Read pokoot LUKA 7 Bible Online

LUKA 7 - pokoot bible

LUKA 7

¹Kïkany kuwany Yeso kïngölonchï chane ngalechi löwïr, kïwö kutang Kapernaum.

²Kimito wölini chi pö Rumi nyo kiwowö askarin nyo kitïng mötworintenyi nyo kichömöy nyoman. Kichirate mötworintononi akirich kïma.

³Kikany kïlïm wowïnay pö askarin ngala Yeso, kuyoktö poyi pipö Yaudi kïpa kïkur nyinte kungwïn atökusop mötworintenyi.

⁴Kïpa wölo mi Yeso akïsagh nyinte nyoman lö, “Mïchini ngarakanyi chichoni,

⁵ompöwölo chömöy piköcho, akitekwecha kö pö saghat.”*

⁶Kïwö Yeso nko chane akwotini kirich köyay, kïyonta wowïnay pö askarin kongotichi kïpa kïmwochï Yeso lö, “Mesus kegh, we Echotyon, ompöwölo mömïchinanïnye atakinyi ompö konyan.

⁷Akunka nyete kasïwan lö merokonye atwan wölo imitenyi. Nyo karam, mwagha ngölyon pat atökïsöp mötwörintenyan.

⁸Ochan tïkwïl chi nyo omitö ngwïnyi echotkachu aterchinan chane akïmi askarin cho opöyunan akïterwanïn chane. Ato olenchan anka, ‘Wïyö!’ Kïwetöy, alenchan anka, ‘Nyonö!’ Kungwïnöy, akwato omwochan mötworintenyan lö, ‘Igha ki,’ kwighöy.”

⁹Kïtangany Yeso atoni kilïm ngalechoni, kïwaghach kegh kura söpïch nyo kirïpöy nyinte akïlenchï, “Omwowokwa nyoman lö, tomönye onyorwan kighanat nyo lata nyï, ompö koro Israel kïmïkul.”

¹⁰Otini kit pïchay kikïyonta ka wowïntonay, kupentö kikïsöp mötworintonay.

¹¹Kipöghön nyo tangogh, kïwö Yeso kutang kanasyan nyo kïkuro Nain. Kiwö nko kinetankachi nko söpïch nyo wow.

¹²Otini kirich kuka kanasyantanoni, kïnyorï pich cho kipöy chi nyo kima. Mïntïrïchoni kï ki weri onkït nyo pö korka nyo kile mïsïk. Kimito kokononi nko söpïch nyo wow nyo pö pich cho kipkono kanasyantanay.

¹³Kikany kïsïwa Echotyon kokonay kusyonchï, akïlenchï, “Meriröy.”

¹⁴Atolapay kïrich akïswany kïyay kikïsïto mïntïrïch, kïkïch akughyö pïchay kisïtöy. Kïlö Yeso, “Werï, omwowunyi lö, ngeta.”

¹⁵Kïtöpö chichay kile mïntïrïch ngwïny akïngalan. Kïlenchï Yeso kame, “Anyï montöngu.”

¹⁶Kïnam mïghötö pïchay löwïr, akïsal Tororöt kilentöy, “Kechumuna kwenuncha werkoyontö nyo wow! Kengwïn Tororöt kïsörï pikachi!”

¹⁷Kiyasta ngalechay pö Yeso kïghömï Yudea kïmïkul nko koros cho kilekïtinö.

¹⁸Kipa kinetanpa Yoana akïmwochï Yoana ngalechoni löwïr.

¹⁹Kïnget Yoana kïyonta kinetankachi cho le odeny, kïpa wölo mi Echotyon atökïtep lö, “Nyi nyoni kimwa Yoana lö ngwïnöy nya, anta tökekönecha chitö anka?”

²⁰Otini kitï chane wölo mi Yeso, kïlenchï, “Köyonwecha Yoana Kipatisanin ketepinyi lö, ‘Nyi nyï kikïngor lö, ngwïnöy nya anta tökekönecha chi anka?’ ”

²¹Kïnyini kusop Yeso pich cho chang ompö sömewutkökwa, otini kingölonöy nko chane, akutul kïpegha pich ogh cho ghach, akwigh chepkörotonoy cho chang kurosïta.

²² Kuyokyï Yeso chane lö, “Omïlonchenö wölo mi Yoana amwochï tïkwïn tïkwïl cho kasïwekwa alïmakwa, kerosïta chepkarotonoy, kapesta pich cho ngwolsot, kaketïlil cho amate psenkwet, kalïm cho mingote, kakututï pich cho kimeghö akyomchï mey Lökoy cho Karamach.

²³Akusoyönote chi nyo mötïngnye tomtomönöt ompö ani.”

²⁴Kïkany kïpechï kegh pïchay kiyonï Yoana, kutor Yeso kïmwochï söpïchay parak Yoana, kïtep chane lö, “Otini kyapekwa wölini le surkwen, kyokönekwa lö, kïsïwïy ne? Soywon nyo kitimtimöy yomötï?

