Read pokoot LUKA 24 Bible Online

LUKA 24 - pokoot bible

LUKA 24

¹Ompö asispa Chumapili kiwasan, kïpa koruchay akïnömotoy köröstinechay kikakïmar chane.

²Kutomï kikemïlmïlta koghay kiköröy pïrïmponay.

³Kïlït ori, wölo kimönyorïcha por pö Echotyon Yeso.

⁴Akwotini kitökïtöngönchini ngalechoni, kighisyö, kughyongö panini pich odeny ato kilekïtö chane, pich cho kiloköy sïro cho kwörkwör.

⁵Kuwöghisyö koruchay akungïrukisyö ntökwit ngwïny. Kïlenchï pïchay chane, “Ompö ne tomörekwa chi nyo satate ompö kwenu pich cho kimeghö?

⁶ Mökïminye yi, kikututï. Anane kïgh nyo kimwowokwa atanya kïtökïmi Kalilaya,

⁷nyo kilö, ‘Kitöni Wero Chi mori mwokïyis nyo mötïny, akewudochï kimurtöwon, atökututï asisto sömök.’ ”

⁸Atoni nyu kunan koruchay ngalechoni kimwa Yeso.

⁹Kïngeta pïrïmponay akïpa kïmwochï ngalechoni löwïr kinetankachi chay le taman nko akonga nko pikö walaka.

¹⁰Koruchoni kï ki ompö Marya Makdalena nko Yoan nko Marya yoto Yakopo nko koru walaka cho kimi tïkwïl. Chane cho kipchï lökoyechoni kiyoktoghï.

¹¹Wölo ompö chane, kilata ngalechoni tarit nyo tumo ket, nyo kimeghancha.

¹²Wölo kïnget Petro akurïp kutang pïrïmponay. Akwotini kit kungïrukö atö kuros ori. Kïsïwa sïro kwïle atolapay kïmïla kaw akïtöngönchini tïkuchoni kighisyö.

¹³Kimi asisoni kinetankachi odeny kïpetöy Emau, kanasyan akonga nyo kingata lowïntanyi kilomiten taman nko akonga Yerusalem.

¹⁴Otini kimi pan kingölono chane ngalechaye kitökwighisyot tolekït.

¹⁵Akwotini kimi kïngölonöy akïtepöy kegh ngalechoni, kuchumchï Yeso chane akïnomnyotö tïkwïl.

¹⁶Wölo melö kipköchï lö, ki Yeso nyoni kimi tïkwïl ompöwölo kiyentö Tororöt konyikwa.

¹⁷Kïlenchï Yeso pïchay, “Ne ngalechï omwoghotokwa omikwa pan nya?” Kughyö pïchay löwïr, akïwuronchö.

¹⁸Atolapay kïtep akonga nyo kïkuro Kleopas lö, “Nkï töptoy ichinyi ton onkït ompö Yerusalem nyo tomö nkïtunö tïkwïn cho keghisyeghö wöloni ato lekït?”

¹⁹Kïtep Yeso lö, “Ne tïku?” Kuyokyï lö, “Tïkwïn cho kighisyö ompö Yeso nyo pö Nasaret, nyo kile werkoyon nyo awes ompö ighisyewutkachi nko kinetutkachi ompö tawu Tororöt nko nyo pö pich löwïr.

²⁰Kutötö tïsï cho echön nko pöytoghicha kïwö mori Pilato atökerwokyï, atolapay kïwudochï kimurtöwon.

²¹Wölo kikïlenchinecha kegh, nyinte nyo kïsöru pipö Israel. Amelö choni opïn, asisto sömök nyete kïteno otini kighisyö ngalechoni.

²²Kïpka ompö korï walaka cho kömi nko acha akwotyeghenecha. Kipa chane kiwasan wölini kikïtïpchï,

²³wölo kïmönyorïcha portanyi. Kïmïlonchö akïlenchecha kikïsïwa malayken cho kimwochï chane lö, söpöy nyinte.

²⁴Atolapay kïpa pich walaka cho kikimicha tïkwïl pïrïmponay akïsïwa lenyini kimwowï koruchoni, wölo kimasïwacha nyinte.”

²⁵Kïlenchï Yeso pïchay, “Ochikwa sölwöy achï nyirtïghöch ompö mïkuliskökwo aghana ngal löwïr cho kimwa werkoy.

²⁶Kimömïchïnye so Kristo* kuwongwï lenyoni kïtomö kïlït ororyenyi?”

