamanïn. Wölo pöroyïntonkwa nyete, otini tökïtïngetö tuwïn owesyö nyo pöytoy.”

⁵⁴Kïnam pïchay Yeso akumït kïwö kö pö Tïsin nyo Wow. Kïrïp Petro chane löt kïmi ato low.

⁵⁵Kimi ma nyo kikenagh köyay sany. Kïwö Petro kïtöpö ngwïny akïyï manyi nko pïchay.

⁵⁶Kimito mötworintö nyo le työ atoni nyo kisïwa nyinte kumpuröy otini, kilöpochï mayay. Kuros Petro lasiny akïlö, “Kyasïwan chichete kïmi nko Yeso.”

⁵⁷Wölo kïtiyö Petro lö, “Ewo, kokonï monkïtönye nyinte.”

⁵⁸Atole ya kite, kïsïwa chitanka nyinte nyo kilenchï, “Ichinyi tïkwïl akonga ompö pich cho kirïpöy chichara.” Wölo kuyokyï Petro lö, “Wena, mochanye.”

⁵⁹Lötï, ato kiwer ato ngata sa akonga, kïmwa chitö anka lö, “Kimi chichete nko chichï nyo mötïnye kemïr, ompöwölo chi pö Kalilaya nyinte.”

⁶⁰Wölo kuyokyï Petro lö, “Wena, monkïtönye kini imwoghenyi.” Panini lawel, kïtomö kuwany kïngalan, kïwach kïrpö kokoroch.

⁶¹Kïwaghach kegh Echotyon akïtopön Petro lasiny. Kunan Petro ngalechanya pö Echotyon, chay kilenchï, “Möwochönye kïrpö kokoroch soya kïtomö tiyaninyi kinyïl sömök lö menkïtaninyinye.”

⁶²Kïlenyona kïngeta Petro ataye kïwö sany atolapay kusyonchï kegh akïloch nyoman.

⁶³Kïnget pïchay kiripöy Yeso kïnyerera akïmuny nyinte.

⁶⁴Kuluma konyichi ananka akïmuny atolapay kïtep lö, “Ngo nyini kömunginyi? Ngore köny!”

⁶⁵Atolapay kïngalana nyinte ngale walaka cho chang cho pö kiswomöt.

⁶⁶Kïkany kïyech, kuryam poyi pipö Yaudi nko tïsï cho echön nko koneti kirurut. Kemïtï Yeso tawu Kokwö,

⁶⁷aketep lö, “Ato ichinyi Kristo,* imwowecha.” Wölo kuyokyï lö, “Ato omwowokwa, moghönanïkwanye

⁶⁸Kwato atepakwa teput, moyokunekwanye.

⁶⁹Wölo kïngeta ye kutang tagh, töpo Wero Chi ewu tagh nyo pö owesyo Kimuktoghin Tororöt.”

⁷⁰Kïlö chane löwïr, “Kichö so ichinyi Wero Tororöt?” Kuyokyï chane lö, “Akwa chini omwoghöy lö, ochan.”

⁷¹Atolapay kïlö pïchay, “Tökemöröy söwi walaka cho pö ne? Kikelïmacha kïpkana kutinyi.”