²⁵Kyapekwa nyu asïwa ne? Chi nyo loköy sïro cho pïchighöchï? Nkït chi anka tïkwïl lö, pich cho loköy cho pïchighöch akïtïpisot ompö pïghyöny kïmöngöy kori pöytoghï.

²⁶Wölo mwowante köny lö, kyapekwa asïwa ne? Werkoyon so? Owöy, amwowokwa nyoman lö, kyasïwekwa nyo wow kïtïl werkoyon.

²⁷ Ompöwölo Yoana nyaye ngölono Kikirut lö, ‘Anyï chi nyo oyoktonan, oyonunan kuntöghoghunyi akwiwunyi arengu.’ ”

²⁸Kuwany Yeso kïlenchï pïchay, “Omwowokwa nyoman lö, wow Yoana kïtïl chi anka tïkwïl nyo kikïyï, wölo chi anka tïkwïl nyo mïnïng tya ompö Pöyunöto Tororöt kïwow kïtïl nyinte.”

²⁹ Akwotini kilïm pich tïkwïl ngalechi, kïmi nko kwöghi surï, kughan lö pö man Tororöt, ompöwölo ki chane choni kitach Kipatisanata Yoana.

³⁰Wölo kitagh Parisaytin* nko koneti kirurut machata Tororöt ompö parakungwa akïtagh kupatisan Yoana chane.

³¹Kilenchï Yeso pïchay, “Okongityonan pïnï nko ne? Karkegh nko ne?

³²Karkegh nko tengon cho mpuröy donyö, cho mwochini kegh lö, ‘Kakïkutacha pkurerï amelö kanyalakwa. Kïkany ketumwokwa tum pö rira chi nyo kama, kïmolokyekwanye.’

³³Kingwïn Yoana Kipatisanintö, momisyö amögha dipay,* amwaghakwa lö, ‘Ipote oy.’

³⁴Kungwïn Wero Chi kwomisyö akïgheghsyö, olekwa, ‘Arose chemu, akï ptamasyan nyo le kongo kwöghi surï nko mwokïyis.’

³⁵Wölo rumunote lö, pö man ngöghomnyö Tororöt ompö monechi löwïr cho terchini nyinte.”

³⁶Kikur Parisayon Yeso kungwïn kïlïkwï tontenyi. Kïlït Yeso köyay akumpur kwomisyö.

³⁷ Kimi korka kanasyantanoni nyo kile chepores. Kïlïm kokononi lö, kyomisyegho Yeso köyoni pö Parisayon, kwipï lal nyo kimi mwagh nyo kiyiltoy

³⁸Kughyongö lötu Yeso otini riköy kelyechi, kïloch kïtörenchini lokechi kelyo Yeso akïmisa putechi, akïchïchïn akuyila mwaghay.

³⁹Akwotini kisïwa Parisayontanay kikurchï nyinte omisyö, kunonchï kegh ompö mïkulöwunyi lö, “Ntökö werkoyon chichete nyoman kötösïku lö, ngo kokonï swongöy nyinte ompöwölo chemwokïyon.”

⁴⁰Kuyokyï Yeso nyinte lö, “Simon, otïngetan ngölyon nyo omwowunyi.” Kïlö, “Owöy, konetin mwowante.”

⁴¹Kutor Yeso kïlenchï, “Kimi pich odeny cho kimang ropïyeni chi, kimang akonga ropïyeni silpa 500, kumang anka 50.

⁴²Akimökumïcha kwodeny kïghakta kïlenyona kuchalta chichay pösöntinechay kwodeny. Ekïngo ompö chane nyo chömöy nyinte tya?”

⁴³Kuyokyï Simon lö, “Olentan chitö nyinö kikïlöstoghchï cho chang.” Kïlenchï Yeso, “Kenyorunyi.”

⁴⁴Kïwaghaka Yeso kuros kokonay akïlenchï Simon, “Isïwïyenyi kokonï nya? Kangwïnan kongu amekonanïnyinye pögh amwata kelyechu, wölo kamwata nyinte lökechi kelyechan akïmisa putechi.

⁴⁵Melö ketarokaninyi ompö chïchïna, wölo möminye ato köpïstö nyinte machïchïn kelyechan ompö konyït kïngeta otini katwan.

⁴⁶Meyilenyinye mwagh mötïnyan, wölo keyila nyinte mwagh nyo ngutöy nyo anyïn kelyechan.

⁴⁷Nyo omwowunyi lö, poru chamatenyi nyoni wow lö, kikelöstoghchï nyinte ngokichi chini chang. Ompöwölo poru chi nyo kikïlöstoghchï cho ngörï chomnyogh nyo mïnïng pat.”

⁴⁸Atolapay kïlenchï Yeso kokonay, “Kikelöstowunyi ngokiku.”

⁴⁹Kutor toye walaka kïtep kegh lö, “Ekï ngo nyï löstoghchini pich ngokï köny?”

⁵⁰Kïlenchï Yeso kokonay, “Kakïsörunyi kighanatengu, wechinö kegh ompö kalya.”