²⁷Atolapay kutor kuporchï chane ngal cho kikïmwa ompö parakunyi ompö Kikirut löwïr, kïngetunö kitapuna Musa ntökwit cho pö werkoy löwïr.

²⁸Otini kirich chane kanasyantanay kipetöy, kwigh kegh Yeso le chi nyo mi kuletöy tagh.

²⁹Wölo kïmir chane nyinte akïlenchï, “Mpurö nko acha, ompöwölo ki kwimön akikungwïn tuwïn.” Kïlenyona, kïlït kanasyantanay akïtöpö nko chane.

³⁰Kïkany kïtöpö ngwïny tökwomisyö nko chane, kïcheng makatyan, akuyokyï Tororöt sörö. Atolapay kïmïnchïr akutö chane.

³¹Atoni nyu kïyotisyö konyikwa akunkïtï lö, kitö nyinte nyini. Wölo kïngeta kwenungwa panini.

³²Kïmwochï kegh lö, “Melö so kanagha ma orincha ataye kangalan nyinte nko acha ompö arawet atay keporwecha ngala Kikirut?”

³³Kïnget pïchay panini lawel akïmïlonchö Yerusalem. Kïnyorï kinetanchay le taman nko akonga mi nyoryogh nko pikö walaka,

³⁴cho kilentöy. Löwïr, “Kikututï Echotyon nyoman, akikuporchï kegh Simon.”

³⁵Kïmwochï pïchay le odeny chane ngal cho kighisyö ompö or kïpetoy Emau nko wölini kinkïtïtö lö, Yeso nyini otinö kimïnychïr makatyan.

³⁶Otini kitökïmwoghöy pïchay ngalechoni, kughyongö Yeso nyinte kwenungwa akïlenchï, “Pöghisyö akwa.”

³⁷Kwotyö akïmïghyö chane nyoman. Kilenchini kegh kikïsïwa oyin.

³⁸Wölo kïlenchï chane, “Ompö ne towöghisyenökwa? Akwompö ne totïngetenökwa tomtomönöt ompö mïkuliskökwo le nyï?

³⁹Arose morichan nko kelyechan atasïwena lö, ante kegh nyete. Atatapanïn arosanïn. Ompöwölo mötïngnye mïkulögh peny nko ko le wölï osöchinanïkwa.”

⁴⁰Kïkany kuwany kïmwa lenyoni kuporchï chane morichi nko kelyechi.

⁴¹Otini kitökïtomtomönöy pïchay ompö ngörekyö nko tangany nyo wow nyo kipï ngalechoni, kïtep Yeso chane lö, “Otïngetekwa kïgh ompö yete nyo kyomöy?”

⁴²Kutö nyinte mïnchïrana koghoghwö nyo kikïwatan.

⁴³Kïcheng akwam ompö tawungwa.

⁴⁴Atolapay kïlenchï, “Ngalechan chete chanya kyomwowokwa atanya kitomitan nko akwa. Kyamwaghan lö, itïtoy nyo mötïny, tïkwïn löwïr cho kikikir ompö parakunyan ompö Kikirut pö Musa nko cho pö werkoy nko kitapu Tumwöy.”

⁴⁵Atolapay kïyat mötöwekwa tökïpköchï Kikirut

⁴⁶akïlenchï, “Kikikir lö, wongu akïma Kristo nyo mötïny akututï asisto sömök

⁴⁷Akï mïchini kyamta ompö kaynenyi lökoyo kötogh nko mötoghöto ngokï kitorö amtaghate Yerusalem ntökïghömï punton löwïr.

⁴⁸Amwatïta chï le akwa ngalechï kasïwekwa.

⁴⁹ Oyokwokwa ayomisto Paponyan kungwïnchokwa. Wölo oköngisyeghö kanasyantanete ntökïtenö kungwïnchokwa owesyö nyo ngwïno parak.”

⁵⁰ Atolapay kumït chane kïpegha kanasyantanay ntökïlekïtyï kanasyanta Petaniya. Ompö atoni kïsyol ewunechi akïsagh Tororöt kupöropchï chane owesyenyi.

⁵¹Akwotini kitökïsoghchini chane, kïpïstö chane akep kïwö yïm.

⁵²Atoni nyu kïkïtïngchï nyinte akïmïlonchö Yerusalem nko ngörekyö nyo tya!

⁵³Amenakanye Kö pö Tororöt* kïsölöy Tororöt.